๔. ปริยาปนฺนาปริยาปนฺนํ

๑๐๐๕. ปญฺจนฺนํ ขนฺธานํ กติ ปริยาปนฺนา, กติ อปริยาปนฺนา…เป… สตฺตนฺนํ จิตฺตานํ กติ ปริยาปนฺนา, กติ อปริยาปนฺนา?

๑๐๐๖. รูปกฺขนฺโธ ปริยาปนฺโน; จตฺตาโร ขนฺธา สิยา ปริยาปนฺนา, สิยา อปริยาปนฺนา.

ทสายตนา ปริยาปนฺนา; เทฺว อายตนา สิยา ปริยาปนฺนา, สิยา อปริยาปนฺนา.

โสฬส ธาตุโย ปริยาปนฺนา; เทฺว ธาตุโย สิยา ปริยาปนฺนา, สิยา อปริยาปนฺนา.

เทฺว สจฺจา ปริยาปนฺนา; เทฺว สจฺจา อปริยาปนฺนา.

ทสินฺทฺริยา ปริยาปนฺนา, ตีณินฺทฺริยา อปริยาปนฺนา; นวินฺทฺริยา สิยา ปริยาปนฺนา, สิยา อปริยาปนฺนา.

ตโย อกุสลเหตู ปริยาปนฺนา; ฉ เหตู สิยา ปริยาปนฺนา, สิยา อปริยาปนฺนา.

กพฬีกาโร อาหาโร ปริยาปนฺโน; ตโย อาหารา สิยา ปริยาปนฺนา, สิยา อปริยาปนฺนา.

ฉ ผสฺสา ปริยาปนฺนา; มโนวิญฺญาณธาตุสมฺผสฺโส สิยา ปริยาปนฺโน, สิยา อปริยาปนฺโน.

ฉ เวทนา…เป… ฉ สญฺญา… ฉ เจตนา… ฉ จิตฺตา ปริยาปนฺนา; มโนวิญฺญาณธาตุ สิยา ปริยาปนฺนา, สิยา อปริยาปนฺนา.