๔. อฏฺฐวตฺถุกสิกฺขาปทวณฺณนา

๖๗๕. จตุตฺเถ โลกสฺสาทสงฺขาตํ มิตฺเตหิ อญฺญมญฺญํ กาตพฺพํ สนฺถวํ. วุตฺตเมวตฺถํ ปริยายนฺตเรน ทสฺเสตุํ ‘‘กายสํสคฺคราเคนา’’ติ วุตฺตํ.

ติสฺสิตฺถิโย เมถุนํ ตํ น เสเวติ ยา ติสฺโส อิตฺถิโย, ตาสุ วุตฺตํ ตํ เมถุนํ น เสเวยฺย. อนริยปณฺฑเกติ ตโย อนริเย, ตโย ปณฺฑเก จ อุปสงฺกมิตฺวา เมถุนํ น เสเวติ อตฺโถ. อนริยาติ เจตฺถ อุภโตพฺยญฺชนกา อธิปฺเปตา. พฺยญฺชนสฺมินฺติ อตฺตโน วจฺจมุขมคฺเคปิ. เฉโท เอว เฉชฺชํ, ปาราชิกํ.

วณฺณาวณฺโณติ ทฺวีหิ สุกฺกวิสฺสฏฺฐิ วุตฺตา. คมนุปฺปาทนนฺติ สญฺจริตฺตํ. ‘‘เมถุนธมฺมสฺส ปุพฺพภาคตฺตา ปจฺจโย โหตี’’ติ อิมินา การิโยปจาเรน กายสํสคฺโค เมถุนธมฺโมติ วุตฺโตติ ทสฺเสติ. สพฺพปเทสูติ สงฺฆาฏิกณฺณคฺคหณาทิปเทสุ. กายสํสคฺคราโค, สอุสฺสาหตา, อฏฺฐมวตฺถุสฺส ปูรณนฺติ ตีเณตฺถ องฺคานิ.

อฏฺฐวตฺถุกสิกฺขาปทวณฺณนา นิฏฺฐิตา.

ปาราชิกวณฺณนานโย นิฏฺฐิโต.