๑. ปจฺจุปฺปนฺนวาโร

(ก) อนุโลมํ

๔๓๕. (ก) โย จกฺขุนฺทฺริยํ ปริชานาติ โส โสตินฺทฺริยํ ปริชานาตีติ? อามนฺตา.

(ข) โย วา ปน โสตินฺทฺริยํ ปริชานาติ โส จกฺขุนฺทฺริยํ ปริชานาตีติ? อามนฺตา.

(ก) โย จกฺขุนฺทฺริยํ ปริชานาติ โส โทมนสฺสินฺทฺริยํ ปชหตีติ? โน.

(ข) โย วา ปน โทมนสฺสินฺทฺริยํ ปชหติ โส จกฺขุนฺทฺริยํ ปริชานาตีติ? โน.

(ก) โย จกฺขุนฺทฺริยํ ปริชานาติ โส อนญฺญาตญฺญสฺสามีตินฺทฺริยํ ภาเวตีติ? โน.

(ข) โย วา ปน อนญฺญาตญฺญสฺสามีตินฺทฺริยํ ภาเวติ โส จกฺขุนฺทฺริยํ ปริชานาตีติ? โน.

(ก) โย จกฺขุนฺทฺริยํ ปริชานาติ โส อญฺญินฺทฺริยํ ภาเวตีติ? อามนฺตา.

(ข) โย วา ปน อญฺญินฺทฺริยํ ภาเวติ โส จกฺขุนฺทฺริยํ ปริชานาตีติ?

เทฺว ปุคฺคลา อญฺญินฺทฺริยํ ภาเวนฺติ, โน จ จกฺขุนฺทฺริยํ ปริชานนฺติ. อคฺคมคฺคสมงฺคี อญฺญินฺทฺริยญฺจ ภาเวติ จกฺขุนฺทฺริยญฺจ ปริชานาติ.

(ก) โย จกฺขุนฺทฺริยํ ปริชานาติ โส อญฺญาตาวินฺทฺริยํ สจฺฉิกโรตีติ? โน.

(ข) โย วา ปน อญฺญาตาวินฺทฺริยํ สจฺฉิกโรติ โส จกฺขุนฺทฺริยํ ปริชานาตีติ? โน. (จกฺขุนฺทฺริยมูลกํ)

๔๓๖. (ก) โย โทมนสฺสินฺทฺริยํ ปชหติ โส อนญฺญาตญฺญสฺสามีตินฺทฺริยํ ภาเวตีติ? โน.

(ข) โย วา ปน อนญฺญาตญฺญสฺสามีตินฺทฺริยํ ภาเวติ โส โทมนสฺสินฺทฺริยํ ปชหตีติ? โน.

(ก) โย โทมนสฺสินฺทฺริยํ ปชหติ โส อญฺญินฺทฺริยํ ภาเวตีติ? อามนฺตา.

(ข) โย วา ปน อญฺญินฺทฺริยํ ภาเวติ โส โทมนสฺสินฺทฺริยํ ปชหตีติ?

เทฺว ปุคฺคลา อญฺญินฺทฺริยํ ภาเวนฺติ, โน จ โทมนสฺสินฺทฺริยํ ปชหนฺติ. อนาคามิมคฺคสมงฺคี อญฺญินฺทฺริยญฺจ ภาเวติ โทมนสฺสินฺทฺริยญฺจ ปชหติ.

(ก) โย โทมนสฺสินฺทฺริยํ ปชหติ โส อญฺญาตาวินฺทฺริยํ สจฺฉิกโรตีติ? โน.

(ข) โย วา ปน อญฺญาตาวินฺทฺริยํ สจฺฉิกโรติ โส โทมนสฺสินฺทฺริยํ ปชหตีติ? โน. (โทมนสฺสินฺทฺริยมูลกํ)

๔๓๗. (ก) โย อนญฺญาตญฺญสฺสามีตินฺทฺริยํ ภาเวติ โส อญฺญินฺทฺริยํ ภาเวตีติ? โน.

(ข) โย วา ปน อญฺญินฺทฺริยํ ภาเวติ โส อนญฺญาตญฺญสฺสามีตินฺทฺริยํ ภาเวตีติ? โน.

(ก) โย อนญฺญาตญฺญสฺสามีตินฺทฺริยํ ภาเวติ โส อญฺญาตาวินฺทฺริยํ สจฺฉิกโรตีติ? โน.

(ข) โย วา ปน อญฺญาตาวินฺทฺริยํ สจฺฉิกโรติ โส อนญฺญาตญฺญสฺสามีตินฺทฺริยํ ภาเวตีติ? โน. (อนญฺญาตญฺญสฺสามีตินฺทฺริยมูลกํ)

๔๓๘. (ก) โย อญฺญินฺทฺริยํ ภาเวติ โส อญฺญาตาวินฺทฺริยํ สจฺฉิกโรตีติ? โน.

