นิคมนกถา

๑. ชมฺพุทีปตเล รมฺเม, มรมฺมวิสเย สุเต;

ตมฺพทีปรฏฺเฐ ฐิตํ, ปุรํ รตนนามกํ.

๒. ชินสาสนปชฺโชตํ, อเนกรตนากรํ;

สาธุชฺชนานมาวาสํ, โสณฺณปาสาทลงฺกตํ.

๓. ตสฺมึ รตนปุรมฺหิ, ราชาเนกรฏฺฐิสฺสโร;

สิรีสุธมฺมราชาติ, มหาอธิปตีติ จ.

๔. เอวํนาโม มหาเตโช, รชฺชํ กาเรสิ ธมฺมโต;

การาเปสิ ราชา มณิ-จูฬํ มหนฺตเจติยํ.

๕. ตสฺส กาเล พฺรหารญฺเญ, ติริโย นาม ปพฺพโต;

ปุพฺพการญฺญวาสีนํ, นิวาโส ภาวนารโห.

๖. อฏฺฐารสหิ โทเสหิ, มุตฺโต ปญฺจงฺคุปาคโต;

อรญฺญลกฺขณํ ปตฺโต, พทฺธสีมายลงฺกโต.

๗. ตสฺมึ ปพฺพเต วสนฺโต, มหาเถโร สุปากโฏ;

ติเปฏกาลงฺกาโรติ, ทฺวิกฺขตฺตุํ ลทฺธลญฺฉโน.

๘. เตภาตุกนรินฺทานํ, ครุภูโต สุเปสโล;

กุสโล ปริยตฺติมฺหิ, ปฏิปตฺติมฺหิ การโก.

๙. โสหํ ลชฺชีเปสเลหิ, ภิกฺขูหิ อภิยาจิโต;

สาสนสฺโสปการาย, อกาสึ สีลวฑฺฒนํ.

๑๐. วินยาลงฺการํ นาม, ลชฺชีนํ อุปการกํ;

สุฏฺฐุ วินยสงฺคห-วณฺณนํ สาธุเสวิตํ.

๑๑. รูปฉิทฺทนาสกณฺเณ, สมฺปตฺเต ชินสาสเน;

ฉิทฺทสุญฺญสุญฺญรูเป, กลิยุคมฺหิ อาคเต.

๑๒. นิฏฺฐาปิตา อยํ ฏีกา, มยา สาสนการณา;

ทฺวีสุ โสณฺณวิหาเรสุ, ทฺวิกฺขตฺตุํ ลทฺธเกตุนา.

๑๓. อิมินา ปุญฺญกมฺเมน, อญฺเญน กุสเลน จ;

อิโต จุตาหํ ทุติเย, อตฺตภาวมฺหิ อาคเต.

๑๔. หิมวนฺตปเทสมฺหิ, ปพฺพเต คนฺธมาทเน;

อาสนฺเน มณิคุหาย, มญฺชูสกทุมสฺส จ.

๑๕. ตสฺมึ เหสฺสํ ภุมฺมเทโว, อติทีฆายุโก วโร;

ปญฺญาวีริยสมฺปนฺโน, พุทฺธสาสนมามโก.

๑๖. ยาว ติฏฺฐติ สาสนํ, ตาว เจติยวนฺทนํ;

โพธิปูชํ สงฺฆปูชํ, กเรยฺยํ ตุฏฺฐมานโส.

๑๗. ภิกฺขูนํ ปฏิปนฺนานํ, เวยฺยาวจฺจํ กเรยฺยหํ;

ปริยตฺตาภิยุตฺตานํ, กงฺขาวิโนทเยยฺยหํ.

๑๘. สาสนํ ปคฺคณฺหนฺตานํ, ราชูนํ สหาโย อสฺสํ;

สาสนํ นิคฺคณฺหนฺตานํ, วาเรตุํ สมตฺโถ อสฺสํ.

๑๙. สาสนนฺตรธาเน ตุ, มญฺชูสํ รุกฺขมุตฺตมํ;

นนฺทมูลญฺจ ปพฺภารํ, นิจฺจํ ปูชํ กเรยฺยหํ.

๒๐. ยทา ตุ ปจฺเจกพุทฺธา, อุปฺปชฺชนฺติ มหายสา;

ตทา เตสํ นิจฺจกปฺปํ, อุปฏฺฐานํ กเรยฺยหํ.

๒๑. เตเนว อตฺตภาเวน, ยาว พุทฺธุปฺปาทา อหํ;

ติฏฺฐนฺโต พุทฺธุปฺปาทมฺหิ, มนุสฺเสสุ ภวามหํ.

๒๒. เมตฺเตยฺยสฺส ภควโต, ปพฺพชิตฺวาน สาสเน;

โตสยิตฺวาน ชินํ ตํ, ลเภ พฺยากรณุตฺตมํ.

๒๓. พฺยากรณํ ลภิตฺวาน, ปูเรตฺวา สพฺพปารมี;

อนาคตมฺหิ อทฺธาเน, พุทฺโธ เหสฺสํ สเทวเกติ.

วินยาลงฺการฏีกา สมตฺตา.