๒๐๐. ปลิโพธาปลิโพธกถา

๓๒๕. เทฺวเม, ภิกฺขเว, กถินสฺส ปลิโพธา, เทฺว อปลิโพธา. กตเม จ, ภิกฺขเว, เทฺว กถินสฺส ปลิโพธา? อาวาสปลิโพโธ จ จีวรปลิโพโธ จ. กถญฺจ, ภิกฺขเว, อาวาสปลิโพโธ โหติ? อิธ, ภิกฺขเว, ภิกฺขุ วสติ วา ตสฺมึ อาวาเส, สาเปกฺโข วา ปกฺกมติ ‘‘ปจฺเจสฺส’’นฺติ. เอวํ โข, ภิกฺขเว, อาวาสปลิโพโธ โหติ. กถญฺจ, ภิกฺขเว, จีวรปลิโพโธ โหติ? อิธ, ภิกฺขเว, ภิกฺขุโน จีวรํ อกตํ วา โหติ วิปฺปกตํ วา, จีวราสา วา อนุปจฺฉินฺนา. เอวํ โข, ภิกฺขเว, จีวรปลิโพโธ โหติ. อิเม โข, ภิกฺขเว, เทฺว กถินสฺส ปลิโพธา.

กตเม จ, ภิกฺขเว, เทฺว กถินสฺส อปลิโพธา? อาวาสอปลิโพโธ จ จีวรอปลิโพโธ จ. กถญฺจ, ภิกฺขเว, อาวาสอปลิโพโธ โหติ? อิธ, ภิกฺขเว, ภิกฺขุ ปกฺกมติ ตมฺหา อาวาสา จตฺเตน วนฺเตน มุตฺเตน อนเปกฺโข [อนเปกฺเขน (ก.)] ‘‘น ปจฺเจสฺส’’นฺติ. เอวํ โข, ภิกฺขเว, อาวาสอปลิโพโธ โหติ. กถญฺจ, ภิกฺขเว, จีวรอปลิโพโธ โหติ? อิธ, ภิกฺขเว, ภิกฺขุโน จีวรํ กตํ วา โหติ, นฏฺฐํ วา วินฏฺฐํ วา ทฑฺฒํ วา, จีวราสา วา อุปจฺฉินฺนา. เอวํ โข, ภิกฺขเว, จีวรอปลิโพโธ โหติ. อิเม โข, ภิกฺขเว, เทฺว กถินสฺส อปลิโพธาติ.

ปลิโพธาปลิโพธกถา นิฏฺฐิตา.

กถินกฺขนฺธโก นิฏฺฐิโต สตฺตโม.