๑. วิภีตกมิญฺชิยตฺเถรอปทานํ

๑. ‘‘กกุสนฺโธ มหาวีโร, สพฺพธมฺมาน ปารคู;

คณมฺหา วูปกฏฺโฐ โส, อคมาสิ วนนฺตรํ.

๒. ‘‘พีชมิญฺชํ คเหตฺวาน, ลตาย อาวุณึ อหํ;

ภควา ตมฺหิ สมเย, ฌายเต ปพฺพตนฺตเร.

๓. ‘‘ทิสฺวานหํ เทวเทวํ, วิปฺปสนฺเนน เจตสา;

ทกฺขิเณยฺยสฺส วีรสฺส, พีชมิญฺชมทาสหํ.

๔. ‘‘อิมสฺมึเยว กปฺปมฺหิ, ยํ มิญฺชมททึ [ผลมททึ (สี. ปี.), พีชมททึ (สฺยา.)] ตทา;

ทุคฺคตึ นาภิชานามิ, พีชมิญฺชสฺสิทํ ผลํ.

๕. ‘‘กิเลสา ฌาปิตา มยฺหํ, ภวา สพฺเพ สมูหตา;

นาโคว พนฺธนํ เฉตฺวา, วิหรามิ อนาสโว.

๖. ‘‘สฺวาคตํ วต เม อาสิ, มม พุทฺธสฺส สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๗. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา วิภีตกมิญฺชิโย [วิเภทก… (สฺยา. ก.)] เถโร อิมา

คาถาโย อภาสิตฺถาติ.

วิภีตกมิญฺชิยตฺเถรสฺสาปทานํ ปฐมํ.