๓. สญฺญากฺขนฺโธ

๖๒. ตตฺถ กตโม สญฺญากฺขนฺโธ? เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สเหตุโก, อตฺถิ อเหตุโก.

ติวิเธน สญฺญากฺขนฺโธ – อตฺถิ กุสโล, อตฺถิ อกุสโล, อตฺถิ อพฺยากโต.

จตุพฺพิเธน สญฺญากฺขนฺโธ – อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน.

ปญฺจวิเธน สญฺญากฺขนฺโธ – อตฺถิ สุขินฺทฺริยสมฺปยุตฺโต, อตฺถิ ทุกฺขินฺทฺริยสมฺปยุตฺโต, อตฺถิ โสมนสฺสินฺทฺริยสมฺปยุตฺโต, อตฺถิ โทมนสฺสินฺทฺริยสมฺปยุตฺโต, อตฺถิ อุเปกฺขินฺทฺริยสมฺปยุตฺโต. เอวํ ปญฺจวิเธน สญฺญากฺขนฺโธ.

ฉพฺพิเธน สญฺญากฺขนฺโธ – จกฺขุสมฺผสฺสชา สญฺญา, โสตสมฺผสฺสชา สญฺญา, ฆานสมฺผสฺสชา สญฺญา, ชิวฺหาสมฺผสฺสชา สญฺญา, กายสมฺผสฺสชา สญฺญา, มโนสมฺผสฺสชา สญฺญา. เอวํ ฉพฺพิเธน สญฺญากฺขนฺโธ.

สตฺตวิเธน สญฺญากฺขนฺโธ – จกฺขุสมฺผสฺสชา สญฺญา, โสตสมฺผสฺสชา สญฺญา, ฆานสมฺผสฺสชา สญฺญา, ชิวฺหาสมฺผสฺสชา สญฺญา, กายสมฺผสฺสชา สญฺญา, มโนธาตุสมฺผสฺสชา สญฺญา, มโนวิญฺญาณธาตุสมฺผสฺสชา สญฺญา. เอวํ สตฺตวิเธน สญฺญากฺขนฺโธ.

อฏฺฐวิเธน สญฺญากฺขนฺโธ – จกฺขุสมฺผสฺสชา สญฺญา…เป… กายสมฺผสฺสชา สญฺญา อตฺถิ สุขสหคตา, อตฺถิ ทุกฺขสหคตา, มโนธาตุสมฺผสฺสชา สญฺญา, มโนวิญฺญาณธาตุสมฺผสฺสชา สญฺญา. เอวํ อฏฺฐวิเธน สญฺญากฺขนฺโธ.

นววิเธน สญฺญากฺขนฺโธ – จกฺขุสมฺผสฺสชา สญฺญา…เป… กายสมฺผสฺสชา สญฺญา, มโนธาตุสมฺผสฺสชา สญฺญา, มโนวิญฺญาณธาตุสมฺผสฺสชา สญฺญา อตฺถิ กุสลา, อตฺถิ อกุสลา, อตฺถิ อพฺยากตา. เอวํ นววิเธน สญฺญากฺขนฺโธ.

ทสวิเธน สญฺญากฺขนฺโธ – จกฺขุสมฺผสฺสชา สญฺญา…เป… กายสมฺผสฺสชา สญฺญา อตฺถิ สุขสหคตา, อตฺถิ ทุกฺขสหคตา, มโนธาตุสมฺผสฺสชา สญฺญา, มโนวิญฺญาณธาตุสมฺผสฺสชา สญฺญา อตฺถิ กุสลา, อตฺถิ อกุสลา, อตฺถิ อพฺยากตา. เอวํ ทสวิเธน สญฺญากฺขนฺโธ.

๖๓. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สเหตุโก, อตฺถิ อเหตุโก.

ติวิเธน สญฺญากฺขนฺโธ – อตฺถิ สุขาย เวทนาย สมฺปยุตฺโต, อตฺถิ ทุกฺขาย เวทนาย สมฺปยุตฺโต, อตฺถิ อทุกฺขมสุขาย เวทนาย สมฺปยุตฺโต…เป…. เอวํ ทสวิเธน สญฺญากฺขนฺโธ.

