(๓) มูลกนโย

๕๖. (ก) เย เกจิ กุสลา ธมฺมา, สพฺเพ เต กุสลมูลกาติ? อามนฺตา.

(ข) เย วา ปน กุสลมูลกา, สพฺเพ เต ธมฺมา กุสลาติ?

กุสลสมุฏฺฐานํ รูปํ กุสลมูลกํ น กุสลํ. กุสลํ กุสลมูลกญฺเจว กุสลญฺจ.

๕๗. (ก) เย เกจิ กุสลา ธมฺมา, สพฺเพ เต กุสลมูเลน เอกมูลกาติ? อามนฺตา.

(ข) เย วา ปน กุสลมูเลน เอกมูลกา, สพฺเพ เต ธมฺมา กุสลาติ?

กุสลสมุฏฺฐานํ รูปํ กุสลมูเลน เอกมูลกํ, น กุสลํ. กุสลํ กุสลมูเลน เอกมูลกญฺเจว กุสลญฺจ.

๕๘. (ก) เย เกจิ กุสลมูเลน เอกมูลกา ธมฺมา, สพฺเพ เต กุสลมูเลน อญฺญมญฺญมูลกาติ?

มูลานิ ยานิ เอกโต อุปฺปชฺชนฺติ กุสลมูลานิ เอกมูลกานิ เจว อญฺญมญฺญมูลกานิ จ. อวเสสา กุสลมูลสหชาตา ธมฺมา กุสลมูเลน เอกมูลกา, น จ อญฺญมญฺญมูลกา.

(ข) เย วา ปน กุสลมูเลน อญฺญมญฺญมูลกา, สพฺเพ เต ธมฺมา กุสลาติ? อามนฺตา.