๑. วิภงฺควาโร

เหตุปจฺจโย

๗๕. กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส เหตุปจฺจเยน ปจฺจโย – กิเลสา เจว สํกิเลสิกา จ เหตู สมฺปยุตฺตกานํ กิเลสานํ เหตุปจฺจเยน ปจฺจโย (เอวํ จตฺตาริ, กิเลสทุกสทิสํ.) (๔)

อารมฺมณปจฺจโย

๗๖. กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส อารมฺมณปจฺจเยน ปจฺจโย – กิเลเส อารพฺภ กิเลสา อุปฺปชฺชนฺติ. (มูลํ กาตพฺพํ.) กิเลเส อารพฺภ สํกิเลสิกา เจว โน จ กิเลสา ขนฺธา อุปฺปชฺชนฺติ. (มูลํ กาตพฺพํ.) กิเลเส อารพฺภ กิเลสา จ สมฺปยุตฺตกา จ ขนฺธา อุปฺปชฺชนฺติ. (๓)

๗๗. สํกิเลสิโก เจว โน จ กิเลโส ธมฺโม สํกิเลสิกสฺส เจว โน จ กิเลสสฺส ธมฺมสฺส อารมฺมณปจฺจเยน ปจฺจโย – ทานํ…เป… สีลํ…เป… อุโปสถกมฺมํ…เป… ปุพฺเพ สุจิณฺณานิ…เป… ฌานา วุฏฺฐหิตฺวา ฌานํ ปจฺจเวกฺขติ, อสฺสาเทติ อภินนฺทติ, ตํ อารพฺภ ราโค อุปฺปชฺชติ…เป… อุทฺธจฺจํ อุปฺปชฺชติ, ฌาเน ปริหีเน วิปฺปฏิสาริสฺส โทมนสฺสํ อุปฺปชฺชติ; อริยา โคตฺรภุํ ปจฺจเวกฺขนฺติ, โวทานํ ปจฺจเวกฺขนฺติ, จกฺขุํ…เป… วตฺถุํ สํกิเลสิเก เจว โน จ กิเลเส ขนฺเธ อนิจฺจโต…เป… โทมนสฺสํ อุปฺปชฺชติ; ทิพฺเพน จกฺขุนา รูปํ ปสฺสติ…เป… อาวชฺชนาย อารมฺมณปจฺจเยน ปจฺจโย (อิตเร เทฺว กิเลสทุกสทิสา, ฆฏนารมฺมณาปิ กิเลสทุกสทิสา).

อธิปติปจฺจโย

๗๘. กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส อธิปติปจฺจเยน ปจฺจโย – อารมฺมณาธิปติ… ตีณิ.

สํกิเลสิโก เจว โน จ กิเลโส ธมฺโม สํกิเลสิกสฺส เจว โน จ กิเลสสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ. อารมฺมณาธิปติ – ทานํ…เป… สีลํ…เป… อุโปสถกมฺมํ…เป… ปุพฺเพ สุจิณฺณานิ…เป… ฌานา วุฏฺฐหิตฺวา ฌานํ ครุํ กตฺวา ปจฺจเวกฺขติ, เสกฺขา โคตฺรภุํ ครุํ กตฺวา ปจฺจเวกฺขนฺติ, โวทานํ ครุํ กตฺวา ปจฺจเวกฺขนฺติ; จกฺขุํ…เป… วตฺถุํ สํกิเลสิเก เจว โน จ กิเลเส ขนฺเธ ครุํ กตฺวา สํกิเลสิกา เจว โน จ กิเลสา ขนฺธา อุปฺปชฺชนฺติ. สหชาตาธิปติ – สํกิเลสิกา เจว โน จ กิเลสาธิปติ สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ อธิปติปจฺจเยน ปจฺจโย. (อิตเร เทฺวปิ กิเลสทุกสทิสา. ฆฏนาธิปติปิ.)

อนนฺตรปจฺจยาทิ

๗๙. กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส อนนฺตรปจฺจเยน ปจฺจโย… ตีณิ (กิเลสทุกสทิสา).

สํกิเลสิโก เจว โน จ กิเลโส ธมฺโม สํกิเลสิกสฺส เจว โน จ กิเลสสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา สํกิเลสิกา เจว โน จ กิเลสา ขนฺธา ปจฺฉิมานํ ปจฺฉิมานํ สํกิเลสิกานญฺเจว โน จ กิเลสานํ ขนฺธานํ อนนฺตรปจฺจเยน ปจฺจโย; อนุโลมํ โคตฺรภุสฺส… อนุโลมํ โวทานสฺส… อาวชฺชนา สํกิเลสิกานญฺเจว โน จ กิเลสานํ ขนฺธานํ อนนฺตรปจฺจเยน ปจฺจโย.

(อิตเร เทฺว อนนฺตรา กิเลสทุกสทิสา, นินฺนานากรณา. ฆฏนานนฺตรมฺปิ สพฺเพ ปจฺจยา กิเลสทุกสทิสา, นินฺนานากรณา. อุปนิสฺสเย โลกุตฺตรํ นตฺถิ, อิทํ ทุกํ กิเลสทุกสทิสํ, นินฺนานากรณํ.)

กิเลสสํกิเลสิกทุกํ นิฏฺฐิตํ.