๑๔๓. วตฺถุฐปนาทิ

๒๓๙. อิธ ปน, ภิกฺขเว, ภิกฺขุ ตทหุ ปวารณาย สงฺฆมชฺเฌ อุทาหเรยฺย – ‘‘สุณาตุ เม, ภนฺเต, สงฺโฆ. อิทํ วตฺถุ ปญฺญายติ, น ปุคฺคโล. ยทิ สงฺฆสฺส ปตฺตกลฺลํ, วตฺถุํ ฐเปตฺวา สงฺโฆ ปวาเรยฺยา’’ติ. โส เอวมสฺส วจนีโย – ‘‘ภควตา โข, อาวุโส, วิสุทฺธานํ ปวารณา ปญฺญตฺตา. สเจ วตฺถุ ปญฺญายติ, น ปุคฺคโล, อิทาเนว นํ วเทหี’’ติ.

อิธ ปน, ภิกฺขเว, ภิกฺขุ ตทหุ ปวารณาย สงฺฆมชฺเฌ อุทาหเรยฺย – ‘‘สุณาตุ เม, ภนฺเต, สงฺโฆ. อยํ ปุคฺคโล ปญฺญายติ, น วตฺถุ. ยทิ สงฺฆสฺส ปตฺตกลฺลํ, ปุคฺคลํ ฐเปตฺวา สงฺโฆ ปวาเรยฺยา’’ติ. โส เอวมสฺส วจนีโย – ‘‘ภควตา โข, อาวุโส, สมคฺคานํ ปวารณา ปญฺญตฺตา. สเจ ปุคฺคโล ปญฺญายติ, น วตฺถุ, อิทาเนว นํ วเทหี’’ติ.

อิธ ปน, ภิกฺขเว, ภิกฺขุ ตทหุ ปวารณาย สงฺฆมชฺเฌ อุทาหเรยฺย – ‘‘สุณาตุ เม, ภนฺเต, สงฺโฆ. อิทํ วตฺถุ จ ปุคฺคโล จ ปญฺญายติ. ยทิ สงฺฆสฺส ปตฺตกลฺลํ, วตฺถุญฺจ ปุคฺคลญฺจ ฐเปตฺวา สงฺโฆ ปวาเรยฺยา’’ติ. โส เอวมสฺส วจนีโย – ‘‘ภควตา โข, อาวุโส, วิสุทฺธานญฺจ สมคฺคานญฺจ ปวารณา ปญฺญตฺตา. สเจ วตฺถุ จ ปุคฺคโล จ ปญฺญายติ, อิทาเนว นํ วเทหี’’ติ.

ปุพฺเพ เจ, ภิกฺขเว, ปวารณาย วตฺถุ ปญฺญายติ, ปจฺฉา ปุคฺคโล, กลฺลํ วจนาย. ปุพฺเพ เจ, ภิกฺขเว, ปวารณาย ปุคฺคโล ปญฺญายติ, ปจฺฉา วตฺถุ, กลฺลํ วจนาย. ปุพฺเพ เจ, ภิกฺขเว, ปวารณาย วตฺถุ จ ปุคฺคโล จ ปญฺญายติ, ตํ เจ กตาย ปวารณาย อุกฺโกเฏติ, อุกฺโกฏนกํ ปาจิตฺติยนฺติ.

วตฺถุฐปนาทิ นิฏฺฐิตา.