๗. สีหาสนิกตฺเถรอปทานํ

๔๒. ‘‘ปทุมุตฺตรสฺส ภควโต, สพฺพภูตหิเตสิโน;

ปสนฺนจิตฺโต สุมโน, สีหาสนมทาสหํ.

๔๓. ‘‘เทวโลเก มนุสฺเส วา, ยตฺถ ยตฺถ วสามหํ;

ลภามิ วิปุลํ พฺยมฺหํ, สีหาสนสฺสิทํ ผลํ.

๔๔. ‘‘โสณฺณมยา รูปิมยา, โลหิตงฺคมยา [โลหิตงฺกมยา (สี. สฺยา. ปี.)] พหู;

มณิมยา จ ปลฺลงฺกา, นิพฺพตฺตนฺติ มมํ สทา.

๔๕. ‘‘โพธิยา อาสนํ กตฺวา, ชลชุตฺตมนามิโน;

อุจฺเจ กุเล ปชายามิ, อโห ธมฺมสุธมฺมตา.

๔๖. ‘‘สตสหสฺสิโต กปฺเป, สีหาสนมกาสหํ;

ทุคฺคตึ นาภิชานามิ, สีหาสนสฺสิทํ ผลํ.

๔๗. ‘‘กิเลสา ฌาปิตา มยฺหํ…เป… วิหรามิ อนาสโว.

๔๘. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๔๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สีหาสนิโก เถโร อิมา คาถาโย

อภาสิตฺถาติ.

สีหาสนิกตฺเถรสฺสาปทานํ สตฺตมํ.