๖๔. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สเหตุโก, อตฺถิ อเหตุโก.

ติวิเธน สญฺญากฺขนฺโธ – อตฺถิ วิปาโก, อตฺถิ วิปากธมฺมธมฺโม, อตฺถิ เนววิปากนวิปากธมฺมธมฺโม. อตฺถิ อุปาทินฺนุปาทานิโย, อตฺถิ อนุปาทินฺนุปาทานิโย, อตฺถิ อนุปาทินฺนอนุปาทานิโย. อตฺถิ สํกิลิฏฺฐสํกิเลสิโก, อตฺถิ อสํกิลิฏฺฐสํกิเลสิโก, อตฺถิ อสํกิลิฏฺฐอสํกิเลสิโก. อตฺถิ สวิตกฺกสวิจาโร, อตฺถิ อวิตกฺกวิจารมตฺโต, อตฺถิ อวิตกฺกอวิจาโร. อตฺถิ ปีติสหคโต, อตฺถิ สุขสหคโต, อตฺถิ อุเปกฺขาสหคโต. อตฺถิ ทสฺสเนน ปหาตพฺโพ, อตฺถิ ภาวนาย ปหาตพฺโพ, อตฺถิ เนว ทสฺสเนน น ภาวนาย ปหาตพฺโพ. อตฺถิ ทสฺสเนน ปหาตพฺพเหตุโก, อตฺถิ ภาวนาย ปหาตพฺพเหตุโก, อตฺถิ เนว ทสฺสเนน น ภาวนาย ปหาตพฺพเหตุโก. อตฺถิ อาจยคามี, อตฺถิ อปจยคามี, อตฺถิ เนวาจยคามินาปจยคามี. อตฺถิ เสกฺโข, อตฺถิ อเสกฺโข, อตฺถิ เนวเสกฺขนาเสกฺโข. อตฺถิ ปริตฺโต, อตฺถิ มหคฺคโต, อตฺถิ อปฺปมาโณ. อตฺถิ ปริตฺตารมฺมโณ, อตฺถิ มหคฺคตารมฺมโณ, อตฺถิ อปฺปมาณารมฺมโณ. อตฺถิ หีโน, อตฺถิ มชฺฌิโม, อตฺถิ ปณีโต. อตฺถิ มิจฺฉตฺตนิยโต, อตฺถิ สมฺมตฺตนิยโต, อตฺถิ อนิยโต. อตฺถิ มคฺคารมฺมโณ, อตฺถิ มคฺคเหตุโก, อตฺถิ มคฺคาธิปติ. อตฺถิ อุปฺปนฺโน, อตฺถิ อนุปฺปนฺโน, อตฺถิ อุปฺปาที. อตฺถิ อตีโต, อตฺถิ อนาคโต, อตฺถิ ปจฺจุปฺปนฺโน. อตฺถิ อตีตารมฺมโณ, อตฺถิ อนาคตารมฺมโณ, อตฺถิ ปจฺจุปฺปนฺนารมฺมโณ. อตฺถิ อชฺฌตฺโต, อตฺถิ พหิทฺโธ, อตฺถิ อชฺฌตฺตพหิทฺโธ. อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ…เป… เอวํ ทสวิเธน สญฺญากฺขนฺโธ.

