จีวรนิกฺเขปกถา

๖๒. จีวรนิกฺเขปกถายํ สํหรียเตติ สงฺฆาฏิ, ตสฺสา สงฺฆาฏิยา, ภาวโยเค กมฺมตฺเถ ฉฏฺฐี. นิกฺเขปายาติ ฐปนาย, สงฺฆาฏึ อคฺคเหตฺวา วิหาเร ฐเปตฺวา คมนาย ปญฺจ การณานิ โหนฺตีติ อตฺโถ. คิลาโน วา โหตีติ คเหตฺวา คนฺตุํ อสมตฺโถ คิลาโน วา โหติ. วสฺสิกสงฺเกตํ วา โหตีติ ‘‘วสฺสิกกาโล อย’’นฺติ สงฺเกตํ วา กตํ โหติ. นทีปารคตํ วา โหตีติ นทิยา ปารํ คนฺตฺวา ภุญฺชิตพฺพํ โหติ. อคฺคฬคุตฺติวิหาโร วา โหตีติ อคฺคฬํ ทตฺวาปิ ทาตพฺโพ สุคุตฺตวิหาโร วา โหติ. อตฺถตกถินํ วา โหตีติ ตสฺมึ วิหาเร กถินํ อตฺถตํ วา โหติ อตฺถตกถินานํ อสมาทานจารสมฺภวโต. เสสํ สุวิญฺเญยฺยเมว. อารญฺญิกสฺส ปน วิหาโร น สุคุตฺโต โหตีติ อปฺปภิกฺขุกตฺตา โจราทีนํ คมนฏฺฐานโต จ. ภณฺฑุกฺขลิกายาติ จีวราทิฏฺฐปนภณฺฑุกฺขลิกาย. เสสํ สุวิญฺเญยฺยํ.