๓. โจทกสฺสอตฺตฌาปนํ

โกธโน อุปนาหี จ;

จณฺโฑ จ ปริภาสโก;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

อุปกณฺณกํ ชปฺปติ ชิมฺหํ เปกฺขติ;

วีติหรติ กุมฺมคฺคํ ปฏิเสวติ;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

อกาเลน โจเทติ อภูเตน;

ผรุเสน อนตฺถสํหิเตน;

โทสนฺตโร โจเทติ โน เมตฺตาจิตฺโต;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

ธมฺมาธมฺมํ น ชานาติ;

ธมฺมาธมฺมสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

วินยาวินยํ น ชานาติ;

วินยาวินยสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

ภาสิตาภาสิตํ น ชานาติ;

ภาสิตาภาสิตสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

อาจิณฺณานาจิณฺณํ น ชานาติ;

อาจิณฺณานาจิณฺณสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

ปญฺญตฺตาปญฺญตฺตํ น ชานาติ;

ปญฺญตฺตาปญฺญตฺตสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

อาปตฺตานาปตฺตึ น ชานาติ;

อาปตฺตานาปตฺติยา อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

ลหุกครุกํ น ชานาติ;

ลหุกครุกสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

สาวเสสานวเสสํ น ชานาติ;

สาวเสสานวเสสสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

ทุฏฺฐุลฺลาทุฏฺฐุลฺลํ น ชานาติ;

ทุฏฺฐุลฺลาทุฏฺฐุลฺลสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

ปุพฺพาปรํ น ชานาติ;

ปุพฺพาปรสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานํ.

อนุสนฺธิวจนปถํ น ชานาติ;

อนุสนฺธิวจนปถสฺส อโกวิโท;

อนาปตฺติยา อาปตฺตีติ โรเปติ;

ตาทิโส โจทโก ฌาเปติ อตฺตานนฺติ.

โจทนากณฺฑํ นิฏฺฐิตํ.