๖๕. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ เหตุสมฺปยุตฺโต, อตฺถิ เหตุวิปฺปยุตฺโต. อตฺถิ น เหตุสเหตุโก, อตฺถิ น เหตุอเหตุโก. อตฺถิ โลกิโย, อตฺถิ โลกุตฺตโร. อตฺถิ เกนจิ วิญฺเญยฺโย, อตฺถิ เกนจิ น วิญฺเญยฺโย. อตฺถิ สาสโว, อตฺถิ อนาสโว. อตฺถิ อาสวสมฺปยุตฺโต, อตฺถิ อาสววิปฺปยุตฺโต. อตฺถิ อาสววิปฺปยุตฺตสาสโว, อตฺถิ อาสววิปฺปยุตฺตอนาสโว. อตฺถิ สํโยชนิโย, อตฺถิ อสํโยชนิโย. อตฺถิ สํโยชนสมฺปยุตฺโต, อตฺถิ สํโยชนวิปฺปยุตฺโต. อตฺถิ สํโยชนวิปฺปยุตฺตสํโยชนิโย, อตฺถิ สํโยชนวิปฺปยุตฺตอสํโยชนิโย. อตฺถิ คนฺถนิโย, อตฺถิ อคนฺถนิโย. อตฺถิ คนฺถสมฺปยุตฺโต, อตฺถิ คนฺถวิปฺปยุตฺโต. อตฺถิ คนฺถวิปฺปยุตฺตคนฺถนิโย, อตฺถิ คนฺถวิปฺปยุตฺตอคนฺถนิโย. อตฺถิ โอฆนิโย, อตฺถิ อโนฆนิโย. อตฺถิ โอฆสมฺปยุตฺโต, อตฺถิ โอฆวิปฺปยุตฺโต. อตฺถิ โอฆวิปฺปยุตฺตโอฆนิโย, อตฺถิ โอฆวิปฺปยุตฺตอโนฆนิโย. อตฺถิ โยคนิโย, อตฺถิ อโยคนิโย. อตฺถิ โยคสมฺปยุตฺโต, อตฺถิ โยควิปฺปยุตฺโต. อตฺถิ โยควิปฺปยุตฺตโยคนิโย, อตฺถิ โยควิปฺปยุตฺตอโยคนิโย. อตฺถิ นีวรณิโย, อตฺถิ อนีวรณิโย. อตฺถิ นีวรณสมฺปยุตฺโต, อตฺถิ นีวรณวิปฺปยุตฺโต. อตฺถิ นีวรณวิปฺปยุตฺตนีวรณิโย, อตฺถิ นีวรณวิปฺปยุตฺตอนีวรณิโย. อตฺถิ ปรามฏฺโฐ, อตฺถิ อปรามฏฺโฐ. อตฺถิ ปรามาสสมฺปยุตฺโต, อตฺถิ ปรามาสวิปฺปยุตฺโต. อตฺถิ ปรามาสวิปฺปยุตฺตปรามฏฺโฐ, อตฺถิ ปรามาสวิปฺปยุตฺตอปรามฏฺโฐ. อตฺถิ อุปาทินฺโน, อตฺถิ อนุปาทินฺโน. อตฺถิ อุปาทานิโย, อตฺถิ อนุปาทานิโย. อตฺถิ อุปาทานสมฺปยุตฺโต, อตฺถิ อุปาทานวิปฺปยุตฺโต. อตฺถิ อุปาทานวิปฺปยุตฺตอุปาทานิโย, อตฺถิ อุปาทานวิปฺปยุตฺตอนุปาทานิโย. อตฺถิ สํกิเลสิโก, อตฺถิ อสํกิเลสิโก. อตฺถิ สํกิลิฏฺโฐ, อตฺถิ อสํกิลิฏฺโฐ. อตฺถิ กิเลสสมฺปยุตฺโต, อตฺถิ กิเลสวิปฺปยุตฺโต. อตฺถิ กิเลสวิปฺปยุตฺตสํกิเลสิโก, อตฺถิ กิเลสวิปฺปยุตฺตอสํกิเลสิโก. อตฺถิ ทสฺสเนน ปหาตพฺโพ, อตฺถิ น ทสฺสเนน ปหาตพฺโพ. อตฺถิ ภาวนาย ปหาตพฺโพ, อตฺถิ น ภาวนาย ปหาตพฺโพ. อตฺถิ ทสฺสเนน ปหาตพฺพเหตุโก, อตฺถิ น ทสฺสเนน ปหาตพฺพเหตุโก. อตฺถิ ภาวนาย ปหาตพฺพเหตุโก, อตฺถิ น ภาวนาย ปหาตพฺพเหตุโก. อตฺถิ สวิตกฺโก, อตฺถิ อวิตกฺโก. อตฺถิ สวิจาโร, อตฺถิ อวิจาโร. อตฺถิ สปฺปีติโก, อตฺถิ อปฺปีติโก. อตฺถิ ปีติสหคโต, อตฺถิ น ปีติสหคโต. อตฺถิ สุขสหคโต, อตฺถิ น สุขสหคโต. อตฺถิ อุเปกฺขาสหคโต, อตฺถิ น อุเปกฺขาสหคโต. อตฺถิ กามาวจโร, อตฺถิ น กามาวจโร. อตฺถิ รูปาวจโร, อตฺถิ น รูปาวจโร. อตฺถิ อรูปาวจโร, อตฺถิ น อรูปาวจโร. อตฺถิ ปริยาปนฺโน, อตฺถิ อปริยาปนฺโน. อตฺถิ นิยฺยานิโก, อตฺถิ อนิยฺยานิโก. อตฺถิ นิยโต, อตฺถิ อนิยโต. อตฺถิ สอุตฺตโร, อตฺถิ อนุตฺตโร. อตฺถิ สรโณ, อตฺถิ อรโณ.

