๔. ปจฺจุปฺปนฺนาตีตวาโร

(ก) อนุโลมํ

๔๕๙. (ก) โย จกฺขุนฺทฺริยํ ปริชานาติ โส โทมนสฺสินฺทฺริยํ ปชหิตฺถาติ? อามนฺตา.

(ข) โย วา ปน โทมนสฺสินฺทฺริยํ ปชหิตฺถ โส จกฺขุนฺทฺริยํ ปริชานาตีติ?

เทฺว ปุคฺคลา โทมนสฺสินฺทฺริยํ ปชหิตฺถ, โน จ จกฺขุนฺทฺริยํ ปริชานนฺติ. อคฺคมคฺคสมงฺคี โทมนสฺสินฺทฺริยญฺจ ปชหิตฺถ จกฺขุนฺทฺริยญฺจ ปริชานนฺติ.

(ก) โย จกฺขุนฺทฺริยํ ปริชานาติ โส อนญฺญาตญฺญสฺสามีตินฺทฺริยํ ภาวิตฺถาติ? อามนฺตา.

(ข) โย วา ปน อนญฺญาตญฺญสฺสามีตินฺทฺริยํ ภาวิตฺถ โส จกฺขุนฺทฺริยํ ปริชานาตีติ?

ฉ ปุคฺคลา อนญฺญาตญฺญสฺสามีตินฺทฺริยํ ภาวิตฺถ, โน จ จกฺขุนฺทฺริยํ ปริชานนฺติ. อคฺคมคฺคสมงฺคี อนญฺญาตญฺญสฺสามีตินฺทฺริยญฺจ ภาวิตฺถ จกฺขุนฺทฺริยญฺจ ปริชานาติ.

(ก) โย จกฺขุนฺทฺริยํ ปริชานาติ โส อญฺญินฺทฺริยํ ภาวิตฺถาติ? โน.

(ข) โย วา ปน อญฺญินฺทฺริยํ ภาวิตฺถ โส จกฺขุนฺทฺริยํ ปริชานาตีติ? โน.

(ก) โย จกฺขุนฺทฺริยํ ปริชานาติ โส อญฺญาตาวินฺทฺริยํ สจฺฉิกริตฺถาติ? โน.

(ข) โย วา ปน อญฺญาตาวินฺทฺริยํ สจฺฉิกริตฺถ โส จกฺขุนฺทฺริยํ ปริชานาตีติ? โน. (จกฺขุนฺทฺริยมูลกํ)

๔๖๐. (ก) โย โทมนสฺสินฺทฺริยํ ปชหติ โส อนญฺญาตญฺญสฺสามีตินฺทฺริยํ ภาวิตฺถาติ? อามนฺตา.

(ข) โย วา ปน อนญฺญาตญฺญสฺสามีตินฺทฺริยํ ภาวิตฺถ โส โทมนสฺสินฺทฺริยํ ปชหตีติ?

ฉ ปุคฺคลา อนญฺญาตญฺญสฺสามีตินฺทฺริยํ ภาวิตฺถ, โน จ โทมนสฺสินฺทฺริยํ ปชหนฺติ. อนาคามิมคฺคสมงฺคี อนญฺญาตญฺญสฺสามีตินฺทฺริยญฺจ ภาวิตฺถ โทมนสฺสินฺทฺริยญฺจ ปชหติ.

(ก) โย โทมนสฺสินฺทฺริยํ ปชหติ โส อญฺญินฺทฺริยํ ภาวิตฺถาติ? โน.

(ข) โย วา ปน อญฺญินฺทฺริยํ ภาวิตฺถ โส โทมนสฺสินฺทฺริยํ ปชหตีติ? โน.

(ก) โย โทมนสฺสินฺทฺริยํ ปชหติ โส อญฺญาตาวินฺทฺริยํ สจฺฉิกริตฺถาติ? โน.

(ข) โย วา ปน อญฺญาตาวินฺทฺริยํ สจฺฉิกริตฺถ โส โทมนสฺสินฺทฺริยํ ปชหตีติ? โน. (โทมนสฺสินฺทฺริยมูลกํ)

๔๖๑. (ก) โย อนญฺญาตญฺญสฺสามีตินฺทฺริยํ ภาเวติ โส อญฺญินฺทฺริยํ ภาวิตฺถาติ? โน.

