(๓) มูลกนโย

๖๘. (ก) เย เกจิ อกุสลา ธมฺมา, สพฺเพ เต อกุสลมูลกาติ?

อเหตุกํ อกุสลํ น อกุสลมูลกํ. สเหตุกํ อกุสลํ อกุสลมูลกํ.

(ข) เย วา ปน อกุสลมูลกา, สพฺเพ เต ธมฺมา อกุสลาติ?

อกุสลสมุฏฺฐานํ รูปํ อกุสลมูลกํ น อกุสลํ. อกุสลํ อกุสลมูลกญฺเจว อกุสลญฺจ.

๖๙. (ก) เย เกจิ อกุสลา ธมฺมา, สพฺเพ เต อกุสลมูเลน เอกมูลกาติ?

อเหตุกํ อกุสลํ อกุสลมูเลน น เอกมูลกํ. สเหตุกํ อกุสลํ อกุสลมูเลน เอกมูลกํ.

(ข) เย วา ปน อกุสลมูเลน เอกมูลกา, สพฺเพ เต ธมฺมา อกุสลาติ?

อกุสลสมุฏฺฐานํ รูปํ อกุสลมูเลน เอกมูลกํ, น อกุสลํ. อกุสลํ อกุสลมูเลน เอกมูลกญฺเจว อกุสลญฺจ.

๗๐. (ก) เย เกจิ อกุสลมูเลน เอกมูลกา ธมฺมา, สพฺเพ เต อกุสลมูเลน อญฺญมญฺญมูลกาติ?

มูลานิ ยานิ เอกโต อุปฺปชฺชนฺติ อกุสลมูลานิ เอกมูลกานิ เจว อญฺญมญฺญมูลกานิ จ. อวเสสา อกุสลมูลสหชาตา ธมฺมา อกุสลมูเลน เอกมูลกา น จ อญฺญมญฺญมูลกา.

(ข) เย วา ปน อกุสลมูเลน อญฺญมญฺญมูลกา, สพฺเพ เต ธมฺมา อกุสลาติ? อามนฺตา.