ติวิเธน สญฺญากฺขนฺโธ – อตฺถิ กุสโล, อตฺถิ อกุสโล, อตฺถิ อพฺยากโต…เป…. เอวํ ทสวิเธน สญฺญากฺขนฺโธ.

๖๖. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สรโณ, อตฺถิ อรโณ.

ติวิเธน สญฺญากฺขนฺโธ – อตฺถิ สุขาย เวทนาย สมฺปยุตฺโต, อตฺถิ ทุกฺขาย เวทนาย สมฺปยุตฺโต, อตฺถิ อทุกฺขมสุขาย เวทนาย สมฺปยุตฺโต. อตฺถิ วิปาโก…เป… อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ…เป…. เอวํ ทสวิเธน สญฺญากฺขนฺโธ.

(ยถา กุสลตฺติเก วิตฺถาโร, เอวํ สพฺเพปิ ติกา วิตฺถาเรตพฺพา.)

ทุกมูลกํ.

๖๗. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สเหตุโก, อตฺถิ อเหตุโก.

๖๘. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ เหตุสมฺปยุตฺโต, อตฺถิ เหตุวิปฺปยุตฺโต…เป… อตฺถิ สรโณ, อตฺถิ อรโณ.

๖๙. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สเหตุโก, อตฺถิ อเหตุโก.

๗๐. เอกวิเธน สญฺญากฺขนฺโธ – ผสฺสสมฺปยุตฺโต.

ติวิเธน สญฺญากฺขนฺโธ…เป… อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ…เป…. เอวํ ทสวิเธน สญฺญากฺขนฺโธ.

ติกมูลกํ.

๗๑. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สเหตุโก, อตฺถิ อเหตุโก.

๗๒. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ เหตุสมฺปยุตฺโต, อตฺถิ เหตุวิปฺปยุตฺโต.

๗๓. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ น เหตุ สเหตุโก, อตฺถิ น เหตุ อเหตุโก.

ติวิเธน สญฺญากฺขนฺโธ – อตฺถิ วิปาโก, อตฺถิ วิปากธมฺมธมฺโม, อตฺถิ เนววิปากนวิปากธมฺมธมฺโม…เป…. เอวํ ทสวิเธน สญฺญากฺขนฺโธ.

๗๔. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ โลกิโย, อตฺถิ โลกุตฺตโร.

ติวิเธน สญฺญากฺขนฺโธ – อตฺถิ อุปาทินฺนุปาทานิโย, อตฺถิ อนุปาทินฺนุปาทานิโย, อตฺถิ อนุปาทินฺนอนุปาทานิโย…เป…. เอวํ ทสวิเธน สญฺญากฺขนฺโธ.

๗๕. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ เกนจิ วิญฺเญยฺโย, อตฺถิ เกนจิ น วิญฺเญยฺโย.

ติวิเธน สญฺญากฺขนฺโธ – อตฺถิ สํกิลิฏฺฐสํกิเลสิโก, อตฺถิ อสํกิลิฏฺฐสํกิเลสิโก, อตฺถิ อสํกิลิฏฺฐอสํกิเลสิโก…เป…. เอวํ ทสวิเธน สญฺญากฺขนฺโธ.

๗๖. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สาสโว, อตฺถิ อนาสโว.

ติวิเธน สญฺญากฺขนฺโธ – อตฺถิ สวิตกฺกสวิจาโร, อตฺถิ อวิตกฺกวิจารมตฺโต, อตฺถิ อวิตกฺกอวิจาโร…เป…. เอวํ ทสวิเธน สญฺญากฺขนฺโธ.

