๑. ปทโสธนวาโร

(ก) อนุโลมํ

๒๖. (ก) รูปํ รูปกฺขนฺโธติ?

ปิยรูปํ สาตรูปํ รูปํ, น รูปกฺขนฺโธ. รูปกฺขนฺโธ รูปญฺเจว รูปกฺขนฺโธ จ.

(ข) รูปกฺขนฺโธ รูปนฺติ? อามนฺตา.

(ก) เวทนา เวทนากฺขนฺโธติ? อามนฺตา.

(ข) เวทนากฺขนฺโธ เวทนาติ? อามนฺตา.

(ก) สญฺญา สญฺญากฺขนฺโธติ?

ทิฏฺฐิสญฺญา สญฺญา, น สญฺญากฺขนฺโธ. สญฺญากฺขนฺโธ สญฺญา เจว สญฺญากฺขนฺโธ จ.

(ข) สญฺญากฺขนฺโธ สญฺญาติ? อามนฺตา.

(ก) สงฺขารา สงฺขารกฺขนฺโธติ?

สงฺขารกฺขนฺธํ ฐเปตฺวา อวเสสา สงฺขารา [อวเสสา สงฺขารา สงฺขารา (สฺยา.)], น สงฺขารกฺขนฺโธ. สงฺขารกฺขนฺโธ สงฺขารา เจว สงฺขารกฺขนฺโธ จ.

(ข) สงฺขารกฺขนฺโธ สงฺขาราติ? อามนฺตา.

(ก) วิญฺญาณํ วิญฺญาณกฺขนฺโธติ? อามนฺตา.

(ข) วิญฺญาณกฺขนฺโธ วิญฺญาณนฺติ? อามนฺตา.

(ข) ปจฺจนีกํ

๒๗. (ก) น รูปํ น รูปกฺขนฺโธติ? อามนฺตา.

(ข) น รูปกฺขนฺโธ น รูปนฺติ?

ปิยรูปํ สาตรูปํ น รูปกฺขนฺโธ, รูปํ. รูปญฺจ รูปกฺขนฺธญฺจ ฐเปตฺวา อวเสสา น เจว รูปํ น จ รูปกฺขนฺโธ.

(ก) น เวทนา น เวทนากฺขนฺโธติ? อามนฺตา.

(ข) น เวทนากฺขนฺโธ น เวทนาติ? อามนฺตา.

(ก) น สญฺญา น สญฺญากฺขนฺโธติ? อามนฺตา.

(ข) น สญฺญากฺขนฺโธ น สญฺญาติ?

ทิฏฺฐิสญฺญา น สญฺญากฺขนฺโธ, สญฺญา. สญฺญญฺจ สญฺญากฺขนฺธญฺจ ฐเปตฺวา อวเสสา น เจว สญฺญา น จ สญฺญากฺขนฺโธ.

(ก) น สงฺขารา น สงฺขารกฺขนฺโธติ? อามนฺตา.

(ข) น สงฺขารกฺขนฺโธ น สงฺขาราติ?

สงฺขารกฺขนฺธํ ฐเปตฺวา อวเสสา น สงฺขารกฺขนฺโธ, สงฺขารา. สงฺขาเร จ สงฺขารกฺขนฺธญฺจ ฐเปตฺวา อวเสสา น เจว สงฺขารา น จ สงฺขารกฺขนฺโธ.

(ก) น วิญฺญาณํ น วิญฺญาณกฺขนฺโธติ? อามนฺตา.

(ข) น วิญฺญาณกฺขนฺโธ น วิญฺญาณนฺติ? อามนฺตา.