๑-๔. ปจฺจยานุโลมาทิ

เหตุปจฺจโย

๔๙. สํกิลิฏฺฐํ ธมฺมํ สํสฏฺโฐ สํกิลิฏฺโฐ ธมฺโม อุปฺปชฺชติ เหตุปจฺจยา – สํกิลิฏฺฐํ เอกํ ขนฺธํ สํสฏฺฐา ตโย ขนฺธา…เป… เทฺว ขนฺเธ …เป…. (๑)

อสํกิลิฏฺฐํ ธมฺมํ สํสฏฺโฐ อสํกิลิฏฺโฐ ธมฺโม อุปฺปชฺชติ เหตุปจฺจยา – อสํกิลิฏฺฐํ เอกํ ขนฺธํ สํสฏฺฐา ตโย ขนฺธา…เป… เทฺว ขนฺเธ…เป… ปฏิสนฺธิกฺขเณ…เป…. (๑)

เหตุยา เทฺว, อารมฺมเณ เทฺว, อธิปติยา เทฺว (สพฺพตฺถ เทฺว), วิปาเก เอกํ…เป… อวิคเต เทฺว.

อนุโลมํ.

๕๐. สํกิลิฏฺฐํ ธมฺมํ สํสฏฺโฐ สํกิลิฏฺโฐ ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ สํสฏฺโฐ วิจิกิจฺฉาสหคโต อุทฺธจฺจสหคโต โมโห. (๑)

อสํกิลิฏฺฐํ ธมฺมํ สํสฏฺโฐ อสํกิลิฏฺโฐ ธมฺโม อุปฺปชฺชติ นเหตุปจฺจยา – อเหตุกํ อสํกิลิฏฺฐํ เอกํ ขนฺธํ สํสฏฺฐา ตโย ขนฺธา…เป… เทฺว ขนฺเธ…เป… อเหตุกปฏิสนฺธิกฺขเณ…เป…. (๑)

นเหตุยา เทฺว, นอธิปติยา เทฺว, นปุเรชาเต เทฺว, นปจฺฉาชาเต เทฺว, นอาเสวเน เทฺว, นกมฺเม เทฺว, นวิปาเก เทฺว, นฌาเน เอกํ, นมคฺเค เอกํ, นวิปฺปยุตฺเต เทฺว.

ปจฺจนียํ.