༡. ཨ་སུ་ར་སུ་ཏྟཾ

༩༡. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ཙ་ཏྟཱ་རོ? ཨ་སུ་རོ ཨ་སུ་ར་པ་རི་ཝཱ་རོ, ཨ་སུ་རོ དེ་ཝ་པ་རི་ཝཱ་རོ, དེ་ཝོ ཨ་སུ་ར་པ་རི་ཝཱ་རོ, དེ་ཝོ དེ་ཝ་པ་རི་ཝཱ་རོ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨ་སུ་རོ ཧོ་ཏི ཨ་སུ་ར་པ་རི་ཝཱ་རོ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ དུ་སྶཱི་ལོ ཧོ་ཏི པཱ་པ་དྷ་མྨོ, པ་རི་སཱ་པི་སྶ ཧོ་ཏི དུ་སྶཱི་ལཱ པཱ་པ་དྷ་མྨཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨ་སུ་རོ ཧོ་ཏི ཨ་སུ་ར་པ་རི་ཝཱ་རོ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨ་སུ་རོ ཧོ་ཏི དེ་ཝ་པ་རི་ཝཱ་རོ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ དུ་སྶཱི་ལོ ཧོ་ཏི པཱ་པ་དྷ་མྨོ, པ་རི་སཱ ཙ ཁྭ་སྶ ཧོ་ཏི སཱི་ལ་ཝ་ཏཱི ཀ་ལྱཱ་ཎ་དྷ་མྨཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨ་སུ་རོ ཧོ་ཏི དེ་ཝ་པ་རི་ཝཱ་རོ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ དེ་ཝོ ཧོ་ཏི ཨ་སུ་ར་པ་རི་ཝཱ་རོ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ སཱི་ལ་ཝཱ ཧོ་ཏི ཀ་ལྱཱ་ཎ་དྷ་མྨོ, པ་རི་སཱ ཙ ཁྭ་སྶ ཧོ་ཏི དུ་སྶཱི་ལཱ པཱ་པ་དྷ་མྨཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ དེ་ཝོ ཧོ་ཏི ཨ་སུ་ར་པ་རི་ཝཱ་རོ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ དེ་ཝོ ཧོ་ཏི དེ་ཝ་པ་རི་ཝཱ་རོ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ སཱི་ལ་ཝཱ ཧོ་ཏི ཀ་ལྱཱ་ཎ་དྷ་མྨོ, པ་རི་སཱ་པི་སྶ ཧོ་ཏི སཱི་ལ་ཝ་ཏཱི ཀ་ལྱཱ་ཎ་དྷ་མྨཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ དེ་ཝོ ཧོ་ཏི, དེ་ཝ་པ་རི་ཝཱ་རོ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨི’’ནྟི. པ་ཋ་མཾ.