๑๑๕. วชาทีสุ วสฺสูปคมนํ

๒๐๓. เตน โข ปน สมเยน อญฺญตโร ภิกฺขุ วเช วสฺสํ อุปคนฺตุกาโม โหติ. ภควโต เอตมตฺถํ อาโรเจสุํ. อนุชานามิ, ภิกฺขเว, วเช วสฺสํ อุปคนฺตุนฺติ. วโช วุฏฺฐาสิ. ภควโต เอตมตฺถํ อาโรเจสุํ. อนุชานามิ, ภิกฺขเว, เยน วโช เตน คนฺตุนฺติ.

เตน โข ปน สมเยน อญฺญตโร ภิกฺขุ อุปกฏฺฐาย วสฺสูปนายิกาย สตฺเถน คนฺตุกาโม โหติ. ภควโต เอตมตฺถํ อาโรเจสุํ. อนุชานามิ, ภิกฺขเว, สตฺเถ วสฺสํ อุปคนฺตุนฺติ.

เตน โข ปน สมเยน อญฺญตโร ภิกฺขุ อุปกฏฺฐาย วสฺสูปนายิกาย นาวาย คนฺตุกาโม โหติ. ภควโต เอตมตฺถํ อาโรเจสุํ. อนุชานามิ, ภิกฺขเว, นาวาย วสฺสํ อุปคนฺตุนฺติ.

วชาทีสุ วสฺสูปคมนํ นิฏฺฐิตํ.