๖. ปาฏิเทสนียกณฺฑํ

ปาฏิเทสนียสิกฺขาปทวณฺณนา

๕๕๒. ปาฏิเทสนีเยสุ ปฐเม ‘‘คารยฺหํ อาวุโสติอาทิ ปฏิเทเสตพฺพาการทสฺสน’’นฺติ วจนโต ปาฬิยํ อาคตนเยเนว อาปตฺติ เทเสตพฺพา. อสปฺปายนฺติ สคฺคโมกฺขานํ อหิตํ อนนุกูลํ. เสสเมตฺถ อุตฺตานเมว. ปริปุณฺณูปสมฺปนฺนตา, อญฺญาติกตา, อนฺตรฆเร ฐิตาย หตฺถโต สหตฺถา ปฏิคฺคหณํ, ยาวกาลิกตา, อชฺโฌหรณนฺติ อิมานิ ปเนตฺถ ปญฺจ องฺคานิ.

๕๕๗-๕๖๒. ทุติยตติยจตุตฺเถสุ นตฺถิ วตฺตพฺพํ, องฺเคสุ ปน ทุติเย ปริปุณฺณูปสมฺปนฺนตา, ปญฺจโภชนตา, อนฺตรฆเร ฐิตาย อนุญฺญาตปฺปการโต อญฺญถา โวสาสนา, อนิวารณา, อชฺโฌหาโรติ อิมานิ ปญฺจ องฺคานิ.

ตติเย เสกฺขสมฺมตตา, ปุพฺเพ อนิมนฺติตตา, อคิลานตา, ฆรูปจาโรกฺกมนํ, ฐเปตฺวา นิจฺจภตฺตาทีนิ อญฺญํ อามิสํ คเหตฺวา ภุญฺชนนฺติ อิมานิ ปญฺจ องฺคานิ.

จตุตฺเถ ยถาวุตฺตอารญฺญกเสนาสนตา, ยาวกาลิกสฺส อตตฺถชาตกตา, อคิลานตา, อคิลานาวเสสกตา, อปฺปฏิสํวิทิตตา, อชฺฌาราเม ปฏิคฺคหณํ, อชฺโฌหรณนฺติ อิมานิ สตฺต องฺคานิ.

ปาฏิเทสนียสิกฺขาปทวณฺณนา นิฏฺฐิตา.

ปาฏิเทสนียกณฺฑํ นิฏฺฐิตํ.