๕. ปจฺจุปฺปนฺนานาคตวาโร

๒๕๓. (ก) โย จกฺขายตนํ ปริชานาติ โส โสตายตนํ ปริชานิสฺสตีติ? โน.

(ข) โย วา ปน โสตายตนํ ปริชานิสฺสติ โส จกฺขายตนํ ปริชานาตีติ? โน.

(ก) โย จกฺขายตนํ น ปริชานาติ โส โสตายตนํ น ปริชานิสฺสตีติ?

เย มคฺคํ ปฏิลภิสฺสนฺติ เต จกฺขายตนํ น ปริชานนฺติ, โน จ โสตายตนํ น ปริชานิสฺสนฺติ. อรหา เย จ ปุถุชฺชนา มคฺคํ น ปฏิลภิสฺสนฺติ เต จกฺขายตนญฺจ น ปริชานนฺติ โสตายตนญฺจ น ปริชานิสฺสนฺติ.

(ข) โย วา ปน โสตายตนํ น ปริชานิสฺสติ โส จกฺขายตนํ น ปริชานาตีติ?

อคฺคมคฺคสมงฺคี โสตายตนํ น ปริชานิสฺสติ, โน จ จกฺขายตนํ น ปริชานาติ. อรหา เย จ ปุถุชฺชนา มคฺคํ น ปฏิลภิสฺสนฺติ เต โสตายตนญฺจ น ปริชานิสฺสนฺติ จกฺขายตนญฺจ น ปริชานนฺติ.