๑๐๖. ตสฺสุทฺทานํ

ติตฺถิยา พิมฺพิสาโร จ, สนฺนิปติตุํ ตุณฺหิกา;

ธมฺมํ รโห ปาติโมกฺขํ, เทวสิกํ ตทา สกึ.

ยถาปริสา สมคฺคํ, สามคฺคี มทฺทกุจฺฉิ จ;

สีมา มหตี นทิยา, อนุ เทฺว ขุทฺทกานิ จ.

นวา ราชคเห เจว, สีมา อวิปฺปวาสนา;

สมฺมนฺเน [สมฺมเน (ก.)] ปฐมํ สีมํ, ปจฺฉา สีมํ สมูหเน.

อสมฺมตา คามสีมา, นทิยา สมุทฺเท สเร;

อุทกุกฺเขโป ภินฺทนฺติ, ตเถวชฺโฌตฺถรนฺติ จ.

กติ กมฺมานิ อุทฺเทโส, สวรา อสตีปิ จ;

ธมฺมํ วินยํ ตชฺเชนฺติ, ปุน วินยตชฺชนา.

โจทนา กเต โอกาเส, อธมฺมปฺปฏิกฺโกสนา;

จตุปญฺจปรา อาวิ, สญฺจิจฺจ เจปิ วายเม.

สคหฏฺฐา อนชฺฌิฏฺฐา, โจทนมฺหิ น ชานติ;

สมฺพหุลา น ชานนฺติ, สชฺชุกํ น จ คจฺฉเร.

กติมี กีวติกา ทูเร, อาโรเจตุญฺจ นสฺสริ;

อุกฺลาปํ อาสนํ ทีโป, ทิสา อญฺโญ พหุสฺสุโต.

สชฺชุกํ [สชฺชุวสฺสรุโปสโถ (ก.)] วสฺสุโปสโถ, สุทฺธิกมฺมญฺจ ญาตกา;

คคฺโค จตุตโย เทฺวโก, อาปตฺติสภาคา สริ.

สพฺโพ สงฺโฆ เวมติโก, น ชานนฺติ พหุสฺสุโต;

พหู สมสมา โถกา, ปริสา อวุฏฺฐิตาย จ.

เอกจฺจา วุฏฺฐิตา สพฺพา, ชานนฺติ จ เวมติกา;

กปฺปเตวาติ กุกฺกุจฺจา, ชานํ ปสฺสํ สุณนฺติ จ.

อาวาสิเกน อาคนฺตุ, จาตุปนฺนรโส ปุน;

ปาฏิปโท ปนฺนรโส, ลิงฺคสํวาสกา อุโภ.

ปาริวาสานุโปสโถ, อญฺญตฺร สงฺฆสามคฺคิยา;

เอเต วิภตฺตา อุทฺทานา, วตฺถุวิภูตการณาติ.

อิมสฺมึ ขนฺธเก วตฺถูนิ ฉอสีติ.

อุโปสถกฺขนฺธโก นิฏฺฐิโต.