๗. ปญฺหาวาโร

ปจฺจยจตุกฺกํ

เหตุปจฺจยาทิ

๙๙. เหตุ อทุกฺขมสุขาย เวทนาย สมฺปยุตฺโต ธมฺโม เหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส เหตุปจฺจเยน ปจฺจโย… ตีณิ.

๑๐๐. เหตุ อทุกฺขมสุขาย เวทนาย สมฺปยุตฺโต ธมฺโม เหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส อารมฺมณปจฺจเยน ปจฺจโย… นว.

๑๐๑. เหตุ อทุกฺขมสุขาย เวทนาย สมฺปยุตฺโต ธมฺโม เหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ… ตีณิ.

นเหตุ อทุกฺขมสุขาย เวทนาย สมฺปยุตฺโต ธมฺโม นเหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ… ตีณิ.

เหตุ อทุกฺขมสุขาย เวทนาย สมฺปยุตฺโต จ นเหตุ อทุกฺขมสุขาย เวทนาย สมฺปยุตฺโต จ ธมฺมา เหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ… ตีณิ (อารมฺมณาธิปติเยว)…เป….

อุปนิสฺสยปจฺจยาทิ

๑๐๒. เหตุ อทุกฺขมสุขาย เวทนาย สมฺปยุตฺโต ธมฺโม เหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย… นว, อาเสวนปจฺจเยน ปจฺจโย… นว.

๑๐๓. นเหตุ อทุกฺขมสุขาย เวทนาย สมฺปยุตฺโต ธมฺโม นเหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส กมฺมปจฺจเยน ปจฺจโย… ตีณิ.

๑๐๔. เหตุ อทุกฺขมสุขาย เวทนาย สมฺปยุตฺโต ธมฺโม เหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส วิปากปจฺจเยน ปจฺจโย… นว…เป… อวิคตปจฺจเยน ปจฺจโย… นว.

๑๐๕. เหตุยา ตีณิ, อารมฺมเณ นว, อธิปติยา นว, อนนฺตเร นว, สมนนฺตเร นว, สหชาเต นว, อญฺญมญฺเญ นว, นิสฺสเย นว, อุปนิสฺสเย นว, อาเสวเน นว, กมฺเม ตีณิ, วิปาเก นว, อาหาเร ตีณิ, อินฺทฺริเย นว, ฌาเน ตีณิ, มคฺเค นว, สมฺปยุตฺเต นว, อตฺถิยา นว, นตฺถิยา นว, วิคเต นว, อวิคเต นว (อนุโลมํ).

ปจฺจนียุทฺธาโร

๑๐๖. เหตุ อทุกฺขมสุขาย เวทนาย สมฺปยุตฺโต ธมฺโม เหตุสฺส อทุกฺขมสุขาย เวทนาย สมฺปยุตฺตสฺส ธมฺมสฺส อารมฺมณปจฺจเยน ปจฺจโย… สหชาตปจฺจเยน ปจฺจโย… อุปนิสฺสยปจฺจเยน ปจฺจโย (สํขิตฺตํ).

๑๐๗. นเหตุยา นว, นอารมฺมเณ นว (สํขิตฺตํ, ปจฺจนียํ).

เหตุปจฺจยา นอารมฺมเณ ตีณิ (สํขิตฺตํ, อนุโลมปจฺจนียํ).

นเหตุปจฺจยา อารมฺมเณ นว (สํขิตฺตํ, ปจฺจนียานุโลมํ).

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํ.)

เหตุทุกเวทนาตฺติกํ นิฏฺฐิตํ.