༩. སི་ཀྑཱ་པ་ད་སུ་ཏྟཾ

༩༩. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ཙ་ཏྟཱ་རོ? ཨ་ཏྟ་ཧི་ཏཱ་ཡ པ་ཊི་པ་ནྣོ ནོ པ་ར་ཧི་ཏཱ་ཡ, པ་ར་ཧི་ཏཱ་ཡ པ་ཊི་པ་ནྣོ ནོ ཨ་ཏྟ་ཧི་ཏཱ་ཡ, ནེ་ཝ་ཏྟ་ཧི་ཏཱ་ཡ པ་ཊི་པ་ནྣོ ནོ པ་ར་ཧི་ཏཱ་ཡ, ཨ་ཏྟ་ཧི་ཏཱ་ཡ ཙེ་ཝ པ་ཊི་པ་ནྣོ པ་ར་ཧི་ཏཱ་ཡ ཙ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨ་ཏྟ་ཧི་ཏཱ་ཡ པ་ཊི་པ་ནྣོ ཧོ་ཏི, ནོ པ་ར་ཧི་ཏཱ་ཡ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨ་ཏྟ་ནཱ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི, ནོ པ་རཾ པཱ་ཎཱ་ཏི་པཱ་ཏཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ ཨ་དི་ནྣཱ་དཱ་ནཱ པ་ཊི་ཝི་ར་ཏོ ཧོ་ཏི, ནོ པ་རཾ ཨ་དི་ནྣཱ་དཱ་ནཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ ཀཱ་མེ་སུ་མི་ཙྪཱ་ཙཱ་རཱ པ་ཊི་ཝི་ར་ཏོ ཧོ་ཏི, ནོ པ་རཾ ཀཱ་མེ་སུ་མི་ཙྪཱ་ཙཱ་རཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ མུ་སཱ་ཝཱ་དཱ པ་ཊི་ཝི་ར་ཏོ ཧོ་ཏི, ནོ པ་རཾ མུ་སཱ་ཝཱ་དཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ པ་ཊི་ཝི་ར་ཏོ ཧོ་ཏི, ནོ པ་རཾ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ ཝེ་ར་མ་ཎི་ཡཱ ས་མཱ་ད་པེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨ་ཏྟ་ཧི་ཏཱ་ཡ པ་ཊི་པ་ནྣོ ཧོ་ཏི, ནོ པ་ར་ཧི་ཏཱ་ཡ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ པ་ར་ཧི་ཏཱ་ཡ པ་ཊི་པ་ནྣོ ཧོ་ཏི, ནོ ཨ་ཏྟ་ཧི་ཏཱ་ཡ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨ་ཏྟ་ནཱ པཱ་ཎཱ་ཏི་པཱ་ཏཱ ཨ་པྤ་ཊི་ཝི་ར་ཏོ ཧོ་ཏི, པ་རཾ པཱ་ཎཱ་ཏི་པཱ་ཏཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ ཨ་དི་ནྣཱ་དཱ་ནཱ ཨ་པྤ་ཊི་ཝི་ར་ཏོ ཧོ་ཏི, པ་རཾ ཨ་དི་ནྣཱ་དཱ་ནཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ ཀཱ་མེ་སུ་མི་ཙྪཱ་ཙཱ་རཱ ཨ་པྤ་ཊི་ཝི་ར་ཏོ ཧོ་ཏི, པ་རཾ ཀཱ་མེ་སུ་མི་ཙྪཱ་ཙཱ་རཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ མུ་སཱ་ཝཱ་དཱ ཨ་པྤ་ཊི་ཝི་ར་ཏོ ཧོ་ཏི, པ་རཾ མུ་སཱ་ཝཱ་དཱ ཝེ་ར་མ་ཎི་ཡཱ ས་མཱ་ད་པེ་ཏི; ཨ་ཏྟ་ནཱ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ ཨ་པྤ་ཊི་ཝི་ར་ཏོ ཧོ་ཏི, པ་རཾ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ ཝེ་ར་མ་ཎི་ཡཱ ས་མཱ་ད་པེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ པ་ར་ཧི་ཏཱ་ཡ པ་ཊི་པ་ནྣོ ཧོ་ཏི, ནོ ཨ་ཏྟ་ཧི་ཏཱ་ཡ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ནེ་ཝ་ཏྟ་ཧི་ཏཱ་ཡ པ་ཊི་པ་ནྣོ ཧོ་ཏི ནོ པ་ར་ཧི་ཏཱ་ཡ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨ་ཏྟ་ནཱ པཱ་ཎཱ་ཏི་པཱ་ཏཱ ཨ་པྤ་ཊི་ཝི་ར་ཏོ ཧོ་ཏི, ནོ པ་རཾ པཱ་ཎཱ་ཏི་པཱ་ཏཱ ཝེ་ར་མ་ཎི་ཡཱ ས་མཱ་ད་པེ་ཏི…པེ… ཨ་ཏྟ་ནཱ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ ཨ་པྤ་ཊི་ཝི་ར་ཏོ ཧོ་ཏི, ནོ པ་རཾ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ ཝེ་ར་མ་ཎི་ཡཱ ས་མཱ་ད་པེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ནེ་ཝ་ཏྟ་ཧི་ཏཱ་ཡ པ་ཊི་པ་ནྣོ ཧོ་ཏི, ནོ པ་ར་ཧི་ཏཱ་ཡ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨ་ཏྟ་ཧི་ཏཱ་ཡ ཙེ་ཝ པ་ཊི་པ་ནྣོ ཧོ་ཏི པ་ར་ཧི་ཏཱ་ཡ ཙ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨ་ཏྟ་ནཱ ཙ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི, པ་ར་ཉྩ པཱ་ཎཱ་ཏི་པཱ་ཏཱ ཝེ་ར་མ་ཎི་ཡཱ ས་མཱ་ད་པེ་ཏི…པེ… ཨ་ཏྟ་ནཱ ཙ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ པ་ཊི་ཝི་ར་ཏོ ཧོ་ཏི, པ་ར་ཉྩ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ ཝེ་ར་མ་ཎི་ཡཱ ས་མཱ་ད་པེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨ་ཏྟ་ཧི་ཏཱ་ཡ ཙེ་ཝ པ་ཊི་པ་ནྣོ ཧོ་ཏི པ་ར་ཧི་ཏཱ་ཡ ཙ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨི’’ནྟི. ན་ཝ་མཾ.