๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๓๑. นีวรณวิปฺปยุตฺตํ นีวรณิยํ กุสลํ ธมฺมํ ปฏิจฺจ นีวรณวิปฺปยุตฺโต นีวรณิโย กุสโล ธมฺโม อุปฺปชฺชติ เหตุปจฺจยา. (๑)

นีวรณวิปฺปยุตฺตํ อนีวรณิยํ กุสลํ ธมฺมํ ปฏิจฺจ นีวรณวิปฺปยุตฺโต อนีวรณิโย กุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๓๒. เหตุยา เทฺว, อารมฺมเณ เทฺว…เป… อวิคเต เทฺว (สํขิตฺตํ).

(สหชาตวาโรปิ…เป… ปญฺหาวาโรปิ วิตฺถาเรตพฺพา.)

๓๓. นีวรณวิปฺปยุตฺตํ นีวรณิยํ อพฺยากตํ ธมฺมํ ปฏิจฺจ นีวรณวิปฺปยุตฺโต นีวรณิโย อพฺยากโต ธมฺโม อุปฺปชฺชติ เหตุปจฺจยา. (๑)

นีวรณวิปฺปยุตฺตํ อนีวรณิยํ อพฺยากตํ ธมฺมํ ปฏิจฺจ นีวรณวิปฺปยุตฺโต อนีวรณิโย อพฺยากโต ธมฺโม อุปฺปชฺชติ เหตุปจฺจยา… ตีณิ.

นีวรณวิปฺปยุตฺตํ นีวรณิยํ อพฺยากตญฺจ นีวรณวิปฺปยุตฺตํ อนีวรณิยํ อพฺยากตญฺจ ธมฺมํ ปฏิจฺจ นีวรณวิปฺปยุตฺโต นีวรณิโย อพฺยากโต ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๓๔. เหตุยา ปญฺจ, อารมฺมเณ เทฺว…เป… วิปาเก ปญฺจ (สํขิตฺตํ).

(สหชาตวาเรปิ …เป… ปญฺหาวาเรปิ สพฺพตฺถ วิตฺถาเรตพฺพํ.)

นีวรณโคจฺฉกกุสลตฺติกํ นิฏฺฐิตํ.