๔. อทนฺตวคฺควณฺณนา

๓๑. จตุตฺถสฺส ปฐเม อทนฺตนฺติ สวิเสวนํ อทนฺตหตฺถิอสฺสาทิสทิสํ. จิตฺตนฺติ วฏฺฏวเสน อุปฺปนฺนจิตฺตเมว.

๓๒. ทุติเย ทนฺตนฺติ นิพฺพิเสวนํ ทนฺตหตฺถิอสฺสาทิสทิสํ. อิมสฺมิมฺปิ สุตฺตทฺวเย วฏฺฏวิวฏฺฏวเสน อุปฺปนฺนจิตฺตเมว กถิตํ. ยถา เจตฺถ, เอวํ อิโต ปเรสุปีติ.

๓๓. ตติเย อคุตฺตนฺติ อโคปิตํ สติสํวรรหิตํ อคุตฺตหตฺถิอสฺสาทิสทิสํ.

๓๔. จตุตฺเถ คุตฺตนฺติ โคปิตํ อวิสฺสฏฺฐสติสํวรํ คุตฺตหตฺถิอสฺสาทิสทิสํ.

๓๕-๓๖. ปญฺจมฉฏฺฐานิ อรกฺขิตํ รกฺขิตนฺติ ปทวเสน พุชฺฌนกานํ อชฺฌาสเยน วุตฺตานิ. อตฺโถ ปเนตฺถ ปุริมสทิโสเยว.

๓๗-๓๘. สตฺตมฏฺฐเมสุปิ เอเสว นโย. อุปมา ปเนตฺถ อสํวุตฆรทฺวาราทิวเสน เวทิตพฺพา.

๓๙-๔๐. นวมทสมานิ จตูหิปิ ปเทหิ โยเชตฺวา วุตฺตานิ. อิมสฺมิมฺปิ วคฺเค วฏฺฏวิวฏฺฏเมว กถิตนฺติ.

อทนฺตวคฺควณฺณนา.