๖. ปาฏิเทสนียกณฺฑํ

๑. ปฐมปาฏิเทสนียสิกฺขาปทวณฺณนา

๕๕๓. ปาฏิเทสนีเยสุ ปฐเม ปฏิเทเสตพฺพาการทสฺสนนฺติ เอวํ อาปตฺตึ นวกสฺส สนฺติเก เทเสตพฺพาการทสฺสนํ. อิมินา ลกฺขเณน สมฺพหุลานํ อาปตฺตีนมฺปิ วุฑฺฒสฺส สนฺติเก จ เทเสตพฺพากาโร สกฺกา วิญฺญาตุนฺติ. ตตฺรายํ นโย – ‘‘คารเยฺห, อาวุโส, ธมฺเม อาปชฺชึ อสปฺปาเย ปาฏิเทสนีเย’’ติ เอวํ สมฺพหุลาสุ. วุฑฺฒสฺส ปน สนฺติเก ‘‘คารยฺหํ, ภนฺเต, ธมฺมํ…เป… คารเยฺห, ภนฺเต, ธมฺเม’’ติ โยชนา เวทิตพฺพา. ตตฺถ อสปฺปายนฺติ สคฺคโมกฺขนฺตรายกรนฺติ อตฺโถ. อญฺญาติกาย ภิกฺขุนิยา อนฺตรฆเร ฐิตาย หตฺถโต สหตฺถา ยาวกาลิกคฺคหณํ, อชฺโฌหรณนฺติ เทฺว องฺคานิ.

ปฐมปาฏิเทสนียสิกฺขาปทวณฺณนา นิฏฺฐิตา.

๕๕๘. ทุติเย ปริปุณฺณูปสมฺปนฺนาย อนนุญฺญาตากาเรน โวสาสนา, อนิวาเรตฺวา โภชนชฺโฌหาโรติ เทฺว องฺคานิ.

๕๖๓. ตติเย เสกฺขสมฺมตตา, ฆรูปจาเร อนิมนฺติตตา, คิลานสฺส อนิจฺจภตฺตาทึ คเหตฺวา ภุญฺชนนฺติ ตีณิ องฺคานิ.

๕๗๐. จตุตฺเถ สาสงฺการญฺญเสนาสนตา, อนนุญฺญาตํ ยาวกาลิกํ อปฺปฏิสํวิทิตํ อชฺฌาราเม ปฏิคฺคเหตฺวา อคิลานสฺส อชฺโฌหรณนฺติ เทฺว องฺคานิ. เสสํ อุตฺตานเมว.

ปาฏิเทสนียวณฺณนานโย นิฏฺฐิโต.