(๔) มูลมูลกนโย

๙๕. (ก) เย เกจิ นามา ธมฺมา, สพฺเพ เต นามมูลมูลกาติ?

อเหตุกํ นามํ น นามมูลมูลกํ. สเหตุกํ นามํ นามมูลมูลกํ.

(ข) เย วา ปน นามมูลมูลกา, สพฺเพ เต ธมฺมา นามาติ?

นามสมุฏฺฐานํ รูปํ นามมูลมูลกํ, น นามํ. นามํ นามมูลมูลกญฺเจว นามญฺจ.

๙๖. (ก) เย เกจิ นามา ธมฺมา, สพฺเพ เต นามมูเลน เอกมูลมูลกาติ?

อเหตุกํ นามํ นามมูเลน น เอกมูลมูลกํ. สเหตุกํ นามํ นามมูเลน เอกมูลมูลกํ.

(ข) เย วา ปน นามมูเลน เอกมูลมูลกา, สพฺเพ เต ธมฺมา นามาติ?

นามสมุฏฺฐานํ รูปํ นามมูเลน เอกมูลมูลกํ, น นามํ. นามํ นามมูเลน เอกมูลมูลกญฺเจว นามญฺจ.

๙๗. (ก) เย เกจิ นามมูเลน เอกมูลมูลกา ธมฺมา, สพฺเพ เต นามมูเลน อญฺญมญฺญมูลมูลกาติ?

มูลานิ ยานิ เอกโต อุปฺปชฺชนฺติ นามมูลานิ เอกมูลมูลกานิ เจว อญฺญมญฺญมูลมูลกานิ จ. อวเสสา นามมูลสหชาตา ธมฺมา นามมูเลน เอกมูลมูลกา, น จ อญฺญมญฺญมูลมูลกา.

(ข) เย วา ปน นามมูเลน อญฺญมญฺญมูลมูลกา, สพฺเพ เต ธมฺมา นามาติ?

อามนฺตา.

มูลวารนิทฺเทโส.