(༧) ༢. པ་ཏྟ་ཀ་མྨ་ཝ་གྒོ

༡. པ་ཏྟ་ཀ་མྨ་སུ་ཏྟཾ

༦༡. ཨ་ཐ ཁོ ཨ་ནཱ་ཐ་པི་ཎྜི་ཀོ ག་ཧ་པ་ཏི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨ་ནཱ་ཐ་པི་ཎྜི་ཀཾ ག་ཧ་པ་ཏིཾ བྷ་ག་ཝཱ ཨེ་ཏ་ད་ཝོ་ཙ –

‘‘ཙ་ཏྟཱ་རོ་མེ, ག་ཧ་པ་ཏི, དྷ་མྨཱ ཨི་ཊྛཱ ཀ་ནྟཱ མ་ནཱ་པཱ དུ་ལླ་བྷཱ ལོ་ཀ་སྨིཾ. ཀ་ཏ་མེ ཙ་ཏྟཱ་རོ? བྷོ་གཱ མེ ཨུ་པྤ་ཛྫ་ནྟུ ས་ཧ་དྷ་མྨེ་ནཱ་ཏི, ཨ་ཡཾ པ་ཋ་མོ དྷ་མྨོ ཨི་ཊྛོ ཀ་ནྟོ མ་ནཱ་པོ དུ་ལླ་བྷོ ལོ་ཀ་སྨིཾ.

‘‘བྷོ་གེ ལ་དྡྷཱ ས་ཧ་དྷ་མྨེ་ན ཡ་སོ མེ ཨཱ་ག་ཙྪ་ཏུ ས་ཧ ཉཱ་ཏཱི་ཧི ས་ཧ ཨུ་པ་ཛ྄ཛྷཱ་ཡེ་ཧཱི་ཏི, ཨ་ཡཾ དུ་ཏི་ཡོ དྷ་མྨོ ཨི་ཊྛོ ཀ་ནྟོ མ་ནཱ་པོ དུ་ལླ་བྷོ ལོ་ཀ་སྨིཾ.

‘‘བྷོ་གེ ལ་དྡྷཱ ས་ཧ་དྷ་མྨེ་ན ཡ་སཾ ལ་དྡྷཱ ས་ཧ ཉཱ་ཏཱི་ཧི ས་ཧ ཨུ་པ་ཛ྄ཛྷཱ་ཡེ་ཧི ཙི་རཾ ཛཱི་ཝཱ་མི དཱི་གྷ་མཱ་ཡུཾ པཱ་ལེ་མཱི་ཏི, ཨ་ཡཾ ཏ་ཏི་ཡོ དྷ་མྨོ ཨི་ཊྛོ ཀ་ནྟོ མ་ནཱ་པོ དུ་ལླ་བྷོ ལོ་ཀ་སྨིཾ.

‘‘བྷོ་གེ ལ་དྡྷཱ ས་ཧ་དྷ་མྨེ་ན ཡ་སཾ ལ་དྡྷཱ ས་ཧ ཉཱ་ཏཱི་ཧི ས་ཧ ཨུ་པ་ཛ྄ཛྷཱ་ཡེ་ཧི ཙི་རཾ ཛཱི་ཝི་ཏྭཱ དཱི་གྷ་མཱ་ཡུཾ པཱ་ལེ་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫཱ་མཱི་ཏི, ཨ་ཡཾ ཙ་ཏུ་ཏྠོ དྷ་མྨོ ཨི་ཊྛོ ཀ་ནྟོ མ་ནཱ་པོ དུ་ལླ་བྷོ ལོ་ཀ་སྨིཾ. ཨི་མེ ཁོ, ག་ཧ་པ་ཏི, ཙ་ཏྟཱ་རོ དྷ་མྨཱ ཨི་ཊྛཱ ཀ་ནྟཱ མ་ནཱ་པཱ དུ་ལླ་བྷཱ ལོ་ཀ་སྨིཾ.

‘‘ཨི་མེ་སཾ ཁོ, ག་ཧ་པ་ཏི, ཙ་ཏུ་ནྣཾ དྷ་མྨཱ་ནཾ ཨི་ཊྛཱ་ནཾ ཀ་ནྟཱ་ནཾ མ་ནཱ་པཱ་ནཾ དུ་ལླ་བྷཱ་ནཾ ལོ་ཀ་སྨིཾ ཙ་ཏྟཱ་རོ དྷ་མྨཱ པ་ཊི་ལཱ་བྷཱ་ཡ སཾ་ཝ་ཏྟ་ནྟི. ཀ་ཏ་མེ ཙ་ཏྟཱ་རོ? ས་དྡྷཱ་ས་མྤ་དཱ, སཱི་ལ་ས་མྤ་དཱ, ཙཱ་ག་ས་མྤ་དཱ, པ་ཉྙཱ་ས་མྤ་དཱ.

‘‘ཀ་ཏ་མཱ ཙ, ག་ཧ་པ་ཏི, ས་དྡྷཱ་ས་མྤ་དཱ? ཨི་དྷ, ག་ཧ་པ་ཏི, ཨ་རི་ཡ་སཱ་ཝ་ཀོ ས་དྡྷོ ཧོ་ཏི, ས་དྡ་ཧ་ཏི ཏ་ཐཱ་ག་ཏ་སྶ བོ་དྷིཾ – ‘ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི, ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ’ཏི. ཨ་ཡཾ ཝུ་ཙྩ་ཏི, ག་ཧ་པ་ཏི, ས་དྡྷཱ་ས་མྤ་དཱ.

‘‘ཀ་ཏ་མཱ ཙ, ག་ཧ་པ་ཏི, སཱི་ལ་ས་མྤ་དཱ? ཨི་དྷ, ག་ཧ་པ་ཏི, ཨ་རི་ཡ་སཱ་ཝ་ཀོ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི…པེ… སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ པ་ཊི་ཝི་ར་ཏོ ཧོ་ཏི. ཨ་ཡཾ ཝུ་ཙྩ་ཏི, ག་ཧ་པ་ཏི, སཱི་ལ་ས་མྤ་དཱ.

‘‘ཀ་ཏ་མཱ ཙ, ག་ཧ་པ་ཏི, ཙཱ་ག་ས་མྤ་དཱ? ཨི་དྷ, ག་ཧ་པ་ཏི, ཨ་རི་ཡ་སཱ་ཝ་ཀོ ཝི་ག་ཏ་མ་ལ་མ་ཙྪེ་རེ་ན ཙེ་ཏ་སཱ ཨ་གཱ་རཾ ཨ་ཛ྄ཛྷཱ་ཝ་ས་ཏི མུ་ཏྟ་ཙཱ་གོ པ་ཡ་ཏ་པཱ་ཎི ཝོ་ས་གྒ་ར་ཏོ ཡཱ་ཙ་ཡོ་གོ དཱ་ན་སཾ་ཝི་བྷཱ་ག་ར་ཏོ. ཨ་ཡཾ ཝུ་ཙྩ་ཏི, ག་ཧ་པ་ཏི, ཙཱ་ག་ས་མྤ་དཱ.

‘‘ཀ་ཏ་མཱ ཙ, ག་ཧ་པ་ཏི, པ་ཉྙཱ་ས་མྤ་དཱ? ཨ་བྷི་ཛ྄ཛྷཱ་ཝི་ས་མ་ལོ་བྷཱ་བྷི་བྷཱུ་ཏེ་ན, ག་ཧ་པ་ཏི, ཙེ་ཏ་སཱ ཝི་ཧ་ར་ནྟོ ཨ་ཀི་ཙྩཾ ཀ་རོ་ཏི, ཀི་ཙྩཾ ཨ་པ་རཱ་དྷེ་ཏི. ཨ་ཀི་ཙྩཾ ཀ་རོ་ནྟོ ཀི་ཙྩཾ ཨ་པ་རཱ་དྷེ་ནྟོ ཡ་སཱ ཙ སུ་ཁཱ ཙ དྷཾ་ས་ཏི. བྱཱ་པཱ་དཱ་བྷི་བྷཱུ་ཏེ་ན, ག་ཧ་པ་ཏི, ཙེ་ཏ་སཱ ཝི་ཧ་ར་ནྟོ ཨ་ཀི་ཙྩཾ ཀ་རོ་ཏི, ཀི་ཙྩཾ ཨ་པ་རཱ་དྷེ་ཏི. ཨ་ཀི་ཙྩཾ ཀ་རོ་ནྟོ ཀི་ཙྩཾ ཨ་པ་རཱ་དྷེ་ནྟོ ཡ་སཱ ཙ སུ་ཁཱ ཙ དྷཾ་ས་ཏི. ཐི་ན་མི་དྡྷཱ་བྷི་བྷཱུ་ཏེ་ན, ག་ཧ་པ་ཏི, ཙེ་ཏ་སཱ ཝི་ཧ་ར་ནྟོ ཨ་ཀི་ཙྩཾ ཀ་རོ་ཏི ཀི་ཙྩཾ ཨ་པ་རཱ་དྷེ་ཏི. ཨ་ཀི་ཙྩཾ ཀ་རོ་ནྟོ ཀི་ཙྩཾ ཨ་པ་རཱ་དྷེ་ནྟོ ཡ་སཱ ཙ སུ་ཁཱ ཙ དྷཾ་ས་ཏི. ཨུ་དྡྷ་ཙྩ་ཀུ་ཀྐུ་ཙྩཱ་བྷི་བྷཱུ་ཏེ་ན, ག་ཧ་པ་ཏི, ཙེ་ཏ་སཱ ཝི་ཧ་ར་ནྟོ ཨ་ཀི་ཙྩཾ ཀ་རོ་ཏི, ཀི་ཙྩཾ ཨ་པ་རཱ་དྷེ་ཏི. ཨ་ཀི་ཙྩཾ ཀ་རོ་ནྟོ ཀི་ཙྩཾ ཨ་པ་རཱ་དྷེ་ནྟོ ཡ་སཱ ཙ སུ་ཁཱ ཙ དྷཾ་ས་ཏི. ཝི་ཙི་ཀི་ཙྪཱ་བྷི་བྷཱུ་ཏེ་ན, ག་ཧ་པ་ཏི, ཙེ་ཏ་སཱ ཝི་ཧ་ར་ནྟོ ཨ་ཀི་ཙྩཾ ཀ་རོ་ཏི, ཀི་ཙྩཾ ཨ་པ་རཱ་དྷེ་ཏི. ཨ་ཀི་ཙྩཾ ཀ་རོ་ནྟོ ཀི་ཙྩཾ ཨ་པ་རཱ་དྷེ་ནྟོ ཡ་སཱ ཙ སུ་ཁཱ ཙ དྷཾ་ས་ཏི.

