๑. ชคติทายกตฺเถรอปทานํ

๑. ‘‘ธมฺมทสฺสิสฺส มุนิโน, โพธิยา ปาทปุตฺตเม;

ปสนฺนจิตฺโต สุมโน, ชคตึ การยึ อหํ.

๒. ‘‘ทริโต ปพฺพตโต วา, รุกฺขโต ปติโต อหํ;

จุโต ปติฏฺฐํ วินฺทามิ, ชคติยา อิทํ ผลํ.

๓. ‘‘น เม โจรา วิเหสนฺติ, นาติมญฺญนฺติ ขตฺติยา [ปสหนฺติ, นาติมญฺญติ ขตฺติโย (สี. ปี.)];

สพฺพามิตฺเตติกฺกมามิ, ชคติยา อิทํ ผลํ.

๔. ‘‘ยํ ยํ โยนุปปชฺชามิ, เทวตฺตํ อถ มานุสํ;

สพฺพตฺถ ปูชิโต โหมิ, ชคติยา อิทํ ผลํ.

๕. ‘‘อฏฺฐารเส กปฺปสเต, ชคตึ การยึ อหํ;

ทุคฺคตึ นาภิชานามิ, ชคติทานสฺสิทํ ผลํ.

๖. ‘‘กิเลสา ฌาปิตา มยฺหํ, ภวา สพฺเพ สมูหตา;

นาโคว พนฺธนํ เฉตฺวา, วิหรามิ อนาสโว.

๗. ‘‘สฺวาคตํ วต เม อาสิ, มม พุทฺธสฺส สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๘. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ชคติทายโก เถโร อิมา คาถาโย

อภาสิตฺถาติ.

ชคติทายกตฺเถรสฺสาปทานํ ปฐมํ.