๗๗. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ อาสวสมฺปยุตฺโต, อตฺถิ อาสววิปฺปยุตฺโต.

ติวิเธน สญฺญากฺขนฺโธ – อตฺถิ ปีติสหคโต, อตฺถิ สุขสหคโต, อตฺถิ อุเปกฺขาสหคโต…เป…. เอวํ ทสวิเธน สญฺญากฺขนฺโธ.

๗๘. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ อาสววิปฺปยุตฺตสาสโว, อตฺถิ อาสววิปฺปยุตฺตอนาสโว.

ติวิเธน สญฺญากฺขนฺโธ – อตฺถิ ทสฺสเนน ปหาตพฺโพ, อตฺถิ ภาวนาย ปหาตพฺโพ, อตฺถิ เนว ทสฺสเนน น ภาวนาย ปหาตพฺโพ…เป…. เอวํ ทสวิเธน สญฺญากฺขนฺโธ.

๗๙. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สํโยชนิโย, อตฺถิ อสํโยชนิโย.

ติวิเธน สญฺญากฺขนฺโธ – อตฺถิ ทสฺสเนน ปหาตพฺพเหตุโก, อตฺถิ ภาวนาย ปหาตพฺพเหตุโก, อตฺถิ เนว ทสฺสเนน น ภาวนาย ปหาตพฺพเหตุโก…เป…. เอวํ ทสวิเธน สญฺญากฺขนฺโธ.

๘๐. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สํโยชนสมฺปยุตฺโต, อตฺถิ สํโยชนวิปฺปยุตฺโต.

ติวิเธน สญฺญากฺขนฺโธ – อตฺถิ อาจยคามี, อตฺถิ อปจยคามี, อตฺถิ เนวาจยคามินาปจยคามี…เป…. เอวํ ทสวิเธน สญฺญากฺขนฺโธ.

๘๑. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ สํโยชนวิปฺปยุตฺตสํโยชนิโย, อตฺถิ สํโยชนวิปฺปยุตฺตอสํโยชนิโย.

ติวิเธน สญฺญากฺขนฺโธ – อตฺถิ เสกฺโข, อตฺถิ อเสกฺโข, อตฺถิ เนวเสกฺขนาเสกฺโข…เป…. เอวํ ทสวิเธน สญฺญากฺขนฺโธ.

๘๒. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ คนฺถนิโย, อตฺถิ อคนฺถนิโย.

ติวิเธน สญฺญากฺขนฺโธ – อตฺถิ ปริตฺโต, อตฺถิ มหคฺคโต, อตฺถิ อปฺปมาโณ…เป…. เอวํ ทสวิเธน สญฺญากฺขนฺโธ.

๘๓. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ คนฺถสมฺปยุตฺโต, อตฺถิ คนฺถวิปฺปยุตฺโต.

ติวิเธน สญฺญากฺขนฺโธ – อตฺถิ ปริตฺตารมฺมโณ, อตฺถิ มหคฺคตารมฺมโณ, อตฺถิ อปฺปมาณารมฺมโณ…เป…. เอวํ ทสวิเธน สญฺญากฺขนฺโธ.

๘๔. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ คนฺถวิปฺปยุตฺตคนฺถนิโย, อตฺถิ คนฺถวิปฺปยุตฺตอคนฺถนิโย.

ติวิเธน สญฺญากฺขนฺโธ – อตฺถิ หีโน, อตฺถิ มชฺฌิโม, อตฺถิ ปณีโต…เป…. เอวํ ทสวิเธน สญฺญากฺขนฺโธ.

๘๕. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ โอฆนิโย, อตฺถิ อโนฆนิโย.

ติวิเธน สญฺญากฺขนฺโธ – อตฺถิ มิจฺฉตฺตนิยโต, อตฺถิ สมฺมตฺตนิยโต, อตฺถิ อนิยโต…เป…. เอวํ ทสวิเธน สญฺญากฺขนฺโธ.

๘๖. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ โอฆสมฺปยุตฺโต, อตฺถิ โอฆวิปฺปยุตฺโต.