‘‘ས ཁོ སོ, ག་ཧ་པ་ཏི, ཨ་རི་ཡ་སཱ་ཝ་ཀོ ཨ་བྷི་ཛ྄ཛྷཱ་ཝི་ས་མ་ལོ་བྷོ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཨ་བྷི་ཛ྄ཛྷཱ་ཝི་ས་མ་ལོ་བྷཾ ཙི་ཏྟ་སྶ ཨུ་པ་ཀྐི་ལེ་སཾ པ་ཛ་ཧ་ཏི. བྱཱ་པཱ་དོ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ བྱཱ་པཱ་དཾ ཙི་ཏྟ་སྶ ཨུ་པ་ཀྐི་ལེ་སཾ པ་ཛ་ཧ་ཏི. ཐི་ན་མི་དྡྷཾ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཐི་ན་མི་དྡྷཾ ཙི་ཏྟ་སྶ ཨུ་པ་ཀྐི་ལེ་སཾ པ་ཛ་ཧ་ཏི. ཨུ་དྡྷ་ཙྩ་ཀུ་ཀྐུ་ཙྩཾ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཨུ་དྡྷ་ཙྩ་ཀུ་ཀྐུ་ཙྩཾ ཙི་ཏྟ་སྶ ཨུ་པ་ཀྐི་ལེ་སཾ པ་ཛ་ཧ་ཏི. ཝི་ཙི་ཀི་ཙྪཱ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཝི་ཙི་ཀི་ཙྪཾ ཙི་ཏྟ་སྶ ཨུ་པ་ཀྐི་ལེ་སཾ པ་ཛ་ཧ་ཏི.

‘‘ཡ་ཏོ ཙ ཁོ, ག་ཧ་པ་ཏི, ཨ་རི་ཡ་སཱ་ཝ་ཀ་སྶ ཨ་བྷི་ཛ྄ཛྷཱ་ཝི་ས་མ་ལོ་བྷོ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཨ་བྷི་ཛ྄ཛྷཱ་ཝི་ས་མ་ལོ་བྷོ ཙི་ཏྟ་སྶ ཨུ་པ་ཀྐི་ལེ་སོ པ་ཧཱི་ནོ ཧོ་ཏི. བྱཱ་པཱ་དོ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ བྱཱ་པཱ་དོ ཙི་ཏྟ་སྶ ཨུ་པ་ཀྐི་ལེ་སོ པ་ཧཱི་ནོ ཧོ་ཏི. ཐི་ན་མི་དྡྷཾ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཐི་ན་མི་དྡྷཾ ཙི་ཏྟ་སྶ ཨུ་པ་ཀྐི་ལེ་སོ པ་ཧཱི་ནོ ཧོ་ཏི. ཨུ་དྡྷ་ཙྩ་ཀུ་ཀྐུ་ཙྩཾ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཨུ་དྡྷ་ཙྩ་ཀུ་ཀྐུ་ཙྩཾ ཙི་ཏྟ་སྶ ཨུ་པ་ཀྐི་ལེ་སོ པ་ཧཱི་ནོ ཧོ་ཏི. ཝི་ཙི་ཀི་ཙྪཱ ཙི་ཏྟ་སྶ ཨུ་པ་ཀྐི་ལེ་སོ་ཏི, ཨི་ཏི ཝི་དི་ཏྭཱ ཝི་ཙི་ཀི་ཙྪཱ ཙི་ཏྟ་སྶ ཨུ་པ་ཀྐི་ལེ་སོ པ་ཧཱི་ནོ ཧོ་ཏི. ཨ་ཡཾ ཝུ་ཙྩ་ཏི, ག་ཧ་པ་ཏི, ཨ་རི་ཡ་སཱ་ཝ་ཀོ མ་ཧཱ་པ་ཉྙོ པུ་ཐུ་པ་ཉྙོ ཨཱ་པཱ་ཏ་ད་སོ [ཨཱ་པཱ་ཐ་ད་སོ (སཱི. སྱཱ. ཀཾ. པཱི.)] པ་ཉྙཱ་ས་མྤ་ནྣོ [ཧཱ་ས་པ་ཉྙོ (ཀ.)]. ཨ་ཡཾ ཝུ་ཙྩ་ཏི, ག་ཧ་པ་ཏི, པ་ཉྙཱ་ས་མྤ་དཱ. ཨི་མེ་སཾ ཁོ, ག་ཧ་པ་ཏི, ཙ་ཏུ་ནྣཾ དྷ་མྨཱ་ནཾ ཨི་ཊྛཱ་ནཾ ཀ་ནྟཱ་ནཾ མ་ནཱ་པཱ་ནཾ དུ་ལླ་བྷཱ་ནཾ ལོ་ཀ་སྨིཾ ཨི་མེ ཙ་ཏྟཱ་རོ དྷ་མྨཱ པ་ཊི་ལཱ་བྷཱ་ཡ སཾ་ཝ་ཏྟ་ནྟི.

‘‘ས ཁོ སོ, ག་ཧ་པ་ཏི, ཨ་རི་ཡ་སཱ་ཝ་ཀོ ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི ཙ་ཏྟཱ་རི པ་ཏྟ་ཀ་མྨཱ་ནི ཀ་ཏྟཱ ཧོ་ཏི. ཀ་ཏ་མཱ་ནི ཙ་ཏྟཱ་རི? ཨི་དྷ ག་ཧ་པ་ཏི, ཨ་རི་ཡ་སཱ་ཝ་ཀོ ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི ཨ་ཏྟཱ་ནཾ སུ་ཁེ་ཏི པཱི་ཎེ་ཏི ས་མྨཱ སུ་ཁཾ པ་རི་ཧ་ར་ཏི. མཱ་ཏཱ་པི་ཏ་རོ སུ་ཁེ་ཏི པཱི་ཎེ་ཏི ས་མྨཱ སུ་ཁཾ པ་རི་ཧ་ར་ཏི. པུ་ཏྟ་དཱ་ར་དཱ་ས་ཀ་མྨ་ཀ་ར་པོ་རི་སེ སུ་ཁེ་ཏི པཱི་ཎེ་ཏི ས་མྨཱ སུ་ཁཾ པ་རི་ཧ་ར་ཏི. མི་ཏྟཱ་མ་ཙྩེ སུ་ཁེ་ཏི པཱི་ཎེ་ཏི ས་མྨཱ སུ་ཁཾ པ་རི་ཧ་ར་ཏི. ཨི་ད་མ་སྶ པ་ཋ་མཾ ཋཱ་ན་ག་ཏཾ ཧོ་ཏི པ་ཏྟ་ག་ཏཾ ཨཱ་ཡ་ཏ་ན་སོ པ་རི་བྷུ་ཏྟཾ.

