อปรคาถาสงฺคณิกํ

๑. โจทนาทิปุจฺฉาวิสฺสชฺชนา

๓๕๙. โจทนา กิมตฺถาย, สารณา กิสฺส การณา;

สงฺโฆ กิมตฺถาย, มติกมฺมํ ปน กิสฺส การณา.

โจทนา สารณตฺถาย, นิคฺคหตฺถาย สารณา;

สงฺโฆ ปริคฺคหตฺถาย, มติกมฺมํ ปน ปาฏิเยกฺกํ.

มา โข ตุริโต อภณิ, มา โข จณฺฑิกโต ภณิ;

มา โข ปฏิฆํ ชนยิ, สเจ อนุวิชฺชโก ตุวํ.

มา โข สหสา อภณิ, กถํ วิคฺคาหิกํ อนตฺถสํหิตํ;

สุตฺเต วินเย อนุโลเม, ปญฺญตฺเต อนุโลมิเก.

อนุโยควตฺตํ นิสามย, กุสเลน พุทฺธิมตา กตํ;

สุวุตฺตํ สิกฺขาปทานุโลมิกํ, คตึ น นาเสนฺโต สมฺปรายิกํ;

หิเตสี อนุยุญฺชสฺสุ, กาเลนตฺถูปสํหิตํ.

จุทิตสฺส จ โจทกสฺส จ;

สหสา โวหารํ มา ปธาเรสิ;

โจทโก อาห อาปนฺโนติ;

จุทิตโก อาห อนาปนฺโนติ.

อุโภ อนุกฺขิปนฺโต, ปฏิญฺญานุสนฺธิเตน การเย;

ปฏิญฺญา ลชฺชีสุ กตา, อลชฺชีสุ เอวํ น วิชฺชติ;

พหุมฺปิ อลชฺชี ภาเสยฺย, วตฺตานุสนฺธิเตน [วุตฺตานุสนฺธิเตน (สี. สฺยา. ก.)] การเย.

อลชฺชี กีทิโส โหติ, ปฏิญฺญา ยสฺส น รูหติ;

เอตญฺจ [เอวญฺจ (ก.)] ตาหํ ปุจฺฉามิ, กีทิโส วุจฺจติ อลชฺชี ปุคฺคโล.

สญฺจิจฺจ อาปตฺตึ อาปชฺชติ, อาปตฺตึ ปริคูหติ;

อคติคมนญฺจ คจฺฉติ, เอทิโส วุจฺจติ อลชฺชีปุคฺคโล.

สจฺจํ อหมฺปิ ชานามิ, เอทิโส วุจฺจติ อลชฺชีปุคฺคโล;

อญฺญญฺจ ตาหํ ปุจฺฉามิ, กีทิโส วุจฺจติ ลชฺชีปุคฺคโล.

สญฺจิจฺจ อาปตฺตึ นาปชฺชติ, อาปตฺตึ น ปริคูหติ;

อคติคมนํ น คจฺฉติ, เอทิโส วุจฺจติ ลชฺชีปุคฺคโล.

สจฺจํ อหมฺปิ ชานามิ, เอทิโส วุจฺจติ ลชฺชีปุคฺคโล;

อญฺญญฺจ ตาหํ ปุจฺฉามิ, กีทิโส วุจฺจติ อธมฺมโจทโก.

อกาเล โจเทติ อภูเตน;

ผรุเสน อนตฺถสํหิเตน;

โทสนฺตโร โจเทติ โน เมตฺตาจิตฺโต;

เอทิโส วุจฺจติ อธมฺมโจทโก.

สจฺจํ อหมฺปิ ชานามิ, เอทิโส วุจฺจติ อธมฺมโจทโก;

อญฺญญฺจ ตาหํ ปุจฺฉามิ, กีทิโส วุจฺจติ ธมฺมโจทโก.

กาเลน โจเทติ ภูเตน, สเณฺหน อตฺถสํหิเตน;

เมตฺตาจิตฺโต โจเทติ โน โทสนฺตโร;

เอทิโส วุจฺจติ ธมฺมโจทโก.

สจฺจํ อหมฺปิ ชานามิ, เอทิโส วุจฺจติ ธมฺมโจทโก;

อญฺญญฺจ ตาหํ ปุจฺฉามิ, กีทิโส วุจฺจติ พาลโจทโก.

ปุพฺพาปรํ น ชานาติ, ปุพฺพาปรสฺส อโกวิโท;

อนุสนฺธิวจนปถํ น ชานาติ;

อนุสนฺธิวจนปถสฺส อโกวิโท;

เอทิโส วุจฺจติ พาลโจทโก.

สจฺจํ อหมฺปิ ชานามิ, เอทิโส วุจฺจติ พาลโจทโก;

อญฺญญฺจ ตาหํ ปุจฺฉามิ, กีทิโส วุจฺจติ ปณฺฑิตโจทโก.

ปุพฺพาปรมฺปิ ชานาติ, ปุพฺพาปรสฺส โกวิโท;

อนุสนฺธิวจนปถํ ชานาติ, อนุสนฺธิวจนปถสฺส โกวิโท;

เอทิโส วุจฺจติ ปณฺฑิตโจทโก.

สจฺจํ อหมฺปิ ชานามิ, เอทิโส วุจฺจติ ปณฺฑิตโจทโก;

อญฺญญฺจ ตาหํ ปุจฺฉามิ, โจทนา กินฺติ วุจฺจติ.

สีลวิปตฺติยา โจเทติ, อโถ อาจารทิฏฺฐิยา;

อาชีเวนปิ โจเทติ, โจทนา เตน วุจฺจตีติ.

อปรํ คาถาสงฺคณิกํ นิฏฺฐิตํ.