ติวิเธน สญฺญากฺขนฺโธ – อตฺถิ มคฺคารมฺมโณ, อตฺถิ มคฺคเหตุโก, อตฺถิ มคฺคาธิปติ…เป…. เอวํ ทสวิเธน สญฺญากฺขนฺโธ.

๘๗. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ โอฆวิปฺปยุตฺตโอฆนิโย, อตฺถิ โอฆวิปฺปยุตฺตอโนฆนิโย.

ติวิเธน สญฺญากฺขนฺโธ – อตฺถิ อุปฺปนฺโน, อตฺถิ อนุปฺปนฺโน, อตฺถิ อุปฺปาที…เป…. เอวํ ทสวิเธน สญฺญากฺขนฺโธ.

๘๘. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ โยคนิโย, อตฺถิ อโยคนิโย.

ติวิเธน สญฺญากฺขนฺโธ – อตฺถิ อตีโต, อตฺถิ อนาคโต, อตฺถิ ปจฺจุปฺปนฺโน…เป…. เอวํ ทสวิเธน สญฺญากฺขนฺโธ.

๘๙. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ โยคสมฺปยุตฺโต, อตฺถิ โยควิปฺปยุตฺโต.

ติวิเธน สญฺญากฺขนฺโธ – อตฺถิ อตีตารมฺมโณ, อตฺถิ อนาคตารมฺมโณ, อตฺถิ ปจฺจุปฺปนฺนารมฺมโณ…เป…. เอวํ ทสวิเธน สญฺญากฺขนฺโธ.

๙๐. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ โยควิปฺปยุตฺตโยคนิโย, อตฺถิ โยควิปฺปยุตฺตอโยคนิโย.

ติวิเธน สญฺญากฺขนฺโธ – อตฺถิ อชฺฌตฺโต, อตฺถิ พหิทฺโธ, อตฺถิ อชฺฌตฺตพหิทฺโธ…เป…. เอวํ ทสวิเธน สญฺญากฺขนฺโธ.

๙๑. เอกวิเธน สญฺญากฺขนฺโธ – ผสฺสสมฺปยุตฺโต.

ทุวิเธน สญฺญากฺขนฺโธ – อตฺถิ นีวรณิโย, อตฺถิ อนีวรณิโย.

ติวิเธน สญฺญากฺขนฺโธ – อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ…เป…. เอวํ ทสวิเธน สญฺญากฺขนฺโธ.

อุภโตวฑฺฒกํ.

สตฺตวิเธน สญฺญากฺขนฺโธ – อตฺถิ กุสโล, อตฺถิ อกุสโล, อตฺถิ อพฺยากโต, อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน. เอวํ สตฺตวิเธน สญฺญากฺขนฺโธ.

อปโรปิ สตฺตวิเธน สญฺญากฺขนฺโธ – อตฺถิ สุขาย เวทนาย สมฺปยุตฺโต, อตฺถิ ทุกฺขาย เวทนาย สมฺปยุตฺโต, อตฺถิ อทุกฺขมสุขาย เวทนาย สมฺปยุตฺโต, อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน…เป… อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ, อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน. เอวํ สตฺตวิเธน สญฺญากฺขนฺโธ.

จตุวีสติวิเธน สญฺญากฺขนฺโธ – จกฺขุสมฺผสฺสปจฺจยา สญฺญากฺขนฺโธ อตฺถิ กุสโล, อตฺถิ อกุสโล, อตฺถิ อพฺยากโต; โสตสมฺผสฺสปจฺจยา…เป… ฆานสมฺผสฺสปจฺจยา…เป… ชิวฺหาสมฺผสฺสปจฺจยา…เป… กายสมฺผสฺสปจฺจยา…เป… มโนสมฺผสฺสปจฺจยา สญฺญากฺขนฺโธ อตฺถิ กุสโล, อตฺถิ อกุสโล, อตฺถิ อพฺยากโต; จกฺขุสมฺผสฺสชา สญฺญา, โสตสมฺผสฺสชา สญฺญา, ฆานสมฺผสฺสชา สญฺญา, ชิวฺหาสมฺผสฺสชา สญฺญา, กายสมฺผสฺสชา สญฺญา, มโนสมฺผสฺสชา สญฺญา. เอวํ จตุวีสติวิเธน สญฺญากฺขนฺโธ.