‘‘པུ་ན ཙ་པ་རཾ, ག་ཧ་པ་ཏི, ཨ་རི་ཡ་སཱ་ཝ་ཀོ ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི ཡཱ ཏཱ ཧོ་ནྟི ཨཱ་པ་དཱ ཨ་གྒི་ཏོ ཝཱ ཨུ་ད་ཀ་ཏོ ཝཱ རཱ་ཛ་ཏོ ཝཱ ཙོ་ར་ཏོ ཝཱ ཨ་པྤི་ཡ་ཏོ ཝཱ དཱ་ཡཱ་ད་ཏོ [ཨ. ནི. ༥.༤༡], ཏ་ཐཱ་རཱུ་པཱ་སུ ཨཱ་པ་དཱ་སུ པ་རི་ཡོ་དྷཱ་ཡ སཾ་ཝ་ཏྟ་ཏི. སོ་ཏྠིཾ ཨ་ཏྟཱ་ནཾ ཀ་རོ་ཏི. ཨི་ད་མ་སྶ དུ་ཏི་ཡཾ ཋཱ་ན་ག་ཏཾ ཧོ་ཏི པ་ཏྟ་ག་ཏཾ ཨཱ་ཡ་ཏ་ན་སོ པ་རི་བྷུ་ཏྟཾ.

‘‘པུ་ན ཙ་པ་རཾ, ག་ཧ་པ་ཏི, ཨ་རི་ཡ་སཱ་ཝ་ཀོ ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི པ་ཉྩ་བ་ལིཾ ཀ་ཏྟཱ ཧོ་ཏི – ཉཱ་ཏི་བ་ལིཾ, ཨ་ཏི་ཐི་བ་ལིཾ, པུ་བྦ་པེ་ཏ་བ་ལིཾ, རཱ་ཛ་བ་ལིཾ, དེ་ཝ་ཏཱ་བ་ལིཾ. ཨི་ད་མ་སྶ ཏ་ཏི་ཡཾ ཋཱ་ན་ག་ཏཾ ཧོ་ཏི པ་ཏྟ་ག་ཏཾ ཨཱ་ཡ་ཏ་ན་སོ པ་རི་བྷུ་ཏྟཾ.

‘‘པུ་ན ཙ་པ་རཾ, ག་ཧ་པ་ཏི, ཨ་རི་ཡ་སཱ་ཝ་ཀོ ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི ཡེ ཏེ ས་མ་ཎ་བྲཱ་ཧྨ་ཎཱ མ་ད་པྤ་མཱ་དཱ པ་ཊི་ཝི་ར་ཏཱ ཁ་ནྟི་སོ་ར་ཙྩེ ནི་ཝི་ཊྛཱ ཨེ་ཀ་མ་ཏྟཱ་ནཾ ད་མེ་ནྟི, ཨེ་ཀ་མ་ཏྟཱ་ནཾ ས་མེ་ནྟི, ཨེ་ཀ་མ་ཏྟཱ་ནཾ པ་རི་ནི་བྦཱ་པེ་ནྟི, ཏ་ཐཱ་རཱུ་པེ་སུ ས་མ་ཎ་བྲཱ་ཧྨ་ཎེ་སུ ཨུ་དྡྷ་གྒི་ཀཾ ད་ཀྑི་ཎཾ པ་ཏི་ཊྛཱ་པེ་ཏི སོ་ཝ་གྒི་ཀཾ སུ་ཁ་ཝི་པཱ་ཀཾ ས་གྒ་སཾ་ཝ་ཏྟ་ནི་ཀཾ. ཨི་ད་མ་སྶ ཙ་ཏུ་ཏྠཾ ཋཱ་ན་ག་ཏཾ ཧོ་ཏི པ་ཏྟ་ག་ཏཾ ཨཱ་ཡ་ཏ་ན་སོ པ་རི་བྷུ་ཏྟཾ.

‘‘ས ཁོ སོ, ག་ཧ་པ་ཏི, ཨ་རི་ཡ་སཱ་ཝ་ཀོ ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི ཨི་མཱ་ནི ཙ་ཏྟཱ་རི པ་ཏྟ་ཀ་མྨཱ་ནི ཀ་ཏྟཱ ཧོ་ཏི. ཡ་སྶ ཀ་སྶ་ཙི, ག་ཧ་པ་ཏི, ཨ་ཉྙ་ཏྲ ཨི་མེ་ཧི ཙ་ཏཱུ་ཧི པ་ཏྟ་ཀ་མྨེ་ཧི བྷོ་གཱ པ་རི་ཀྑ་ཡཾ ག་ཙྪ་ནྟི, ཨི་མེ ཝུ་ཙྩ་ནྟི, ག་ཧ་པ་ཏི, བྷོ་གཱ ཨ་ཊྛཱ་ན་ག་ཏཱ ཨ་པ་ཏྟ་ག་ཏཱ ཨ་ནཱ་ཡ་ཏ་ན་སོ པ་རི་བྷུ་ཏྟཱ. ཡ་སྶ ཀ་སྶ་ཙི, ག་ཧ་པ་ཏི, ཨི་མེ་ཧི ཙ་ཏཱུ་ཧི པ་ཏྟ་ཀ་མྨེ་ཧི བྷོ་གཱ པ་རི་ཀྑ་ཡཾ ག་ཙྪ་ནྟི, ཨི་མེ ཝུ་ཙྩ་ནྟི, ག་ཧ་པ་ཏི, བྷོ་གཱ ཋཱ་ན་ག་ཏཱ པ་ཏྟ་ག་ཏཱ ཨཱ་ཡ་ཏ་ན་སོ པ་རི་བྷུ་ཏྟཱ’’ཏི.

‘‘བྷུ་ཏྟཱ བྷོ་གཱ བྷ་ཏཱ བྷ་ཙྩཱ [ག་ཏཱ བྷཱུ་ཏཱ (ཀ.) བྷ་ཊཱ བྷ་ཙྩཱ (སྱཱ. ཀཾ.)], ཝི་ཏི་ཎྞཱ ཨཱ་པ་དཱ་སུ མེ;

ཨུ་དྡྷ་གྒཱ ད་ཀྑི་ཎཱ དི་ནྣཱ, ཨ་ཐོ པ་ཉྩ་བ་ལཱི ཀ་ཏཱ;

ཨུ་པ་ཊྛི་ཏཱ སཱི་ལ་ཝ་ནྟོ, ས་ཉྙ་ཏཱ བྲ་ཧྨ་ཙཱ་ར་ཡོ.

‘‘ཡ་ད་ཏྠཾ བྷོ་གཾ ཨི་ཙྪེ་ཡྻ, པ་ཎྜི་ཏོ གྷ་ར་མཱ་ཝ་སཾ;

སོ མེ ཨ་ཏྠོ ཨ་ནུ་པྤ་ཏྟོ, ཀ་ཏཾ ཨ་ན་ནུ་ཏཱ་པི་ཡཾ.

‘‘ཨེ་ཏཾ [ཨེ་ཝཾ (ཀ.)] ཨ་ནུ་སྶ་རཾ མ་ཙྩོ, ཨ་རི་ཡ་དྷ་མྨེ ཋི་ཏོ ན་རོ;

ཨི་དྷེ་ཝ ནཾ པ་སཾ་ས་ནྟི, པེ་ཙྩ ས་གྒེ པ་མོ་ད་ཏཱི’’ཏི. པ་ཋ་མཾ;

༢. ཨཱ་ན་ཎྱ་སུ་ཏྟཾ

༦༢. ཨ་ཐ ཁོ ཨ་ནཱ་ཐ་པི་ཎྜི་ཀོ ག་ཧ་པ་ཏི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨ་ནཱ་ཐ་པི་ཎྜི་ཀཾ ག་ཧ་པ་ཏིཾ བྷ་ག་ཝཱ ཨེ་ཏ་ད་ཝོ་ཙ –

‘‘ཙ་ཏྟཱ་རི་མཱ་ནི, ག་ཧ་པ་ཏི, སུ་ཁཱ་ནི ཨ་དྷི་ག་མ་ནཱི་ཡཱ་ནི གི་ཧི་ནཱ ཀཱ་མ་བྷོ་གི་ནཱ ཀཱ་ལེ་ན ཀཱ་ལཾ ས་མ་ཡེ་ན ས་མ་ཡཾ ཨུ་པཱ་དཱ་ཡ. ཀ་ཏ་མཱ་ནི ཙ་ཏྟཱ་རི? ཨ་ཏྠི་སུ་ཁཾ, བྷོ་ག་སུ་ཁཾ, ཨཱ་ན་ཎྱ་སུ་ཁཾ [ཨ་ཎ་ཎ་སུ་ཁཾ (སཱི. སྱཱ. ཀཾ. པཱི.)], ཨ་ན་ཝ་ཛྫ་སུ་ཁཾ.

