๑. ปฏิจฺจวาโร

เหตุปจฺจโย

๗๔. กิเลสญฺเจว สํกิเลสิกญฺจ ธมฺมํ ปฏิจฺจ กิเลโส เจว สํกิเลสิโก จ ธมฺโม อุปฺปชฺชติ เหตุปจฺจยา – โลภํ ปฏิจฺจ โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ (จกฺกํ). (๑)

กิเลสญฺเจว สํกิเลสิกญฺจ ธมฺมํ ปฏิจฺจ สํกิเลสิโก เจว โน จ กิเลโส ธมฺโม อุปฺปชฺชติ เหตุปจฺจยา – กิเลเส ปฏิจฺจ สมฺปยุตฺตกา ขนฺธา จิตฺตสมุฏฺฐานญฺจ รูปํ. (๒)

กิเลสญฺเจว สํกิเลสิกญฺจ ธมฺมํ ปฏิจฺจ กิเลโส เจว สํกิเลสิโก จ สํกิเลสิโก เจว โน จ กิเลโส จ ธมฺมา อุปฺปชฺชนฺติ เหตุปจฺจยา – โลภํ ปฏิจฺจ โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ สมฺปยุตฺตกา จ ขนฺธา จิตฺตสมุฏฺฐานญฺจ รูปํ. (๓)