๑-๑๐. อุมาปุปฺผิยตฺเถรอปทานาทิวณฺณนา

เตตฺตึสติเม วคฺเค ปฐมทุติยตติยจตุตฺถปญฺจมฉฏฺฐาปทานานิ อุตฺตานานิเยว.

๕๕. สตฺตมาปทาเน สมยํ อคมาสหนฺติ สมูหํ สมาคมฏฺฐานํ อหํ อคมาสินฺติ อตฺโถ.

๖๒. อพฺพุทนิรพฺพุทานีติ ‘‘ปโกฏิสตสหสฺสานํ สตํ อพฺพุทํ, อพฺพุทสตสหสฺสานํ สตํ นิรพฺพุท’’นฺติ วุตฺตตฺตา อายุนา อพฺพุทนิรพฺพุทานิ คตมหาอายุวนฺตา มนุชาธิปา จกฺกวตฺติโน ขตฺติยา อฏฺฐ อฏฺฐ หุตฺวา กปฺปานํ ปญฺจวีสสหสฺสมฺหิ อาสึสุ อเหสุนฺติ อตฺโถ. อฏฺฐมนวมทสมาปทานานิ ปากฏาเนวาติ.