‘‘ཀ་ཏ་མ་ཉྩ, ག་ཧ་པ་ཏི, ཨ་ཏྠི་སུ་ཁཾ? ཨི་དྷ, ག་ཧ་པ་ཏི, ཀུ་ལ་པུ་ཏྟ་སྶ བྷོ་གཱ ཧོ་ནྟི ཨུ་ཊྛཱ་ན་ཝཱི་རི་ཡཱ་དྷི་ག་ཏཱ བཱ་ཧཱ་བ་ལ་པ་རི་ཙི་ཏཱ སེ་དཱ་ཝ་ཀྑི་ཏྟཱ དྷ་མྨི་ཀཱ དྷ་མྨ་ལ་དྡྷཱ. སོ ‘བྷོ་གཱ མེ ཨ་ཏྠི ཨུ་ཊྛཱ་ན་ཝཱི་རི་ཡཱ་དྷི་ག་ཏཱ བཱ་ཧཱ་བ་ལ་པ་རི་ཙི་ཏཱ སེ་དཱ་ཝ་ཀྑི་ཏྟཱ དྷ་མྨི་ཀཱ དྷ་མྨ་ལ་དྡྷཱ’ཏི ཨ་དྷི་ག་ཙྪ་ཏི སུ་ཁཾ, ཨ་དྷི་ག་ཙྪ་ཏི སོ་མ་ན་སྶཾ. ཨི་དཾ ཝུ་ཙྩ་ཏི, ག་ཧ་པ་ཏི, ཨ་ཏྠི་སུ་ཁཾ.

‘‘ཀ་ཏ་མ་ཉྩ, ག་ཧ་པ་ཏི, བྷོ་ག་སུ་ཁཾ? ཨི་དྷ, ག་ཧ་པ་ཏི, ཀུ་ལ་པུ་ཏྟོ ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི པ་རི་བྷུ་ཉྫ་ཏི པུ་ཉྙཱ་ནི ཙ ཀ་རོ་ཏི. སོ ‘ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧི བྷོ་གེ་ཧི བཱ་ཧཱ་བ་ལ་པ་རི་ཙི་ཏེ་ཧི སེ་དཱ་ཝ་ཀྑི་ཏྟེ་ཧི དྷ་མྨི་ཀེ་ཧི དྷ་མྨ་ལ་དྡྷེ་ཧི པ་རི་བྷུ་ཉྫཱ་མི པུ་ཉྙཱ་ནི ཙ ཀ་རོ་མཱི’ཏི ཨ་དྷི་ག་ཙྪ་ཏི སུ་ཁཾ, ཨ་དྷི་ག་ཙྪ་ཏི སོ་མ་ན་སྶཾ. ཨི་དཾ ཝུ་ཙྩ་ཏི, ག་ཧ་པ་ཏི, བྷོ་ག་སུ་ཁཾ.

‘‘ཀ་ཏ་མ་ཉྩ, ག་ཧ་པ་ཏི, ཨཱ་ན་ཎྱ་སུ་ཁཾ? ཨི་དྷ, ག་ཧ་པ་ཏི, ཀུ་ལ་པུ་ཏྟོ ན ཀ་སྶ་ཙི ཀི་ཉྩི དྷཱ་རེ་ཏི ཨ་པྤཾ ཝཱ བ་ཧུཾ ཝཱ. སོ ‘ན ཀ་སྶ་ཙི ཀི་ཉྩི དྷཱ་རེ་མི [ཀི་ཉྩི ཝཱ དེ་ཏི (ཀ.)] ཨ་པྤཾ ཝཱ བ་ཧུཾ ཝཱ’ཏི ཨ་དྷི་ག་ཙྪ་ཏི སུ་ཁཾ, ཨ་དྷི་ག་ཙྪ་ཏི སོ་མ་ན་སྶཾ. ཨི་དཾ ཝུ་ཙྩ་ཏི, ག་ཧ་པ་ཏི, ཨཱ་ན་ཎྱ་སུ་ཁཾ.

‘‘ཀ་ཏ་མ་ཉྩ, ག་ཧ་པ་ཏི, ཨ་ན་ཝ་ཛྫ་སུ་ཁཾ? ཨི་དྷ, ག་ཧ་པ་ཏི, ཨ་རི་ཡ་སཱ་ཝ་ཀོ ཨ་ན་ཝ་ཛྫེ་ན ཀཱ་ཡ་ཀ་མྨེ་ན ས་མ་ནྣཱ་ག་ཏོ ཧོ་ཏི, ཨ་ན་ཝ་ཛྫེ་ན ཝ་ཙཱི་ཀ་མྨེ་ན ས་མ་ནྣཱ་ག་ཏོ ཧོ་ཏི, ཨ་ན་ཝ་ཛྫེ་ན མ་ནོ་ཀ་མྨེ་ན ས་མ་ནྣཱ་ག་ཏོ ཧོ་ཏི. སོ ‘ཨ་ན་ཝ་ཛྫེ་ན་མྷི ཀཱ་ཡ་ཀ་མྨེ་ན ས་མ་ནྣཱ་ག་ཏོ, ཨ་ན་ཝ་ཛྫེ་ན ཝ་ཙཱི་ཀ་མྨེ་ན ས་མ་ནྣཱ་ག་ཏོ, ཨ་ན་ཝ་ཛྫེ་ན མ་ནོ་ཀ་མྨེ་ན ས་མ་ནྣཱ་ག་ཏོ’ཏི ཨ་དྷི་ག་ཙྪ་ཏི སུ་ཁཾ, ཨ་དྷི་ག་ཙྪ་ཏི སོ་མ་ན་སྶཾ. ཨི་དཾ ཝུ་ཙྩ་ཏི, ག་ཧ་པ་ཏི, ཨ་ན་ཝ་ཛྫ་སུ་ཁཾ. ཨི་མཱ་ནི ཁོ, ག་ཧ་པ་ཏི, ཙ་ཏྟཱ་རི སུ་ཁཱ་ནི ཨ་དྷི་ག་མ་ནཱི་ཡཱ་ནི གི་ཧི་ནཱ ཀཱ་མ་བྷོ་གི་ནཱ ཀཱ་ལེ་ན ཀཱ་ལཾ ས་མ་ཡེ་ན ས་མ་ཡཾ ཨུ་པཱ་དཱ་ཡཱ’’ཏི.

‘‘ཨཱ་ན་ཎྱ་སུ་ཁཾ ཉ་ཏྭཱ་ན, ཨ་ཐོ ཨ་ཏྠི་སུ་ཁཾ པ་རཾ;

བྷུ་ཉྫཾ བྷོ་ག་སུ་ཁཾ མ་ཙྩོ, ཏ་ཏོ པ་ཉྙཱ ཝི་པ་སྶ་ཏི.

‘‘ཝི་པ་སྶ་མཱ་ནོ ཛཱ་ནཱ་ཏི, ཨུ་བྷོ བྷོ་གེ སུ་མེ་དྷ་སོ;

ཨ་ན་ཝ་ཛྫ་སུ་ཁ་སྶེ་ཏཾ, ཀ་ལཾ ནཱ་གྒྷ་ཏི སོ་ལ༹་སི’’ནྟི. དུ་ཏི་ཡཾ;

༣. བྲ་ཧྨ་སུ་ཏྟཾ

༦༣. ‘‘ས་བྲ་ཧྨ་ཀཱ་ནི, བྷི་ཀྑ་ཝེ [ཨི་ཏི་ཝུ. ༡༠༦], ཏཱ་ནི ཀུ་ལཱ་ནི ཡེ་སཾ པུ་ཏྟཱ་ནཾ མཱ་ཏཱ་པི་ཏ་རོ ཨ་ཛ྄ཛྷཱ་གཱ་རེ པཱུ་ཛི་ཏཱ ཧོ་ནྟི. ས་པུ་བྦཱ་ཙ་རི་ཡ་ཀཱ་ནི, བྷི་ཀྑ་ཝེ, ཏཱ་ནི ཀུ་ལཱ་ནི, ཡེ་སཾ པུ་ཏྟཱ་ནཾ མཱ་ཏཱ་པི་ཏ་རོ ཨ་ཛ྄ཛྷཱ་གཱ་རེ པཱུ་ཛི་ཏཱ ཧོ་ནྟི. ས་པུ་བྦ་དེ་ཝ་ཏཱ་ནི [ས་པུ་བྦ་དེ་ཝཱ་ནི (སྱཱ. ཀཾ.)], བྷི་ཀྑ་ཝེ, ཏཱ་ནི ཀུ་ལཱ་ནི ཡེ་སཾ པུ་ཏྟཱ་ནཾ མཱ་ཏཱ་པི་ཏ་རོ ཨ་ཛ྄ཛྷཱ་གཱ་རེ པཱུ་ཛི་ཏཱ ཧོ་ནྟི. སཱ་ཧུ་ནེ་ཡྻ་ཀཱ་ནི, བྷི་ཀྑ་ཝེ, ཏཱ་ནི ཀུ་ལཱ་ནི ཡེ་སཾ པུ་ཏྟཱ་ནཾ མཱ་ཏཱ་པི་ཏ་རོ ཨ་ཛ྄ཛྷཱ་གཱ་རེ པཱུ་ཛི་ཏཱ ཧོ་ནྟི.

