๙. ปีตวิมานวตฺถุ

๗๙๕. ‘‘ปีตวตฺเถ ปีตธเช, ปีตาลงฺการภูสิเต;

ปีตจนฺทนลิตฺตงฺเค, ปีตอุปฺปลมาลินี [ปีตุปฺปลมธารินี (สฺยา. ก.), ปีตุปฺปลมาลินี (ปี.)].

๗๙๖. ‘‘ปีตปาสาทสยเน, ปีตาสเน ปีตภาชเน;

ปีตฉตฺเต ปีตรเถ, ปีตสฺเส ปีตพีชเน.

๗๙๗. ‘‘กึ กมฺมมกรี ภทฺเท, ปุพฺเพ มานุสเก ภเว;

เทวเต ปุจฺฉิตาจิกฺข, กิสฺส กมฺมสฺสิทํ ผล’’นฺติ.

๗๙๘. ‘‘โกสาตกี นาม ลตตฺถิ ภนฺเต, ติตฺติกา อนภิจฺฉิตา;

ตสฺสา จตฺตาริ ปุปฺผานิ, ถูปํ อภิหรึ อหํ.

๗๙๙. ‘‘สตฺถุ สรีรมุทฺทิสฺส, วิปฺปสนฺเนน เจตสา;

นาสฺส มคฺคํ อเวกฺขิสฺสํ, น ตคฺคมนสา [ตทคฺคมนสา (สี.), ตทงฺคมนสา (สฺยา.)] สตี.

๘๐๐. ‘‘ตโต มํ อวธี คาวี, ถูปํ อปตฺตมานสํ;

ตญฺจาหํ อภิสญฺเจยฺยํ, ภิยฺโย [ภีโย (สี. อฏฺฐ.)] นูน อิโต สิยา.

๘๐๑. ‘‘เตน กมฺเมน เทวินฺท, มฆวา เทวกุญฺชโร;

ปหาย มานุสํ เทหํ, ตว สหพฺย [สหพฺยต (สี. สฺยา.)] มาคตา’’ติ.

๘๐๒. อิทํ สุตฺวา ติทสาธิปติ, มฆวา เทวกุญฺชโร;

ตาวตึเส ปสาเทนฺโต, มาตลึ เอตทพฺรวิ [เอตทพฺรูวีติ (สี.)].

๘๐๓. ‘‘ปสฺส มาตลิ อจฺเฉรํ, จิตฺตํ กมฺมผลํ อิทํ;

อปฺปกมฺปิ กตํ เทยฺยํ, ปุญฺญํ โหติ มหปฺผลํ.

๘๐๔. ‘‘นตฺถิ จิตฺเต ปสนฺนมฺหิ, อปฺปกา นาม ทกฺขิณา;

ตถาคเต วา สมฺพุทฺเธ, อถ วา ตสฺส สาวเก.

๘๐๕. ‘‘เอหิ มาตลิ อเมฺหปิ, ภิยฺโย ภิยฺโย มเหมเส;

ตถาคตสฺส ธาตุโย, สุโข ปุญฺญาน มุจฺจโย.

๘๐๖. ‘‘ติฏฺฐนฺเต นิพฺพุเต จาปิ, สเม จิตฺเต สมํ ผลํ;

เจโตปณิธิเหตุ หิ, สตฺตา คจฺฉนฺติ สุคฺคตึ.

๘๐๗. ‘‘พหูนํ [พหุนฺนํ (สี. สฺยา.)] วต อตฺถาย, อุปฺปชฺชนฺติ ตถาคตา;

ยตฺถ การํ กริตฺวาน, สคฺคํ คจฺฉนฺติ ทายกา’’ติ.

ปีตวิมานํ นวมํ.