๑๓๙. วชฺชนียปุคฺคลสนฺทสฺสนา

๒๓๓. น, ภิกฺขเว, ภิกฺขุนิยา นิสินฺนปริสาย ปวาเรตพฺพํ. โย ปวาเรยฺย, อาปตฺติ ทุกฺกฏสฺส. น, ภิกฺขเว, สิกฺขมานาย…เป… น สามเณรสฺส…เป… น สามเณริยา…เป… น สิกฺขํ ปจฺจกฺขาตกสฺส…เป… น อนฺติมวตฺถุํ อชฺฌาปนฺนกสฺส นิสินฺนปริสาย ปวาเรตพฺพํ. โย ปวาเรยฺย, อาปตฺติ ทุกฺกฏสฺส.

น อาปตฺติยา อทสฺสเน อุกฺขิตฺตกสฺส นิสินฺนปริสาย ปวาเรตพฺพํ. โย ปวาเรยฺย, ยถาธมฺโม กาเรตพฺโพ. น อาปตฺติยา อปฺปฏิกมฺเม อุกฺขิตฺตกสฺส…เป… น ปาปิกาย ทิฏฺฐิยา อปฺปฏินิสฺสคฺเค อุกฺขิตฺตกสฺส นิสินฺนปริสาย ปวาเรตพฺพํ. โย ปวาเรยฺย, ยถาธมฺโม กาเรตพฺโพ.

น ปณฺฑกสฺส นิสินฺนปริสาย ปวาเรตพฺพํ. โย ปวาเรยฺย, อาปตฺติ ทุกฺกฏสฺส. น เถยฺยสํวาสกสฺส…เป… น ติตฺถิยปกฺกนฺตกสฺส…เป… น ติรจฺฉานคตสฺส…เป… น มาตุฆาตกสฺส…เป… น ปิตุฆาตกสฺส…เป… น อรหนฺตฆาตกสฺส…เป… น ภิกฺขุนิทูสกสฺส …เป… น สงฺฆเภทกสฺส…เป… น โลหิตุปฺปาทกสฺส …เป… น อุภโตพฺยญฺชนกสฺส นิสินฺนปริสาย ปวาเรตพฺพํ. โย ปวาเรยฺย, อาปตฺติ ทุกฺกฏสฺส.

น, ภิกฺขเว, ปาริวาสิกปวารณาทาเนน ปวาเรตพฺพํ, อญฺญตฺร อวุฏฺฐิตาย ปริสาย. น จ, ภิกฺขเว, อปฺปวารณาย ปวาเรตพฺพํ, อญฺญตฺร สงฺฆสามคฺคิยาติ.

วชฺชนียปุคฺคลสนฺทสฺสนา นิฏฺฐิตา.

ทุติยภาณวาโร นิฏฺฐิโต.