๖๗. ตสฺสุทฺทานํ

๑๓๑. วินยมฺหิ มหตฺเถสุ, เปสลานํ สุขาวเห;

นิคฺคหานญฺจ ปาปิจฺเฉ, ลชฺชีนํ ปคฺคเหสุ จ.

สาสนาธารเณ เจว, สพฺพญฺญุชินโคจเร;

อนญฺญวิสเย เขเม, สุปญฺญตฺเต อสํสเย.

ขนฺธเก วินเย เจว, ปริวาเร จ มาติเก;

ยถาตฺถการี กุสโล, ปฏิปชฺชติ โยนิโส.

โย ควํ น วิชานาติ, น โส รกฺขติ โคคณํ;

เอวํ สีลํ อชานนฺโต, กึ โส รกฺเขยฺย สํวรํ.

ปมุฏฺฐมฺหิ จ สุตฺตนฺเต, อภิธมฺเม จ ตาวเท;

วินเย อวินฏฺฐมฺหิ, ปุน ติฏฺฐติ สาสนํ.

ตสฺมา สงฺคาหณาเหตุํ [สงฺคาหนาเหตุํ (ก.)], อุทฺทานํ อนุปุพฺพโส;

ปวกฺขามิ ยถาญายํ, สุณาถ มม ภาสโต.

วตฺถุ นิทานํ อาปตฺติ, นยา เปยฺยาลเมว จ;

ทุกฺกรํ ตํ อเสเสตุํ, นยโต ตํ วิชานถาติ.

โพธิ ราชายตนญฺจ, อชปาโล สหมฺปติ;

พฺรหฺมา อาฬาโร อุทโก, ภิกฺขุ จ อุปโก อิสิ.

โกณฺฑญฺโญ วปฺโป ภทฺทิโย, มหานาโม จ อสฺสชิ;

ยโส จตฺตาโร ปญฺญาส, สพฺเพ เปเสสิ โส ทิสา.

วตฺถุ มาเรหิ ตึสา จ, อุรุเวลํ ตโย ชฏี;

อคฺยาคารํ มหาราชา, สกฺโก พฺรหฺมา จ เกวลา.

ปํสุกูลํ โปกฺขรณี, สิลา จ กกุโธ สิลา;

ชมฺพุ อมฺโพ จ อามโล, ปาริปุปฺผญฺจ อาหริ.

ผาลิยนฺตุ อุชฺชลนฺตุ, วิชฺฌายนฺตุ จ กสฺสป;

นิมุชฺชนฺติ มุขี เมโฆ, คยา ลฏฺฐิ จ มาคโธ.

อุปติสฺโส โกลิโต จ, อภิญฺญาตา จ ปพฺพชุํ;

ทุนฺนิวตฺถา ปณามนา, กิโส ลูโข จ พฺราหฺมโณ.

อนาจารํ อาจรติ, อุทรํ มาณโว คโณ;

วสฺสํ พาเลหิ ปกฺกนฺโต, ทส วสฺสานิ นิสฺสโย.

น วตฺตนฺติ ปณาเมตุํ, พาลา ปสฺสทฺธิ ปญฺจ ฉ;

โย โส อญฺโญ จ นคฺโค จ, อจฺฉินฺนชฏิลสากิโย.

มคเธสุ ปญฺจาพาธา, เอโก ราชา [ภโฏ โจโร (สฺยา.)] จ องฺคุลิ;

มาคโธ จ อนุญฺญาสิ, การา ลิขิ กสาหโต.

ลกฺขณา อิณา ทาโส จ, ภณฺฑุโก อุปาลิ อหิ;

สทฺธํ กุลํ กณฺฏโก จ, อาหุนฺทริกเมว จ.

วตฺถุมฺหิ ทารโก สิกฺขา, วิหรนฺติ จ กึ นุ โข;

สพฺพํ มุขํ อุปชฺฌาเย, อปลาฬน กณฺฏโก.

ปณฺฑโก เถยฺยปกฺกนฺโต, อหิ จ มาตรี ปิตา;

อรหนฺตภิกฺขุนีเภทา, รุหิเรน จ พฺยญฺชนํ.

อนุปชฺฌายสงฺเฆน, คณปณฺฑกปตฺตโก;

อจีวรํ ตทุภยํ, ยาจิเตนปิ เย ตโย.

หตฺถา ปาทา หตฺถปาทา, กณฺณา นาสา ตทูภยํ;

องฺคุลิอฬกณฺฑรํ, ผณํ ขุชฺชญฺจ วามนํ.

คลคณฺฑี ลกฺขณา เจว, กสา ลิขิตสีปที;

ปาปปริสทูสี จ, กาณํ กุณิ ตเถว จ.

ขญฺชํ ปกฺขหตญฺเจว, สจฺฉินฺนอิริยาปถํ;

ชรานฺธมูคพธิรํ, อนฺธมูคญฺจ ยํ ตหึ.

อนฺธพธิรํ ยํ วุตฺตํ, มูคพธิรเมว จ;

อนฺธมูคพธิรญฺจ, อลชฺชีนญฺจ นิสฺสยํ.

วตฺถพฺพญฺจ ตถาทฺธานํ, ยาจมาเนน ลกฺขณา [เปกฺขนา (สพฺพตฺถ)];

อาคจฺฉตุ วิวทนฺติ, เอกุปชฺฌาเยน กสฺสโป.

ทิสฺสนฺติ อุปสมฺปนฺนา, อาพาเธหิ จ ปีฬิตา;

อนนุสิฏฺฐา วิตฺเถนฺติ, ตตฺเถว อนุสาสนา.

สงฺเฆปิ จ อโถ พาลา, อสมฺมตา จ เอกโต;

อุลฺลุมฺปตุปสมฺปทา, นิสฺสโย เอกโก ตโยติ.

อิมมฺหิ ขนฺธเก วตฺถูนิ เอกสตญฺจ ทฺวาสตฺตติ.

มหาขนฺธโก นิฏฺฐิโต.