(ข) โย วา ปน อญฺญาตาวินฺทฺริยํ สจฺฉิกโรติ โส อญฺญินฺทฺริยํ ภาเวตีติ? โน. (อญฺญินฺทฺริยมูลกํ)

(ข) ปจฺจนีกํ

๔๓๙. (ก) โย จกฺขุนฺทฺริยํ น ปริชานาติ โส โทมนสฺสินฺทฺริยํ นปฺปชหตีติ?

อนาคามิมคฺคสมงฺคี จกฺขุนฺทฺริยํ น ปริชานาติ, โน จ โทมนสฺสินฺทฺริยํ นปฺปชหติ. เทฺว มคฺคสมงฺคิโน ฐเปตฺวา อวเสสา ปุคฺคลา จกฺขุนฺทฺริยญฺจ น ปริชานนฺติ โทมนสฺสินฺทฺริยญฺจ นปฺปชหนฺติ.

(ข) โย วา ปน โทมนสฺสินฺทฺริยํ นปฺปชหติ โส จกฺขุนฺทฺริยํ น ปริชานาตีติ?

อคฺคมคฺคสมงฺคี โทมนสฺสินฺทฺริยํ นปฺปชหติ, โน จ จกฺขุนฺทฺริยํ น ปริชานาติ. เทฺว มคฺคสมงฺคิโน ฐเปตฺวา อวเสสา ปุคฺคลา โทมนสฺสินฺทฺริยญฺจ นปฺปชหนฺติ จกฺขุนฺทฺริยญฺจ น ปริชานนฺติ.

(ก) โย จกฺขุนฺทฺริยํ น ปริชานาติ โส อนญฺญาตญฺญสฺสามีตินฺทฺริยํ น ภาเวตีติ?

อฏฺฐมโก จกฺขุนฺทฺริยํ น ปริชานาติ, โน จ อนญฺญาตญฺญสฺสามีตินฺทฺริยํ น ภาเวติ. เทฺว มคฺคสมงฺคิโน ฐเปตฺวา อวเสสา ปุคฺคลา จกฺขุนฺทฺริยญฺจ น ปริชานนฺติ อนญฺญาตญฺญสฺสามีตินฺทฺริยญฺจ น ภาเวนฺติ.

(ข) โย วา ปน อนญฺญาตญฺญสฺสามีตินฺทฺริยํ น ภาเวติ โส จกฺขุนฺทฺริยํ น ปริชานาตีติ?

อคฺคมคฺคสมงฺคี อนญฺญาตญฺญสฺสามีตินฺทฺริยํ น ภาเวติ, โน จ จกฺขุนฺทฺริยํ น ปริชานาติ. เทฺว มคฺคสมงฺคิโน ฐเปตฺวา อวเสสา ปุคฺคลา อนญฺญาตญฺญสฺสามีตินฺทฺริยญฺจ น ภาเวนฺติ จกฺขุนฺทฺริยญฺจ น ปริชานนฺติ.

(ก) โย จกฺขุนฺทฺริยํ น ปริชานาติ โส อญฺญินฺทฺริยํ น ภาเวตีติ?

เทฺว ปุคฺคลา จกฺขุนฺทฺริยํ น ปริชานนฺติ, โน จ อญฺญินฺทฺริยํ น ภาเวนฺติ. ตโย มคฺคสมงฺคิโน ฐเปตฺวา อวเสสา ปุคฺคลา จกฺขุนฺทฺริยญฺจ น ปริชานนฺติ อญฺญินฺทฺริยญฺจ น ภาเวนฺติ.

(ข) โย วา ปน อญฺญินฺทฺริยํ น ภาเวติ โส จกฺขุนฺทฺริยํ น ปริชานาตีติ? อามนฺตา.

(ก) โย จกฺขุนฺทฺริยํ น ปริชานาติ โส อญฺญาตาวินฺทฺริยํ น สจฺฉิกโรตีติ?

โย อคฺคผลํ สจฺฉิกโรติ โส จกฺขุนฺทฺริยํ น ปริชานาติ, โน จ อญฺญาตาวินฺทฺริยํ น สจฺฉิกโรติ. อคฺคมคฺคสมงฺคิญฺจ อรหนฺตญฺจ ฐเปตฺวา อวเสสา ปุคฺคลา จกฺขุนฺทฺริยญฺจ น ปริชานนฺติ อญฺญาตาวินฺทฺริยญฺจ น สจฺฉิกโรนฺติ.