‘‘བྲ་ཧྨཱ་ཏི, བྷི་ཀྑ་ཝེ, མཱ་ཏཱ་པི་ཏཱུ་ནཾ [མཱ་ཏཱ་པི་ཏུ་ནྣཾ (སཱི. པཱི.)] ཨེ་ཏཾ ཨ་དྷི་ཝ་ཙ་ནཾ. པུ་བྦཱ་ཙ་རི་ཡཱ་ཏི, བྷི་ཀྑ་ཝེ, མཱ་ཏཱ་པི་ཏཱུ་ནཾ ཨེ་ཏཾ ཨ་དྷི་ཝ་ཙ་ནཾ. པུ་བྦ་དེ་ཝ་ཏཱ་ཏི [པུ་བྦ་དེ་ཝཱ་ཏི (སཱི. སྱཱ. ཀཾ.)], བྷི་ཀྑ་ཝེ, མཱ་ཏཱ་པི་ཏཱུ་ནཾ ཨེ་ཏཾ ཨ་དྷི་ཝ་ཙ་ནཾ. ཨཱ་ཧུ་ནེ་ཡྻཱ་ཏི, བྷི་ཀྑ་ཝེ, མཱ་ཏཱ་པི་ཏཱུ་ནཾ ཨེ་ཏཾ ཨ་དྷི་ཝ་ཙ་ནཾ. ཏཾ ཀི་སྶ ཧེ་ཏུ? བ་ཧུ་ཀཱ་རཱ, བྷི་ཀྑ་ཝེ, མཱ་ཏཱ་པི་ཏ་རོ, པུ་ཏྟཱ་ནཾ ཨཱ་པཱ་ད་ཀཱ པོ་ས་ཀཱ ཨི་མ་སྶ ལོ་ཀ་སྶ ད་སྶེ་ཏཱ་རོ’’ཏི.

‘‘བྲ་ཧྨཱ་ཏི མཱ་ཏཱ་པི་ཏ་རོ, པུ་བྦཱ་ཙ་རི་ཡཱ་ཏི ཝུ་ཙྩ་རེ;

ཨཱ་ཧུ་ནེ་ཡྻཱ ཙ པུ་ཏྟཱ་ནཾ, པ་ཛཱ་ཡ ཨ་ནུ་ཀ་མྤ་ཀཱ.

‘‘ཏ་སྨཱ ཧི ནེ ན་མ་སྶེ་ཡྻ, ས་ཀྐ་རེ་ཡྻ ཙ པ་ཎྜི་ཏོ;

ཨ་ནྣེ་ན ཨ་ཐ པཱ་ནེ་ན, ཝ་ཏྠེ་ན ས་ཡ་ནེ་ན ཙ;

ཨུ་ཙྪཱ་ད་ནེ་ན ནྷཱ་པ་ནེ་ན, པཱ་དཱ་ནཾ དྷོ་ཝ་ནེ་ན ཙ.

‘‘ཏཱ་ཡ ནཾ པཱ་རི་ཙ་རི་ཡཱ་ཡ, མཱ་ཏཱ་པི་ཏཱུ་སུ པ་ཎྜི་ཏཱ;

ཨི་དྷེ་ཝ ནཾ པ་སཾ་ས་ནྟི, པེ་ཙྩ ས་གྒེ པ་མོ་ད་ཏཱི’’ཏི. ཏ་ཏི་ཡཾ;

༤. ནི་ར་ཡ་སུ་ཏྟཾ

༦༤. ‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ ཡ་ཐཱ་བྷ་ཏཾ ནི་ཀྑི་ཏྟོ ཨེ་ཝཾ ནི་ར་ཡེ. ཀ་ཏ་མེ་ཧི ཙ་ཏཱུ་ཧི? པཱ་ཎཱ་ཏི་པཱ་ཏཱི ཧོ་ཏི, ཨ་དི་ནྣཱ་དཱ་ཡཱི ཧོ་ཏི, ཀཱ་མེ་སུ་མི་ཙྪཱ་ཙཱ་རཱི ཧོ་ཏི, མུ་སཱ་ཝཱ་དཱི ཧོ་ཏི – ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ ཡ་ཐཱ་བྷ་ཏཾ ནི་ཀྑི་ཏྟོ ཨེ་ཝཾ ནི་ར་ཡེ’’ཏི.

‘‘པཱ་ཎཱ་ཏི་པཱ་ཏོ ཨ་དི་ནྣཱ་དཱ་ནཾ, མུ་སཱ་ཝཱ་དོ ཙ ཝུ་ཙྩ་ཏི;

པ་ར་དཱ་ར་ག་མ་ན་ཉྩཱ་པི, ན་པྤ་སཾ་ས་ནྟི པ་ཎྜི་ཏཱ’’ཏི. ཙ་ཏུ་ཏྠཾ;

༥. རཱུ་པ་སུ་ཏྟཾ

༦༥. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ཙ་ཏྟཱ་རོ? རཱུ་པ་པྤ་མཱ་ཎོ རཱུ་པ་པྤ་ས་ནྣོ, གྷོ་ས་པྤ་མཱ་ཎོ གྷོ་ས་པྤ་ས་ནྣོ, ལཱུ་ཁ་པྤ་མཱ་ཎོ ལཱུ་ཁ་པྤ་ས་ནྣོ, དྷ་མྨ་པྤ་མཱ་ཎོ དྷ་མྨ་པྤ་ས་ནྣོ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨི’’ནྟི.

‘‘ཡེ ཙ རཱུ་པེ པ་མཱ་ཎིཾ་སུ [ཡེ ཙ རཱུ་པེ་ན པཱ་མིཾ་སུ (སཱི. སྱཱ. ཀཾ. པཱི.)], ཡེ ཙ གྷོ་སེ་ན ཨ་ནྭ་གཱུ;

ཚ་ནྡ་རཱ་ག་ཝ་སཱུ་པེ་ཏཱ, ནཱ་བྷི་ཛཱ་ན་ནྟི ཏེ ཛ་ནཱ [ན ཏེ ཛཱ་ན་ནྟི ཏཾ ཛ་ནཱ (སཱི. སྱཱ. ཀཾ. པཱི.)].

‘‘ཨ་ཛ྄ཛྷ་ཏྟ་ཉྩ ན ཛཱ་ནཱ་ཏི, བ་ཧི་དྡྷཱ ཙ ན པ་སྶ་ཏི;

ས་མ་ནྟཱ་ཝ་ར་ཎོ བཱ་ལོ, ས ཝེ གྷོ་སེ་ན ཝུ་ཡ྄ཧ་ཏི.

‘‘ཨ་ཛ྄ཛྷ་ཏྟ་ཉྩ ན ཛཱ་ནཱ་ཏི, བ་ཧི་དྡྷཱ ཙ ཝི་པ་སྶ་ཏི;

བ་ཧི་དྡྷཱ ཕ་ལ་ད་སྶཱ་ཝཱི, སོ་པི གྷོ་སེ་ན ཝུ་ཡ྄ཧ་ཏི.

‘‘ཨ་ཛ྄ཛྷ་ཏྟ་ཉྩ པ་ཛཱ་ནཱ་ཏི, བ་ཧི་དྡྷཱ ཙ ཝི་པ་སྶ་ཏི;

ཝི་ནཱི་ཝ་ར་ཎ་ད་སྶཱ་ཝཱི, ན སོ གྷོ་སེ་ན ཝུ་ཡ྄ཧ་ཏཱི’’ཏི. པ་ཉྩ་མཾ;

༦. ས་རཱ་ག་སུ་ཏྟཾ

༦༦. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ཙ་ཏྟཱ་རོ? ས་རཱ་གོ, ས་དོ་སོ, ས་མོ་ཧོ, ས་མཱ་ནོ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨི’’ནྟི.

‘‘སཱ་ར་ཏྟཱ ར་ཛ་ནཱི་ཡེ་སུ, པི་ཡ་རཱུ་པཱ་བྷི་ན་ནྡི་ནོ;

མོ་ཧེ་ན ཨཱ་ཝུ་ཏཱ [ཨ་དྷ་མཱ (སཱི. སྱཱ. ཀཾ. པཱི.)] ས་ཏྟཱ, བ་དྡྷཱ [བ་ནྡྷཱ (ཀ.)] ཝ་ཌྜྷེ་ནྟི བ་ནྡྷ་ནཾ.

‘‘རཱ་ག་ཛཾ དོ་ས་ཛ་ཉྩཱ་པི, མོ་ཧ་ཛཾ ཙཱ་པ་ཝི་དྡ་སཱུ;

ཀ་རོ་ནྟཱ་ཀུ་ས་ལཾ ཀ་མྨཾ [དྷ་མྨཾ (ཀ.)], ས་ཝི་གྷཱ་ཏཾ དུ་ཁུ་དྲ་ཡཾ.