(ข) โย วา ปน อญฺญินฺทฺริยํ ภาวิตฺถ โส อนญฺญาตญฺญสฺสามีตินฺทฺริยํ ภาเวตีติ? โน.

(ก) โย อนญฺญาตญฺญสฺสามีตินฺทฺริยํ ภาเวติ โส อญฺญาตาวินฺทฺริยํ สจฺฉิกริตฺถาติ? โน.

(ข) โย วา ปน อญฺญาตาวินฺทฺริยํ สจฺฉิกริตฺถ โส อนญฺญาตญฺญสฺสามีตินฺทฺริยํ ภาเวตีติ? โน. (อนญฺญาตญฺญสฺสามีตินฺทฺริยมูลกํ)

๔๖๒. (ก) โย อญฺญินฺทฺริยํ ภาเวติ โส อญฺญาตาวินฺทฺริยํ สจฺฉิกริตฺถาติ? โน.

(ข) โย วา ปน อญฺญาตาวินฺทฺริยํ สจฺฉิกริตฺถ โส อญฺญินฺทฺริยํ ภาเวตีติ? โน. (อญฺญินฺทฺริยมูลกํ)

(ข) ปจฺจนีกํ

๔๖๓. (ก) โย จกฺขุนฺทฺริยํ น ปริชานาติ โส โทมนสฺสินฺทฺริยํ นปฺปชหิตฺถาติ?

เทฺว ปุคฺคลา จกฺขุนฺทฺริยํ น ปริชานนฺติ, โน จ โทมนสฺสินฺทฺริยํ นปฺปชหิตฺถ. ฉ ปุคฺคลา จกฺขุนฺทฺริยญฺจ น ปริชานนฺติ โทมนสฺสินฺทฺริยญฺจ นปฺปชหิตฺถ.

(ข) โย วา ปน โทมนสฺสินฺทฺริยํ นปฺปชหิตฺถ โส จกฺขุนฺทฺริยํ น ปริชานาตีติ? อามนฺตา.

(ก) โย จกฺขุนฺทฺริยํ น ปริชานาติ โส อนญฺญาตญฺญสฺสามีตินฺทฺริยํ น ภาวิตฺถาติ?

ฉ ปุคฺคลา จกฺขุนฺทฺริยํ น ปริชานนฺติ, โน จ อนญฺญาตญฺญสฺสามีตินฺทฺริยํ น ภาวิตฺถ. เทฺว ปุคฺคลา จกฺขุนฺทฺริยญฺจ น ปริชานนฺติ อนญฺญาตญฺญสฺสามีตินฺทฺริยญฺจ น ภาวิตฺถ.

(ข) โย วา ปน อนญฺญาตญฺญสฺสามีตินฺทฺริยํ น ภาวิตฺถ โส จกฺขุนฺทฺริยํ น ปริชานาตีติ? อามนฺตา.

(ก) โย จกฺขุนฺทฺริยํ น ปริชานาติ โส อญฺญินฺทฺริยํ น ภาวิตฺถาติ?

อรหา จกฺขุนฺทฺริยํ น ปริชานาติ, โน จ อญฺญินฺทฺริยํ น ภาวิตฺถ. สตฺต ปุคฺคลา จกฺขุนฺทฺริยญฺจ น ปริชานนฺติ อญฺญินฺทฺริยญฺจ น ภาวิตฺถ.

(ข) โย วา ปน อญฺญินฺทฺริยํ น ภาวิตฺถ โส จกฺขุนฺทฺริยํ น ปริชานาตีติ?

อคฺคมคฺคสมงฺคี อญฺญินฺทฺริยํ น ภาวิตฺถ, โน จ จกฺขุนฺทฺริยํ น ปริชานาติ. สตฺต ปุคฺคลา อญฺญินฺทฺริยญฺจ น ภาวิตฺถ จกฺขุนฺทฺริยญฺจ น ปริชานนฺติ.

(ก) โย จกฺขุนฺทฺริยํ น ปริชานาติ โส อญฺญาตาวินฺทฺริยํ น สจฺฉิกริตฺถาติ?