(ข) โย วา ปน อญฺญาตาวินฺทฺริยํ น สจฺฉิกโรติ โส จกฺขุนฺทฺริยํ น ปริชานาตีติ?

อคฺคมคฺคสมงฺคี อญฺญาตาวินฺทฺริยํ น สจฺฉิกโรติ, โน จ จกฺขุนฺทฺริยํ น ปริชานาติ. อคฺคมคฺคสมงฺคิญฺจ อรหนฺตญฺจ ฐเปตฺวา อวเสสา ปุคฺคลา อญฺญาตาวินฺทฺริยญฺจ น สจฺฉิกโรนฺติ จกฺขุนฺทฺริยญฺจ น ปริชานนฺติ. (จกฺขุนฺทฺริยมูลกํ)

๔๔๐. (ก) โย โทมนสฺสินฺทฺริยํ นปฺปชหติ โส อนญฺญาตญฺญสฺสามีตินฺทฺริยํ น ภาเวตีติ?

อฏฺฐมโก โทมนสฺสินฺทฺริยํ นปฺปชหติ, โน จ อนญฺญาตญฺญสฺสามีตินฺทฺริยํ น ภาเวติ. เทฺว มคฺคสมงฺคิโน ฐเปตฺวา อวเสสา ปุคฺคลา โทมนสฺสินฺทฺริยญฺจ นปฺปชหนฺติ อนญฺญาตญฺญสฺสามีตินฺทฺริยญฺจ น ภาเวนฺติ.

(ข) โย วา ปน อนญฺญาตญฺญสฺสามีตินฺทฺริยํ น ภาเวติ โส โทมนสฺสินฺทฺริยํ นปฺปชหตีติ?

อนาคามิมคฺคสมงฺคี อนญฺญาตญฺญสฺสามีตินฺทฺริยํ น ภาเวติ, โน จ โทมนสฺสินฺทฺริยํ นปฺปชหติ. เทฺว มคฺคสมงฺคิโน ฐเปตฺวา อวเสสา ปุคฺคลา อนญฺญาตญฺญสฺสามีตินฺทฺริยญฺจ น ภาเวนฺติ โทมนสฺสินฺทฺริยญฺจ นปฺปชหนฺติ.

(ก) โย โทมนสฺสินฺทฺริยํ นปฺปชหติ โส อญฺญินฺทฺริยํ น ภาเวตีติ?

เทฺว ปุคฺคลา โทมนสฺสินฺทฺริยํ นปฺปชหนฺติ, โน จ อญฺญินฺทฺริยํ น ภาเวนฺติ. ตโย มคฺคสมงฺคิโน ฐเปตฺวา อวเสสา ปุคฺคลา โทมนสฺสินฺทฺริยญฺจ นปฺปชหนฺติ อญฺญินฺทฺริยญฺจ น ภาเวนฺติ.

(ข) โย วา ปน อญฺญินฺทฺริยํ น ภาเวติ โส โทมนสฺสินฺทฺริยํ นปฺปชหตีติ? อามนฺตา.

(ก) โย โทมนสฺสินฺทฺริยํ นปฺปชหติ โส อญฺญาตาวินฺทฺริยํ น สจฺฉิกโรตีติ?

โย อคฺคผลํ สจฺฉิกโรติ โส โทมนสฺสินฺทฺริยํ นปฺปชหติ, โน จ อญฺญาตาวินฺทฺริยํ น สจฺฉิกโรติ. อนาคามิมคฺคสมงฺคิญฺจ อรหนฺตญฺจ ฐเปตฺวา อวเสสา ปุคฺคลา โทมนสฺสินฺทฺริยญฺจ นปฺปชหนฺติ อญฺญาตาวินฺทฺริยญฺจ น สจฺฉิกโรนฺติ.

(ข) โย วา ปน อญฺญาตาวินฺทฺริยํ น สจฺฉิกโรติ โส โทมนสฺสินฺทฺริยํ นปฺปชหตีติ?

อนาคามิมคฺคสมงฺคี อญฺญาตาวินฺทฺริยํ น สจฺฉิกโรติ, โน จ โทมนสฺสินฺทฺริยํ นปฺปชหติ. อนาคามิมคฺคสมงฺคิญฺจ อรหนฺตญฺจ ฐเปตฺวา อวเสสา ปุคฺคลา อญฺญาตาวินฺทฺริยญฺจ น สจฺฉิกโรนฺติ โทมนสฺสินฺทฺริยญฺจ นปฺปชหนฺติ. (โทมนสฺสินฺทฺริยมูลกํ)

๔๔๑. (ก) โย อนญฺญาตญฺญสฺสามีตินฺทฺริยํ น ภาเวติ โส อญฺญินฺทฺริยํ น ภาเวตีติ?