‘‘ཨ་ཝི་ཛྫཱ་ནི་ཝུ་ཏཱ པོ་སཱ, ཨ་ནྡྷ་བྷཱུ་ཏཱ ཨ་ཙ་ཀྑུ་ཀཱ;

ཡ་ཐཱ དྷ་མྨཱ ཏ་ཐཱ ས་ནྟཱ, ན ཏ་སྶེ་ཝ་ནྟི [ན་སྶེ་ཝ་ནྟི (སཱི.)] མ་ཉྙ་རེ’’ཏི. ཚ་ཊྛཾ;

༧. ཨ་ཧི་རཱ་ཛ་སུ་ཏྟཾ

༦༧. ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན སཱ་ཝ་ཏྠི་ཡཾ ཨ་ཉྙ་ཏ་རོ བྷི་ཀྑུ ཨ་ཧི་ནཱ ད་ཊྛོ ཀཱ་ལ་ངྐ་ཏོ ཧོ་ཏི. ཨ་ཐ ཁོ ས་མྦ་ཧུ་ལཱ བྷི་ཀྑཱུ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཨི་དྷ, བྷ་ནྟེ, སཱ་ཝ་ཏྠི་ཡཾ ཨ་ཉྙ་ཏ་རོ བྷི་ཀྑུ ཨ་ཧི་ནཱ ད་ཊྛོ ཀཱ་ལ་ངྐ་ཏོ’’ཏི.

‘‘ན ཧི ནཱུ་ན [ན ཧ ནཱུ་ན (སཱི. སྱཱ. ཀཾ. པཱི.)] སོ, བྷི་ཀྑ་ཝེ, བྷི་ཀྑུ ཙ་ཏྟཱ་རི ཨ་ཧི་རཱ་ཛ་ཀུ་ལཱ་ནི མེ་ཏྟེ་ན ཙི་ཏྟེ་ན ཕ་རི. ས་ཙེ ཧི སོ, བྷི་ཀྑ་ཝེ, བྷི་ཀྑུ ཙ་ཏྟཱ་རི ཨ་ཧི་རཱ་ཛ་ཀུ་ལཱ་ནི མེ་ཏྟེ་ན ཙི་ཏྟེ་ན ཕ་རེ་ཡྻ, ན ཧི སོ, བྷི་ཀྑ་ཝེ, བྷི་ཀྑུ ཨ་ཧི་ནཱ ད་ཊྛོ ཀཱ་ལ་ངྐ་རེ་ཡྻ.

‘‘ཀ་ཏ་མཱ་ནི ཙ་ཏྟཱ་རི? ཝི་རཱུ་པ་ཀྑཾ ཨ་ཧི་རཱ་ཛ་ཀུ་ལཾ, ཨེ་རཱ་པ་ཐཾ ཨ་ཧི་རཱ་ཛ་ཀུ་ལཾ, ཚ་བྱཱ་པུ་ཏྟཾ ཨ་ཧི་རཱ་ཛ་ཀུ་ལཾ, ཀ་ཎྷཱ་གོ་ཏ་མ་ཀཾ ཨ་ཧི་རཱ་ཛ་ཀུ་ལཾ. ན ཧི ནཱུ་ན སོ, བྷི་ཀྑ་ཝེ, བྷི་ཀྑུ ཨི་མཱ་ནི ཙ་ཏྟཱ་རི ཨ་ཧི་རཱ་ཛ་ཀུ་ལཱ་ནི མེ་ཏྟེ་ན ཙི་ཏྟེ་ན ཕ་རི. ས་ཙེ ཧི སོ, བྷི་ཀྑ་ཝེ, བྷི་ཀྑུ ཨི་མཱ་ནི ཙ་ཏྟཱ་རི ཨ་ཧི་རཱ་ཛ་ཀུ་ལཱ་ནི མེ་ཏྟེ་ན ཙི་ཏྟེ་ན ཕ་རེ་ཡྻ, ན ཧི སོ, བྷི་ཀྑ་ཝེ, བྷི་ཀྑུ ཨ་ཧི་ནཱ ད་ཊྛོ ཀཱ་ལ་ངྐ་རེ་ཡྻ.

‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨི་མཱ་ནི ཙ་ཏྟཱ་རི ཨ་ཧི་རཱ་ཛ་ཀུ་ལཱ་ནི མེ་ཏྟེ་ན ཙི་ཏྟེ་ན ཕ་རི་ཏུཾ ཨ་ཏྟ་གུ་ཏྟི་ཡཱ ཨ་ཏྟ་ར་ཀྑཱ་ཡ ཨ་ཏྟ་པ་རི་ཏྟཱ་ཡཱ’’ཏི.

[ཙཱུ་ལ༹་ཝ. ༢༥༡; ཛཱ. ༡.༢.༡༠༥ པ་སྶི་ཏ་བྦཾ] ‘‘ཝི་རཱུ་པ་ཀྑེ་ཧི མེ མེ་ཏྟཾ, མེ་ཏྟཾ ཨེ་རཱ་པ་ཐེ་ཧི མེ;

ཚ་བྱཱ་པུ་ཏྟེ་ཧི མེ མེ་ཏྟཾ, མེ་ཏྟཾ ཀ་ཎྷཱ་གོ་ཏ་མ་ཀེ་ཧི ཙ.

‘‘ཨ་པཱ་ད་ཀེ་ཧི མེ མེ་ཏྟཾ, མེ་ཏྟཾ དྭི་པཱ་ད་ཀེ་ཧི [དི་པཱ་ད་ཀེ་ཧི (སཱི. སྱཱ. ཀཾ. པཱི.)] མེ;

ཙ་ཏུ་པྤ་དེ་ཧི མེ མེ་ཏྟཾ, མེ་ཏྟཾ བ་ཧུ་པྤ་དེ་ཧི མེ.

‘‘མཱ མཾ ཨ་པཱ་ད་ཀོ ཧིཾ་སི, མཱ མཾ ཧིཾ་སི དྭི་པཱ་ད་ཀོ [དི་པཱ་ད་ཀོ (སཱི. སྱཱ. ཀཾ. པཱི.)];

མཱ མཾ ཙ་ཏུ་པྤ་དོ ཧིཾ་སི, མཱ མཾ ཧིཾ་སི བ་ཧུ་པྤ་དོ.

‘‘ས་བྦེ ས་ཏྟཱ ས་བྦེ པཱ་ཎཱ, ས་བྦེ བྷཱུ་ཏཱ ཙ ཀེ་ཝ་ལཱ;

ས་བྦེ བྷ་དྲཱ་ནི པ་སྶ་ནྟུ, མཱ ཀ་ཉྩི [ཀི་ཉྩི (སྱཱ. ཀཾ. ཀ.)] པཱ་པ་མཱ་ག་མཱ.

‘‘ཨ་པྤ་མཱ་ཎོ བུ་དྡྷོ, ཨ་པྤ་མཱ་ཎོ དྷ་མྨོ;

ཨ་པྤ་མཱ་ཎོ ས་ངྒྷོ, པ་མཱ་ཎ་ཝ་ནྟཱ་ནི ས་རཱི་ས་པཱ་ནི [སི་རིཾ་ས་པཱ་ནི (སཱི. སྱཱ. ཀཾ. པཱི.)].

‘‘ཨ་ཧི་ཝི་ཙྪི་ཀཱ ས་ཏ་པ་དཱི, ཨུ་ཎྞ་ནཱ་བྷཱི ས་ར་བཱུ མཱུ་སི་ཀཱ;

ཀ་ཏཱ མེ ར་ཀྑཱ ཀ་ཏཱ མེ པ་རི་ཏྟཱ [ཀ་ཏཾ མེ པ་རི་ཏྟཾ (?)], པ་ཊི་ཀྐ་མ་ནྟུ བྷཱུ་ཏཱ་ནི;

སོ་ཧཾ ན་མོ བྷ་ག་ཝ་ཏོ, ན་མོ ས་ཏྟ་ནྣཾ ས་མྨཱ་ས་མྦུ་དྡྷཱ་ན’’ནྟི. ས་ཏྟ་མཾ;

༨. དེ་ཝ་ད་ཏྟ་སུ་ཏྟཾ

༦༨. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ ཨ་ཙི་ར་པ་ཀྐ་ནྟེ དེ་ཝ་ད་ཏྟེ. ཏ་ཏྲ ཁོ བྷ་ག་ཝཱ དེ་ཝ་ད་ཏྟཾ ཨཱ་ར་བྦྷ བྷི་ཀྑཱུ ཨཱ་མ་ནྟེ་སི – ‘‘ཨ་ཏྟ་ཝ་དྷཱ་ཡ, བྷི་ཀྑ་ཝེ [ཙཱུ་ལ༹་ཝ. ༢༥༢; སཾ. ནི. ༢.༡༨༤], དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི. པ་རཱ་བྷ་ཝཱ་ཡ, བྷི་ཀྑ་ཝེ, དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི.

‘‘སེ་ཡྻ་ཐཱ་པི, བྷི་ཀྑ་ཝེ, ཀ་ད་ལཱི ཨ་ཏྟ་ཝ་དྷཱ་ཡ ཕ་ལཾ དེ་ཏི, པ་རཱ་བྷ་ཝཱ་ཡ ཕ་ལཾ དེ་ཏི; ཨེ་ཝ་མེ་ཝཾ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི.

