๒. ชีวิตินฺทฺริยสุตฺตวณฺณนา

๔๙๒. ตติยวคฺคสฺส ทุติเย อิตฺถินฺทฺริยนฺติอาทีสุ อิตฺถิภาเว อินฺทฏฺฐํ กโรตีติ อิตฺถินฺทฺริยํ. ปุริสภาเว อินฺทฏฺฐํ กโรตีติ ปุริสินฺทฺริยํ. ชีวิเต อินฺทฏฺฐํ กโรตีติ ชีวิตินฺทฺริยํ. อตฺถุปฺปตฺติกํ กิเรตํ สุตฺตํ. สงฺฆมชฺฌสฺมิญฺหิ ‘‘กติ นุ โข วฏฺฏินฺทฺริยานี’’ติ กถา อุทปาทิ, อถ ภควา วฏฺฏินฺทฺริยานิ ทสฺเสนฺโต ตีณิมานิ ภิกฺขเวติอาทิมาห.