๙. ทิฏฺฐสุตาทิทสฺสนวาโร

๑๐๓๖. ปญฺจนฺนํ ขนฺธานํ กติ ทิฏฺฐา, กติ สุตา, กติ มุตา, กติ วิญฺญาตา, กติ น ทิฏฺฐา น สุตา น มุตา น วิญฺญาตา…เป… สตฺตนฺนํ จิตฺตานํ กติ ทิฏฺฐา, กติ สุตา, กติ มุตา, กติ วิญฺญาตา, กติ น ทิฏฺฐา น สุตา น มุตา น วิญฺญาตา?

๑๐๓๗. รูปกฺขนฺโธ สิยา ทิฏฺโฐ, สิยา สุโต, สิยา มุโต, สิยา วิญฺญาโต, สิยา น ทิฏฺโฐ น สุโต น มุโต, วิญฺญาโต. จตฺตาโร ขนฺธา น ทิฏฺฐา น สุตา น มุตา, วิญฺญาตา.

รูปายตนํ ทิฏฺฐํ, น สุตํ น มุตํ, วิญฺญาตํ. สทฺทายตนํ น ทิฏฺฐํ, สุตํ, น มุตํ, วิญฺญาตํ. คนฺธายตนํ… รสายตนํ… โผฏฺฐพฺพายตนํ น ทิฏฺฐํ น สุตํ, มุตํ, วิญฺญาตํ. สตฺตายตนา น ทิฏฺฐา น สุตา น มุตา, วิญฺญาตา.

รูปธาตุ ทิฏฺฐา, น สุตา น มุตา, วิญฺญาตา. สทฺทธาตุ น ทิฏฺฐา, สุตา, น มุตา, วิญฺญาตา. คนฺธธาตุ… รสธาตุ… โผฏฺฐพฺพธาตุ น ทิฏฺฐา น สุตา, มุตา, วิญฺญาตา. เตรส ธาตุโย น ทิฏฺฐา น สุตา น มุตา, วิญฺญาตา.

ตีณิ สจฺจานิ น ทิฏฺฐา น สุตา น มุตา, วิญฺญาตา. ทุกฺขสจฺจํ สิยา ทิฏฺฐํ, สิยา สุตํ, สิยา มุตํ, สิยา วิญฺญาตํ, สิยา น ทิฏฺฐํ น สุตํ น มุตํ, วิญฺญาตํ.

พาวีสตินฺทฺริยา น ทิฏฺฐา น สุตา น มุตา, วิญฺญาตา. นว เหตู น ทิฏฺฐา น สุตา น มุตา, วิญฺญาตา. จตฺตาโร อาหารา น ทิฏฺฐา น สุตา น มุตา, วิญฺญาตา. สตฺต ผสฺสา น ทิฏฺฐา น สุตา น มุตา, วิญฺญาตา. สตฺต เวทนา… สตฺต สญฺญา… สตฺต เจตนา… สตฺต จิตฺตา น ทิฏฺฐา น สุตา น มุตา, วิญฺญาตา.