‘‘སེ་ཡྻ་ཐཱ་པི, བྷི་ཀྑ་ཝེ, ཝེ་ལུ༹ ཨ་ཏྟ་ཝ་དྷཱ་ཡ ཕ་ལཾ དེ་ཏི, པ་རཱ་བྷ་ཝཱ་ཡ ཕ་ལཾ དེ་ཏི; ཨེ་ཝ་མེ་ཝཾ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི.

‘‘སེ་ཡྻ་ཐཱ་པི, བྷི་ཀྑ་ཝེ, ན་ལོ༹ ཨ་ཏྟ་ཝ་དྷཱ་ཡ ཕ་ལཾ དེ་ཏི, པ་རཱ་བྷ་ཝཱ་ཡ ཕ་ལཾ དེ་ཏི; ཨེ་ཝ་མེ་ཝཾ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི.

‘‘སེ་ཡྻ་ཐཱ་པི, བྷི་ཀྑ་ཝེ, ཨ་སྶ་ཏ་རཱི ཨ་ཏྟ་ཝ་དྷཱ་ཡ ག་བྦྷཾ ག་ཎྷཱ་ཏི, པ་རཱ་བྷ་ཝཱ་ཡ ག་བྦྷཾ ག་ཎྷཱ་ཏི; ཨེ་ཝ་མེ་ཝཾ ཁོ, བྷི་ཀྑ་ཝེ, ཨ་ཏྟ་ཝ་དྷཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དི, པ་རཱ་བྷ་ཝཱ་ཡ དེ་ཝ་ད་ཏྟ་སྶ ལཱ་བྷ་ས་ཀྐཱ་ར་སི་ལོ་ཀོ ཨུ་ད་པཱ་དཱི’’ཏི.

‘‘ཕ་ལཾ ཝེ ཀ་ད་ལིཾ ཧ་ནྟི, ཕ་ལཾ ཝེ་ལུ༹ཾ ཕ་ལཾ ན་ལ༹ཾ;

ས་ཀྐཱ་རོ ཀཱ་པུ་རི་སཾ ཧ་ནྟི, ག་བྦྷོ ཨ་སྶ་ཏ་རིཾ ཡ་ཐཱ’’ཏི [ཙཱུ་ལ༹་ཝ. ༣༣༥; སཾ. ནི. ༡.༡༨༣; ༢.༡༨༤; ནེ་ཏྟི. ༩༠]. ཨ་ཊྛ་མཾ;

༩. པ་དྷཱ་ན་སུ་ཏྟཾ

༦༩. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, པ་དྷཱ་ནཱ་ནི. ཀ་ཏ་མཱ་ནི ཙ་ཏྟཱ་རི? སཾ་ཝ་ར་པྤ་དྷཱ་ནཾ, པ་ཧཱ་ན་པྤ་དྷཱ་ནཾ, བྷཱ་ཝ་ནཱ་པྤ་དྷཱ་ནཾ, ཨ་ནུ་ར་ཀྑ་ཎཱ་པྤ་དྷཱ་ནཾ. ཀ་ཏ་མ་ཉྩ, བྷི་ཀྑ་ཝེ, སཾ་ཝ་ར་པྤ་དྷཱ་ནཾ? ཨི་དྷ, བྷི་ཀྑ་ཝེ, བྷི་ཀྑུ ཨ་ནུ་པྤ་ནྣཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨ་ནུ་པྤཱ་དཱ་ཡ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, སཾ་ཝ་ར་པྤ་དྷཱ་ནཾ.

‘‘ཀ་ཏ་མ་ཉྩ, བྷི་ཀྑ་ཝེ, པ་ཧཱ་ན་པྤ་དྷཱ་ནཾ? ཨི་དྷ, བྷི་ཀྑ་ཝེ, བྷི་ཀྑུ ཨུ་པྤ་ནྣཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ པ་ཧཱ་ནཱ་ཡ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, པ་ཧཱ་ན་པྤ་དྷཱ་ནཾ.

‘‘ཀ་ཏ་མ་ཉྩ, བྷི་ཀྑ་ཝེ, བྷཱ་ཝ་ནཱ་པྤ་དྷཱ་ནཾ? ཨི་དྷ, བྷི་ཀྑ་ཝེ, བྷི་ཀྑུ ཨ་ནུ་པྤ་ནྣཱ་ནཾ ཀུ་ས་ལཱ་ནཾ དྷ་མྨཱ་ནཾ ཨུ་པྤཱ་དཱ་ཡ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, བྷཱ་ཝ་ནཱ་པྤ་དྷཱ་ནཾ.

‘‘ཀ་ཏ་མ་ཉྩ, བྷི་ཀྑ་ཝེ, ཨ་ནུ་ར་ཀྑ་ཎཱ་པྤ་དྷཱ་ནཾ? ཨི་དྷ, བྷི་ཀྑ་ཝེ, བྷི་ཀྑུ ཨུ་པྤ་ནྣཱ་ནཾ ཀུ་ས་ལཱ་ནཾ དྷ་མྨཱ་ནཾ ཋི་ཏི་ཡཱ ཨ་ས་མྨོ་སཱ་ཡ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ བྷཱ་ཝ་ནཱ་ཡ པཱ་རི་པཱུ་རི་ཡཱ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, ཨ་ནུ་ར་ཀྑ་ཎཱ་པྤ་དྷཱ་ནཾ. ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི པ་དྷཱ་ནཱ་ནཱི’’ཏི.

‘‘སཾ་ཝ་རོ ཙ པ་ཧཱ་ན་ཉྩ, བྷཱ་ཝ་ནཱ ཨ་ནུ་ར་ཀྑ་ཎཱ;

ཨེ་ཏེ པ་དྷཱ་ནཱ ཙ་ཏྟཱ་རོ, དེ་སི་ཏཱ་དི་ཙྩ་བ་ནྡྷུ་ནཱ;

ཡོ ཧི [ཡེ་ཧི (?)] བྷི་ཀྑུ ཨི་དྷཱ་ཏཱ་པཱི, ཁ་ཡཾ དུ་ཀྑ་སྶ པཱ་པུ་ཎེ’’ཏི. ན་ཝ་མཾ;

༡༠. ཨ་དྷ་མྨི་ཀ་སུ་ཏྟཾ

༧༠. ‘‘ཡ་སྨིཾ, བྷི་ཀྑ་ཝེ, ས་མ་ཡེ རཱ་ཛཱ་ནོ ཨ་དྷ་མྨི་ཀཱ ཧོ་ནྟི, རཱ་ཛཱ་ཡུ་ཏྟཱ་པི ཏ་སྨིཾ ས་མ་ཡེ ཨ་དྷ་མྨི་ཀཱ ཧོ་ནྟི. རཱ་ཛཱ་ཡུ་ཏྟེ་སུ ཨ་དྷ་མྨི་ཀེ་སུ བྲཱ་ཧྨ་ཎ་ག་ཧ་པ་ཏི་ཀཱ་པི ཏ་སྨིཾ ས་མ་ཡེ ཨ་དྷ་མྨི་ཀཱ ཧོ་ནྟི. བྲཱ་ཧྨ་ཎ་ག་ཧ་པ་ཏི་ཀེ་སུ ཨ་དྷ་མྨི་ཀེ་སུ ནེ་ག་མ་ཛཱ་ན་པ་དཱ་པི ཏ་སྨིཾ ས་མ་ཡེ ཨ་དྷ་མྨི་ཀཱ ཧོ་ནྟི. ནེ་ག་མ་ཛཱ་ན་པ་དེ་སུ ཨ་དྷ་མྨི་ཀེ་སུ ཝི་ས་མཾ ཙ་ནྡི་མ་སཱུ་རི་ཡཱ པ་རི་ཝ་ཏྟ་ནྟི. ཝི་ས་མཾ ཙ་ནྡི་མ་སཱུ་རི་ཡེ་སུ པ་རི་ཝ་ཏྟ་ནྟེ་སུ ཝི་ས་མཾ ན་ཀྑ་ཏྟཱ་ནི ཏཱ་ར་ཀ་རཱུ་པཱ་ནི པ་རི་ཝ་ཏྟ་ནྟི. ཝི་ས་མཾ ན་ཀྑ་ཏྟེ་སུ ཏཱ་ར་ཀ་རཱུ་པེ་སུ པ་རི་ཝ་ཏྟ་ནྟེ་སུ ཝི་ས་མཾ ར་ཏྟི་ནྡི་ཝཱ [ར་ཏྟི་དི་ཝཱ (ཀ.)] པ་རི་ཝ་ཏྟ་ནྟི. ཝི་ས་མཾ ར་ཏྟི་ནྡི་ཝེ་སུ པ་རི་ཝ་ཏྟ་ནྟེ་སུ ཝི་ས་མཾ མཱ་ས་དྡྷ་མཱ་སཱ པ་རི་ཝ་ཏྟ་ནྟི. ཝི་ས་མཾ མཱ་ས་དྡྷ་མཱ་སེ་སུ པ་རི་ཝ་ཏྟ་ནྟེ་སུ ཝི་ས་མཾ ཨུ་ཏུ་སཾ་ཝ་ཙྪ་རཱ པ་རི་ཝ་ཏྟ་ནྟི. ཝི་ས་མཾ ཨུ་ཏུ་སཾ་ཝ་ཙྪ་རེ་སུ པ་རི་ཝ་ཏྟ་ནྟེ་སུ ཝི་ས་མཾ ཝཱ་ཏཱ ཝཱ་ཡ་ནྟི ཝི་ས་མཱ ཨ་པ་ཉྫ་སཱ. ཝི་ས་མཾ ཝཱ་ཏེ་སུ ཝཱ་ཡ་ནྟེ་སུ ཝི་ས་མེ་སུ ཨ་པ་ཉྫ་སེ་སུ དེ་ཝ་ཏཱ པ་རི་ཀུ་པི་ཏཱ བྷ་ཝ་ནྟི. དེ་ཝ་ཏཱ་སུ པ་རི་ཀུ་པི་ཏཱ་སུ དེ་ཝོ ན ས་མྨཱ དྷཱ་རཾ ཨ་ནུ་པྤ་ཝེ་ཙྪ་ཏི. དེ་ཝེ ན ས་མྨཱ དྷཱ་རཾ ཨ་ནུ་པྤ་ཝེ་ཙྪ་ནྟེ ཝི་ས་མ་པཱ་ཀཱ་ནི [ཝི་ས་མ་པཱ་ཀཱི་ནི (སཱི. སྱཱ. ཀཾ.), ཝི་ས་མཾ པཱ་ཀཱ་ནི (ཀ.)] ས་སྶཱ་ནི བྷ་ཝ་ནྟི. ཝི་ས་མ་པཱ་ཀཱ་ནི, བྷི་ཀྑ་ཝེ, ས་སྶཱ་ནི མ་ནུ་སྶཱ པ་རི་བྷུ་ཉྫ་ནྟཱ ཨ་པྤཱ་ཡུ་ཀཱ ཧོ་ནྟི དུ་བྦ་ཎྞཱ ཙ བ་ཝ྄ཧཱ་བཱ་དྷཱ [བ་ཧྭཱ་བཱ་དྷཱ (ཀ.)] ཙ.

