๒. ราธสํยุตฺตํ

๑. ปฐมวคฺโค

๑. มารสุตฺตวณฺณนา

๑๖๐. มารสทฺโทยํ ภาวสาธโนติ ทสฺเสนฺโต ‘‘มาโร วา อสฺสาติ มรณํ วา ภเวยฺยา’’ติ อาห. มาเรตาติ มริตพฺโพ มารํ มรณํ เอตพฺโพติ อาห ‘‘มาเรตพฺโพ’’ติ. อนุปาทานิพฺพานตฺถาติ ผลวิมุตฺติสงฺขาตา อรหโต อรหนฺตตา นาม ยาวเทว อนุปาทานิพฺพานตฺถา. นิพฺพานพฺภนฺตเรติ อนุปาทานิพฺพานาธิคมสฺส อพฺภนฺตเร ตโต โอรเมว อิทํ มคฺคํ พฺรหฺมจริยํ วุสฺสติ, น ตโต ปรํ. อสฺสาติ พฺรหฺมจริยสฺส.

มารสุตฺตวณฺณนา นิฏฺฐิตา.

๒-๑๐. สตฺตสุตฺตาทิวณฺณนา

๑๖๑-๑๖๙. ลคฺคปุจฺฉาติ ลคฺคนสฺส พชฺฌนสฺส ปุจฺฉา. ยทิ รูปาทีสุ สตฺตตฺตา สตฺโต, ขีณาสวา กถํ สตฺตาติ? สตฺตภูตปุพฺพาติ กตฺวา. กีฬาวิคมนฺติ กีฬาย อปนยนํ โอรมณํ. ยนฺตรชฺชุ วิย ภวปพนฺธสฺส นยนโต ภวรชฺชูติ ตณฺหา วุตฺตา.

สตฺตสุตฺตาทิวณฺณนา นิฏฺฐิตา.

ปฐมวคฺควณฺณนา นิฏฺฐิตา.

๒. ทุติยวคฺโค

๑-๑๒. มารสุตฺตาทิวณฺณนา

๑๗๐-๑๘๑. รูปาทิวินิมุตฺตํ มรณํ นาม นตฺถิ รูปาทีนํเยว วิภเว มรณสมญฺญาติ. มรณธมฺโม วินาสภาโว.

มารสุตฺตาทิวณฺณนา นิฏฺฐิตา.

ทุติยวคฺควณฺณนา นิฏฺฐิตา.

๓-๔. อายาจนวคฺคาทิ

๑-๑๑. มาราทิสุตฺตเอกาทสกวณฺณนา

๑๘๒-๒๐๕. สุขุมํ การณํ อุปฏฺฐาติ, เตเนส เถโร ปฏิภาเนยฺยกานํ เอตทคฺเค ฐปิโต. วิมุตฺติปริปาจนียธมฺมวเสเนว, น ปฏิเวธาวหภาเวน.

มาราทิสุตฺตเอกาทสกวณฺณนา นิฏฺฐิตา.

อายาจนวคฺคาทิวณฺณนา นิฏฺฐิตา.

สารตฺถปฺปกาสินิยา สํยุตฺตนิกาย-อฏฺฐกถาย

ราธสํยุตฺตวณฺณนาย ลีนตฺถปฺปกาสนา สมตฺตา.