๙. เวทิการกตฺเถรอปทานํ

๖๑. ‘‘ปทุมุตฺตรสฺส ภควโต, โพธิยา ปาทปุตฺตเม;

เวทิกํ สุกตํ กตฺวา, สกํ จิตฺตํ ปสาทยึ.

๖๒. ‘‘อโตฬารานิ [อโถฬารานิ (สี. ปี.), อคฺโคฬารานิ (สฺยา.)] ภณฺฑานิ, กตานิ อกตานิ จ;

อนฺตลิกฺขา ปวสฺสนฺติ, เวทิกาย อิทํ ผลํ.

๖๓. ‘‘อุภโต พฺยูฬฺหสงฺคาเม, ปกฺขนฺทนฺโต ภยานเก;

ภยเภรวํ น ปสฺสามิ, เวทิกาย อิทํ ผลํ.

๖๔. ‘‘มม สงฺกปฺปมญฺญาย, พฺยมฺหํ นิพฺพตฺตเต สุภํ;

สยนานิ มหคฺฆานิ, เวทิกาย อิทํ ผลํ.

๖๕. ‘‘สตสหสฺสิโต กปฺเป, ยํ เวทิกมการยึ;

ทุคฺคตึ นาภิชานามิ, เวทิกาย อิทํ ผลํ.

๖๖. ‘‘กิเลสา ฌาปิตา มยฺหํ…เป… วิหรามิ อนาสโว.

๖๗. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๖๘. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เวทิการโก เถโร อิมา คาถาโย

อภาสิตฺถาติ.

เวทิการกตฺเถรสฺสาปทานํ นวมํ.