ตโย มคฺคสมงฺคิโน [ตโย ปุคฺคลา (ปี.)] อนญฺญาตญฺญสฺสามีตินฺทฺริยํ น ภาเวนฺติ, โน จ อญฺญินฺทฺริยํ น ภาเวนฺติ. จตฺตาโร มคฺคสมงฺคิโน [อฏฺฐมกญฺจ ตโย มคฺคสมงฺคิโน จ (ปี.)] ฐเปตฺวา อวเสสา ปุคฺคลา อนญฺญาตญฺญสฺสามีตินฺทฺริยญฺจ น ภาเวนฺติ อญฺญินฺทฺริยญฺจ น ภาเวนฺติ.

(ข) โย วา ปน อญฺญินฺทฺริยํ น ภาเวติ โส อนญฺญาตญฺญสฺสามีตินฺทฺริยํ น ภาเวตีติ?

อฏฺฐมโก อญฺญินฺทฺริยํ น ภาเวติ, โน จ อนญฺญาตญฺญสฺสามีตินฺทฺริยํ น ภาเวติ. จตฺตาโร มคฺคสมงฺคิโน ฐเปตฺวา อวเสสา ปุคฺคลา อญฺญินฺทฺริยญฺจ น ภาเวนฺติ อนญฺญาตญฺญสฺสามีตินฺทฺริยญฺจ น ภาเวนฺติ.

(ก) โย อนญฺญาตญฺญสฺสามีตินฺทฺริยํ น ภาเวติ โส อญฺญาตาวินฺทฺริยํ น สจฺฉิกโรตีติ?

โย อคฺคผลํ สจฺฉิกโรติ โส อนญฺญาตญฺญสฺสามีตินฺทฺริยํ น ภาเวติ, โน จ อญฺญาตาวินฺทฺริยํ น สจฺฉิกโรติ. อฏฺฐมกญฺจ อรหนฺตญฺจ ฐเปตฺวา อวเสสา ปุคฺคลา อนญฺญาตญฺญสฺสามีตินฺทฺริยญฺจ น ภาเวนฺติ อญฺญาตาวินฺทฺริยญฺจ น สจฺฉิกโรนฺติ.

(ข) โย วา ปน อญฺญาตาวินฺทฺริยํ น สจฺฉิกโรติ โส อนญฺญาตญฺญสฺสามีตินฺทฺริยํ น ภาเวตีติ?

อฏฺฐมโก อญฺญาตาวินฺทฺริยํ น สจฺฉิกโรติ, โน จ อนญฺญาตญฺญสฺสามีตินฺทฺริยํ น ภาเวติ. อฏฺฐมกญฺจ อรหนฺตญฺจ ฐเปตฺวา อวเสสา ปุคฺคลา อญฺญาตาวินฺทฺริยญฺจ น สจฺฉิกโรนฺติ อนญฺญาตญฺญสฺสามีตินฺทฺริยญฺจ น ภาเวนฺติ. (อนญฺญาตญฺญสฺสามีตินฺทฺริยมูลกํ)

๔๔๒. (ก) โย อญฺญินฺทฺริยํ น ภาเวติ โส อญฺญาตาวินฺทฺริยํ น สจฺฉิกโรตีติ?

โย อคฺคผลํ สจฺฉิกโรติ โส อญฺญินฺทฺริยํ น ภาเวติ, โน จ อญฺญาตาวินฺทฺริยํ น สจฺฉิกโรติ. ตโย มคฺคสมงฺคิโน จ อรหนฺตญฺจ ฐเปตฺวา อวเสสา ปุคฺคลา อญฺญินฺทฺริยญฺจ น ภาเวนฺติ อญฺญาตาวินฺทฺริยญฺจ น สจฺฉิกโรนฺติ.

(ข) โย วา ปน อญฺญาตาวินฺทฺริยํ น สจฺฉิกโรติ โส อญฺญินฺทฺริยํ น ภาเวตีติ?

ตโย มคฺคสมงฺคิโน อญฺญาตาวินฺทฺริยํ น สจฺฉิกโรนฺติ, โน จ อญฺญินฺทฺริยํ น ภาเวนฺติ. ตโย มคฺคสมงฺคิโน จ อรหนฺตญฺจ ฐเปตฺวา อวเสสา ปุคฺคลา อญฺญาตาวินฺทฺริยญฺจ น สจฺฉิกโรนฺติ อญฺญินฺทฺริยญฺจ น ภาเวนฺติ. (อญฺญินฺทฺริยมูลกํ)