๑. สตฺตนคเรสุ ปญฺญตฺตสิกฺขาปทํ

๓๓๕. เอกํสํ จีวรํ กตฺวา, ปคฺคณฺหิตฺวาน อญฺชลึ;

อาสีสมานรูโปว [อาสึสมานรูโปว (สี. สฺยา.)], กิสฺส ตฺวํ อิธ มาคโต.

ทฺวีสุ วินเยสุ เย ปญฺญตฺตา;

อุทฺเทสํ อาคจฺฉนฺติ อุโปสเถสุ;

กติ เต สิกฺขาปทา โหนฺติ;

กติสุ นคเรสุ ปญฺญตฺตา.

ภทฺทโก เต อุมฺมงฺโค, โยนิโส ปริปุจฺฉสิ;

ตคฺฆ เต อหมกฺขิสฺสํ, ยถาสิ กุสโล ตถา.

ทฺวีสุ วินเยสุ เย ปญฺญตฺตา;

อุทฺเทสํ อาคจฺฉนฺติ อุโปสเถสุ;

อฑฺฒุฑฺฒสตานิ เต โหนฺติ;

สตฺตสุ นคเรสุ ปญฺญตฺตา.

กตเมสุ สตฺตสุ นคเรสุ ปญฺญตฺตา;

อิงฺฆ เม ตฺวํ พฺยากร นํ [อิงฺฆ เม ตํ พฺยากร (ก.)];

ตํ วจนปถํ [ตว วจนปถํ (สฺยา.)] นิสามยิตฺวา;

ปฏิปชฺเชม หิตาย โน สิยา.

เวสาลิยํ ราชคเห, สาวตฺถิยญฺจ อาฬวิยํ;

โกสมฺพิยญฺจ สกฺเกสุ, ภคฺเคสุ เจว ปญฺญตฺตา.

กติ เวสาลิยํ ปญฺญตฺตา, กติ ราชคเห กตา;

สาวตฺถิยํ กติ โหนฺติ, กติ อาฬวิยํ กตา.

กติ โกสมฺพิยํ ปญฺญตฺตา, กติ สกฺเกสุ วุจฺจนฺติ;

กติ ภคฺเคสุ ปญฺญตฺตา, ตํ เม อกฺขาหิ ปุจฺฉิโต.

ทส เวสาลิยํ ปญฺญตฺตา, เอกวีส ราชคเห กตา;

ฉอูน ตีณิสตานิ, สพฺเพ สาวตฺถิยํ กตา.

ฉ อาฬวิยํ ปญฺญตฺตา, อฏฺฐ โกสมฺพิยํ กตา;

อฏฺฐ สกฺเกสุ วุจฺจนฺติ, ตโย ภคฺเคสุ ปญฺญตฺตา.

เย เวสาลิยํ ปญฺญตฺตา, เต สุโณหิ ยถาตถํ [ยถากถํ (สี. สฺยา. เอวมุปริปิ)];

เมถุนวิคฺคหุตฺตริ, อติเรกญฺจ กาฬกํ.

ภูตํ ปรมฺปรภตฺตํ, ทนฺตโปเนน [ทนฺตโปเณน (ก.)] อเจลโก;

ภิกฺขุนีสุ จ อกฺโกโส, ทเสเต เวสาลิยํ กตา.

เย ราชคเห ปญฺญตฺตา, เต สุโณหิ ยถาตถํ;

อทินฺนาทานํ ราชคเห, เทฺว อนุทฺธํสนา เทฺวปิ จ เภทา.

อนฺตรวาสกํ รูปิยํ สุตฺตํ, อุชฺฌาปเนน จ ปาจิตปิณฺฑํ;

คณโภชนํ วิกาเล จ, จาริตฺตํ นหานํ อูนวีสติ.

จีวรํ ทตฺวา โวสาสนฺติ, เอเต ราชคเห กตา;

คิรคฺคจริยา ตตฺเถว, ฉนฺททาเนน เอกวีสติ.

เย สาวตฺถิยํ ปญฺญตฺตา, เต สุโณหิ ยถาตถํ;

ปาราชิกานิ จตฺตาริ, สงฺฆาทิเสสา ภวนฺติ โสฬส.

อนิยตา จ เทฺว โหนฺติ, นิสฺสคฺคิยา จตุวีสติ;

ฉปญฺญาสสตญฺเจว, ขุทฺทกานิ ปวุจฺจนฺติ.

ทสเยว จ คารยฺหา, เทฺวสตฺตติ จ เสขิยา;

ฉอูน ตีณิสตานิ, สพฺเพ สาวตฺถิยํ กตา.

เย อาฬวิยํ ปญฺญตฺตา, เต สุโณหิ ยถาตถํ;

กุฏิโกสิยเสยฺยา จ, ขณเน คจฺฉ เทวเต;

สปฺปาณกญฺจ สิญฺจนฺติ, ฉ เอเต อาฬวิยํ กตา.

เย โกสมฺพิยํ ปญฺญตฺตา, เต สุโณหิ ยถาตถํ;

มหาวิหาโร โทวจสฺสํ, อญฺญํ ทฺวารํ สุราย จ;

อนาทริยํ สหธมฺโม, ปโยปาเนน อฏฺฐมํ.

เย สกฺเกสุ ปญฺญตฺตา, เต สุโณหิ ยถาตถํ;

เอฬกโลมานิ ปตฺโต จ, โอวาโท เจว เภสชฺชํ.

สูจิ อารญฺญิโก เจว, อฏฺเฐเต [ฉ เอเต (สพฺพตฺถ)] กาปิลวตฺถเว;

อุทกสุทฺธิยา โอวาโท, ภิกฺขุนีสุ ปวุจฺจนฺติ.

เย ภคฺเคสุ ปญฺญตฺตา, เต สุโณหิ ยถาตถํ;

สมาทหิตฺวา วิสิพฺเพนฺติ, สามิเสน สสิตฺถกํ.

ปาราชิกานิ จตฺตาริ, สงฺฆาทิเสสานิ ภวนฺติ;

สตฺต จ นิสฺสคฺคิยานิ, อฏฺฐ ทฺวตฺตึส ขุทฺทกา.

เทฺว คารยฺหา ตโย เสกฺขา, ฉปฺปญฺญาส สิกฺขาปทา;

ฉสุ นคเรสุ ปญฺญตฺตา, พุทฺเธนาทิจฺจพนฺธุนา.

ฉอูน ตีณิสตานิ, สพฺเพ สาวตฺถิยํ กตา;

การุณิเกน พุทฺเธน, โคตเมน ยสสฺสินา.