อปโรปิ จตุวีสติวิเธน สญฺญากฺขนฺโธ – จกฺขุสมฺผสฺสปจฺจยา สญฺญากฺขนฺโธ อตฺถิ สุขาย เวทนาย สมฺปยุตฺโต…เป… อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ, จกฺขุสมฺผสฺสชา สญฺญา…เป… มโนสมฺผสฺสชา สญฺญา. โสตสมฺผสฺสปจฺจยา…เป… ฆานสมฺผสฺสปจฺจยา…เป… ชิวฺหาสมฺผสฺสปจฺจยา…เป… กายสมฺผสฺสปจฺจยา…เป… มโนสมฺผสฺสปจฺจยา สญฺญากฺขนฺโธ อตฺถิ สุขาย เวทนาย สมฺปยุตฺโต…เป… อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ; จกฺขุสมฺผสฺสชา สญฺญา…เป… มโนสมฺผสฺสชา สญฺญา. เอวํ จตุวีสติวิเธน สญฺญากฺขนฺโธ.

ตึสติวิเธน สญฺญากฺขนฺโธ – จกฺขุสมฺผสฺสปจฺจยา สญฺญากฺขนฺโธ อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน, โสตสมฺผสฺสปจฺจยา…เป… ฆานสมฺผสฺสปจฺจยา …เป… ชิวฺหาสมฺผสฺสปจฺจยา…เป… กายสมฺผสฺสปจฺจยา…เป… มโนสมฺผสฺสปจฺจยา สญฺญากฺขนฺโธ อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน, จกฺขุสมฺผสฺสชา สญฺญา…เป… มโนสมฺผสฺสชา สญฺญา. เอวํ ตึสติวิเธน สญฺญากฺขนฺโธ.

พหุวิเธน สญฺญากฺขนฺโธ – จกฺขุสมฺผสฺสปจฺจยา สญฺญากฺขนฺโธ อตฺถิ กุสโล, อตฺถิ อกุสโล, อตฺถิ อพฺยากโต, อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน, โสตสมฺผสฺสปจฺจยา …เป… ฆานสมฺผสฺสปจฺจยา…เป… ชิวฺหาสมฺผสฺสปจฺจยา…เป… กายสมฺผสฺสปจฺจยา…เป… มโนสมฺผสฺสปจฺจยา สญฺญากฺขนฺโธ อตฺถิ กุสโล, อตฺถิ อกุสโล, อตฺถิ อพฺยากโต, อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน, จกฺขุสมฺผสฺสชา สญฺญา…เป… มโนสมฺผสฺสชา สญฺญา. เอวํ พหุวิเธน สญฺญากฺขนฺโธ.

อปโรปิ พหุวิเธน สญฺญากฺขนฺโธ – จกฺขุสมฺผสฺสปจฺจยา สญฺญากฺขนฺโธ อตฺถิ สุขาย เวทนาย สมฺปยุตฺโต…เป… อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ, อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน, โสตสมฺผสฺสปจฺจยา…เป… ฆานสมฺผสฺสปจฺจยา…เป… ชิวฺหาสมฺผสฺสปจฺจยา…เป… กายสมฺผสฺสปจฺจยา…เป… มโนสมฺผสฺสปจฺจยา สญฺญากฺขนฺโธ อตฺถิ อชฺฌตฺตารมฺมโณ, อตฺถิ พหิทฺธารมฺมโณ, อตฺถิ อชฺฌตฺตพหิทฺธารมฺมโณ, อตฺถิ กามาวจโร, อตฺถิ รูปาวจโร, อตฺถิ อรูปาวจโร, อตฺถิ อปริยาปนฺโน, จกฺขุสมฺผสฺสชา สญฺญา, โสตสมฺผสฺสชา สญฺญา, ฆานสมฺผสฺสชา สญฺญา, ชิวฺหาสมฺผสฺสชา สญฺญา, กายสมฺผสฺสชา สญฺญา, มโนสมฺผสฺสชา สญฺญา. เอวํ พหุวิเธน สญฺญากฺขนฺโธ.

อยํ วุจฺจติ สญฺญากฺขนฺโธ.