‘‘ཡ་སྨིཾ, བྷི་ཀྑ་ཝེ, ས་མ་ཡེ རཱ་ཛཱ་ནོ དྷ་མྨི་ཀཱ ཧོ་ནྟི, རཱ་ཛཱ་ཡུ་ཏྟཱ་པི ཏ་སྨིཾ ས་མ་ཡེ དྷ་མྨི་ཀཱ ཧོ་ནྟི. རཱ་ཛཱ་ཡུ་ཏྟེ་སུ དྷ་མྨི་ཀེ་སུ བྲཱ་ཧྨ་ཎ་ག་ཧ་པ་ཏི་ཀཱ་པི ཏ་སྨིཾ ས་མ་ཡེ དྷ་མྨི་ཀཱ ཧོ་ནྟི. བྲཱ་ཧྨ་ཎ་ག་ཧ་པ་ཏི་ཀེ་སུ དྷ་མྨི་ཀེ་སུ ནེ་ག་མ་ཛཱ་ན་པ་དཱ་པི ཏ་སྨིཾ ས་མ་ཡེ དྷ་མྨི་ཀཱ ཧོ་ནྟི. ནེ་ག་མ་ཛཱ་ན་པ་དེ་སུ དྷ་མྨི་ཀེ་སུ ས་མཾ ཙ་ནྡི་མ་སཱུ་རི་ཡཱ པ་རི་ཝ་ཏྟ་ནྟི. ས་མཾ ཙ་ནྡི་མ་སཱུ་རི་ཡེ་སུ པ་རི་ཝ་ཏྟ་ནྟེ་སུ ས་མཾ ན་ཀྑ་ཏྟཱ་ནི ཏཱ་ར་ཀ་རཱུ་པཱ་ནི པ་རི་ཝ་ཏྟ་ནྟི. ས་མཾ ན་ཀྑ་ཏྟེ་སུ ཏཱ་ར་ཀ་རཱུ་པེ་སུ པ་རི་ཝ་ཏྟ་ནྟེ་སུ ས་མཾ ར་ཏྟི་ནྡི་ཝཱ པ་རི་ཝ་ཏྟ་ནྟི. ས་མཾ ར་ཏྟི་ནྡི་ཝེ་སུ པ་རི་ཝ་ཏྟ་ནྟེ་སུ ས་མཾ མཱ་ས་དྡྷ་མཱ་སཱ པ་རི་ཝ་ཏྟ་ནྟི. ས་མཾ མཱ་ས་དྡྷ་མཱ་སེ་སུ པ་རི་ཝ་ཏྟ་ནྟེ་སུ ས་མཾ ཨུ་ཏུ་སཾ་ཝ་ཙྪ་རཱ པ་རི་ཝ་ཏྟ་ནྟི. ས་མཾ ཨུ་ཏུ་སཾ་ཝ་ཙྪ་རེ་སུ པ་རི་ཝ་ཏྟ་ནྟེ་སུ ས་མཾ ཝཱ་ཏཱ ཝཱ་ཡ་ནྟི ས་མཱ པ་ཉྫ་སཱ. ས་མཾ ཝཱ་ཏེ་སུ ཝཱ་ཡ་ནྟེ་སུ ས་མེ་སུ པ་ཉྫ་སེ་སུ དེ་ཝ་ཏཱ ཨ་པ་རི་ཀུ་པི་ཏཱ བྷ་ཝ་ནྟི. དེ་ཝ་ཏཱ་སུ ཨ་པ་རི་ཀུ་པི་ཏཱ་སུ དེ་ཝོ ས་མྨཱ དྷཱ་རཾ ཨ་ནུ་པྤ་ཝེ་ཙྪ་ཏི. དེ་ཝེ ས་མྨཱ དྷཱ་རཾ ཨ་ནུ་པྤ་ཝེ་ཙྪ་ནྟེ ས་མ་པཱ་ཀཱ་ནི ས་སྶཱ་ནི བྷ་ཝ་ནྟི. ས་མ་པཱ་ཀཱ་ནི, བྷི་ཀྑ་ཝེ, ས་སྶཱ་ནི མ་ནུ་སྶཱ པ་རི་བྷུ་ཉྫ་ནྟཱ དཱི་གྷཱ་ཡུ་ཀཱ ཙ ཧོ་ནྟི ཝ་ཎྞ་ཝ་ནྟོ ཙ བ་ལ་ཝ་ནྟོ ཙ ཨ་པྤཱ་བཱ་དྷཱ ཙཱ’’ཏི.

‘‘གུ་ནྣཾ ཙེ ཏ་ར་མཱ་ནཱ་ནཾ, ཛི་མྷཾ ག་ཙྪ་ཏི པུ་ངྒ་ཝོ;

ས་བྦཱ ཏཱ ཛི་མྷཾ ག་ཙྪ་ནྟི, ནེ་ཏྟེ ཛི་མྷཾ ག་ཏེ ས་ཏི.

‘‘ཨེ་ཝ་མེ་ཝཾ མ་ནུ་སྶེ་སུ, ཡོ ཧོ་ཏི སེ་ཊྛ་ས་མྨ་ཏོ;

སོ ཙེ ཨ་དྷ་མྨཾ ཙ་ར་ཏི, པ་གེ་ཝ ཨི་ཏ་རཱ པ་ཛཱ;

ས་བྦཾ ར་ཊྛཾ དུ་ཀྑཾ སེ་ཏི, རཱ་ཛཱ ཙེ ཧོ་ཏི ཨ་དྷ་མྨི་ཀོ.

‘‘གུ་ནྣཾ ཙེ ཏ་ར་མཱ་ནཱ་ནཾ, ཨུ་ཛུཾ ག་ཙྪ་ཏི པུ་ངྒ་ཝོ;

ས་བྦཱ ཏཱ ཨུ་ཛུཾ ག་ཙྪ་ནྟི, ནེ་ཏྟེ ཨུ་ཛུཾ ག་ཏེ ས་ཏི.

‘‘ཨེ་ཝ་མེ་ཝཾ མ་ནུ་སྶེ་སུ, ཡོ ཧོ་ཏི སེ་ཊྛ་ས་མྨ་ཏོ;

སོ ས་ཙེ [སོ ཙེ་ཝ (སཱི. པཱི.), སོ ཙེ (སྱཱ.)] དྷ་མྨཾ ཙ་ར་ཏི, པ་གེ་ཝ ཨི་ཏ་རཱ པ་ཛཱ;

ས་བྦཾ ར་ཊྛཾ སུ་ཁཾ སེ་ཏི, རཱ་ཛཱ ཙེ ཧོ་ཏི དྷ་མྨི་ཀོ’’ཏི. ད་ས་མཾ;

པ་ཏྟ་ཀ་མྨ་ཝ་གྒོ དུ་ཏི་ཡོ.