อรหา จกฺขุนฺทฺริยํ น ปริชานาติ, โน จ อญฺญาตาวินฺทฺริยํ น สจฺฉิกริตฺถ. อฏฺฐ ปุคฺคลา จกฺขุนฺทฺริยญฺจ น ปริชานนฺติ อญฺญาตาวินฺทฺริยญฺจ น สจฺฉิกริตฺถ.

(ข) โย วา ปน อญฺญาตาวินฺทฺริยํ น สจฺฉิกริตฺถ โส จกฺขุนฺทฺริยํ น ปริชานาตีติ?

อคฺคมคฺคสมงฺคี อญฺญาตาวินฺทฺริยํ น สจฺฉิกริตฺถ, โน จ จกฺขุนฺทฺริยํ น ปริชานาติ. อฏฺฐ ปุคฺคลา อญฺญาตาวินฺทฺริยญฺจ น สจฺฉิกริตฺถ จกฺขุนฺทฺริยญฺจ น ปริชานนฺติ. (จกฺขุนฺทฺริยมูลกํ)

๔๖๔. (ก) โย โทมนสฺสินฺทฺริยํ นปฺปชหติ โส อนญฺญาตญฺญสฺสามีตินฺทฺริยํ น ภาวิตฺถาติ?

ฉ ปุคฺคลา โทมนสฺสินฺทฺริยํ นปฺปชหนฺติ, โน จ อนญฺญาตญฺญสฺสามีตินฺทฺริยํ น ภาวิตฺถ. เทฺว ปุคฺคลา โทมนสฺสินฺทฺริยญฺจ นปฺปชหนฺติ อนญฺญาตญฺญสฺสามีตินฺทฺริยญฺจ น ภาวิตฺถ.

(ข) โย วา ปน อนญฺญาตญฺญสฺสามีตินฺทฺริยํ น ภาวิตฺถ โส โทมนสฺสินฺทฺริยํ นปฺปชหตีติ? อามนฺตา.

(ก) โย โทมนสฺสินฺทฺริยํ นปฺปชหติ โส อญฺญินฺทฺริยํ น ภาวิตฺถาติ?

อรหา โทมนสฺสินฺทฺริยํ นปฺปชหติ, โน จ อญฺญินฺทฺริยํ น ภาวิตฺถ. สตฺต ปุคฺคลา โทมนสฺสินฺทฺริยญฺจ นปฺปชหนฺติ อญฺญินฺทฺริยญฺจ น ภาวิตฺถ.

(ข) โย วา ปน อญฺญินฺทฺริยํ น ภาวิตฺถ โส โทมนสฺสินฺทฺริยํ นปฺปชหตีติ?

อนาคามิมคฺคสมงฺคี อญฺญินฺทฺริยํ น ภาวิตฺถ, โน จ โทมนสฺสินฺทฺริยํ นปฺปชหติ. สตฺต ปุคฺคลา อญฺญินฺทฺริยญฺจ น ภาวิตฺถ โทมนสฺสินฺทฺริยญฺจ นปฺปชหนฺติ.

(ก) โย โทมนสฺสินฺทฺริยํ นปฺปชหติ โส อญฺญาตาวินฺทฺริยํ น สจฺฉิกริตฺถาติ?

อรหา โทมนสฺสินฺทฺริยํ นปฺปชหติ, โน จ อญฺญาตาวินฺทฺริยํ น สจฺฉิกริตฺถ. อฏฺฐ ปุคฺคลา โทมนสฺสินฺทฺริยญฺจ นปฺปชหนฺติ อญฺญาตาวินฺทฺริยญฺจ น สจฺฉิกริตฺถ.

(ข) โย วา ปน อญฺญาตาวินฺทฺริยํ น สจฺฉิกริตฺถ โส โทมนสฺสินฺทฺริยํ นปฺปชหตีติ?

อนาคามิมคฺคสมงฺคี อญฺญาตาวินฺทฺริยํ น สจฺฉิกริตฺถ, โน จ โทมนสฺสินฺทฺริยํ นปฺปชหติ. อฏฺฐ ปุคฺคลา อญฺญาตาวินฺทฺริยญฺจ น สจฺฉิกริตฺถ โทมนสฺสินฺทฺริยญฺจ นปฺปชหนฺติ. (โทมนสฺสินฺทฺริยมูลกํ)

๔๖๕. (ก) โย อนญฺญาตญฺญสฺสามีตินฺทฺริยํ น ภาเวติ โส อญฺญินฺทฺริยํ น ภาวิตฺถาติ?

