๑๐๔. คนฺตพฺพวาโร

๑๘๒. คนฺตพฺโพ, ภิกฺขเว, ตทหุโปสเถ สภิกฺขุกา อาวาสา สภิกฺขุโก อาวาโส, ยตฺถสฺสุ ภิกฺขู สมานสํวาสกา, ยํ ชญฺญา – ‘‘สกฺโกมิ อชฺเชว คนฺตุ’’นฺติ. คนฺตพฺโพ, ภิกฺขเว, ตทหุโปสเถ สภิกฺขุกา อาวาสา สภิกฺขุโก อนาวาโส…เป… สภิกฺขุโก อาวาโส วา อนาวาโส วา, ยตฺถสฺสุ ภิกฺขู สมานสํวาสกา, ยํ ชญฺญา – ‘‘สกฺโกมิ อชฺเชว คนฺตุ’’นฺติ.

คนฺตพฺโพ, ภิกฺขเว, ตทหุโปสเถ สภิกฺขุกา อนาวาสา สภิกฺขุโก อาวาโส…เป… สภิกฺขุโก อนาวาโส…เป… สภิกฺขุโก อาวาโส วา อนาวาโส วา, ยตฺถสฺสุ ภิกฺขู สมานสํวาสกา, ยํ ชญฺญา – ‘‘สกฺโกมิ อชฺเชว คนฺตุ’’นฺติ.

คนฺตพฺโพ, ภิกฺขเว, ตทหุโปสเถ สภิกฺขุกา อาวาสา วา อนาวาสา วา สภิกฺขุโก อาวาโส…เป… สภิกฺขุโก อนาวาโส…เป… สภิกฺขุโก อาวาโส วา อนาวาโส วา, ยตฺถสฺสุ ภิกฺขู สมานสํวาสกา, ยํ ชญฺญา – ‘‘สกฺโกมิ อชฺเชว คนฺตุ’’นฺติ.

คนฺตพฺพวาโร นิฏฺฐิโต.