อรหา อนญฺญาตญฺญสฺสามีตินฺทฺริยํ น ภาเวติ, โน จ อญฺญินฺทฺริยํ น ภาวิตฺถ. สตฺต ปุคฺคลา อนญฺญาตญฺญสฺสามีตินฺทฺริยญฺจ น ภาเวนฺติ อญฺญินฺทฺริยญฺจ น ภาวิตฺถ.

(ข) โย วา ปน อญฺญินฺทฺริยํ น ภาวิตฺถ โส อนญฺญาตญฺญสฺสามีตินฺทฺริยํ น ภาเวตีติ?

อฏฺฐมโก อญฺญินฺทฺริยํ น ภาวิตฺถ, โน จ อนญฺญาตญฺญสฺสามีตินฺทฺริยํ น ภาเวติ. สตฺต ปุคฺคลา อญฺญินฺทฺริยญฺจ น ภาวิตฺถ อนญฺญาตญฺญสฺสามีตินฺทฺริยญฺจ น ภาเวนฺติ.

(ก) โย อนญฺญาตญฺญสฺสามีตินฺทฺริยํ น ภาเวติ โส อญฺญาตาวินฺทฺริยํ น สจฺฉิกริตฺถาติ?

อรหา อนญฺญาตญฺญสฺสามีตินฺทฺริยํ น ภาเวติ, โน จ อญฺญาตาวินฺทฺริยํ น สจฺฉิกริตฺถ. อฏฺฐ [สตฺต (สี. สฺยา. ก.)] ปุคฺคลา อนญฺญาตญฺญสฺสามีตินฺทฺริยญฺจ น ภาเวนฺติ อญฺญาตาวินฺทฺริยญฺจ น สจฺฉิกริตฺถ.

(ข) โย วา ปน อญฺญาตาวินฺทฺริยํ น สจฺฉิกริตฺถ โส อนญฺญาตญฺญสฺสามีตินฺทฺริยํ น ภาเวตีติ?

อฏฺฐมโก อญฺญาตาวินฺทฺริยํ น สจฺฉิกริตฺถ, โน จ อนญฺญาตญฺญสฺสามีตินฺทฺริยํ น ภาเวติ. อฏฺฐ ปุคฺคลา อญฺญาตาวินฺทฺริยญฺจ น สจฺฉิกริตฺถ อนญฺญาตญฺญสฺสามีตินฺทฺริยญฺจ น ภาเวนฺติ. (อนญฺญาตญฺญสฺสามีตินฺทฺริยมูลกํ)

๔๖๖. (ก) โย อญฺญินฺทฺริยํ น ภาเวติ โส อญฺญาตาวินฺทฺริยํ น สจฺฉิกริตฺถาติ?

อรหา อญฺญินฺทฺริยํ น ภาเวติ, โน จ อญฺญาตาวินฺทฺริยํ น สจฺฉิกริตฺถ. ฉ [ปญฺจ (สี. สฺยา. ก.)] ปุคฺคลา อญฺญินฺทฺริยญฺจ น ภาเวนฺติ อญฺญาตาวินฺทฺริยญฺจ น สจฺฉิกริตฺถ.

(ข) โย วา ปน อญฺญาตาวินฺทฺริยํ น สจฺฉิกริตฺถ โส อญฺญินฺทฺริยํ น ภาเวตีติ?

ตโย มคฺคสมงฺคิโน อญฺญาตาวินฺทฺริยํ น สจฺฉิกริตฺถ, โน จ อญฺญินฺทฺริยํ น ภาเวนฺติ. ฉ [ปญฺจ (สี. สฺยา. ก.)] ปุคฺคลา อญฺญาตาวินฺทฺริยญฺจ น สจฺฉิกริตฺถ อญฺญินฺทฺริยญฺจ น ภาเวนฺติ. (อญฺญินฺทฺริยมูลกํ)