๑-๖. ปฏิจฺจวาราทิ

ปจฺจยจตุกฺกํ

เหตุปจฺจโย

๕๒๕. เหตุํ อชฺฌตฺตารมฺมณํ ธมฺมํ ปฏิจฺจ เหตุ อชฺฌตฺตารมฺมโณ ธมฺโม อุปฺปชฺชติ เหตุปจฺจยา… ตีณิ.

นเหตุํ อชฺฌตฺตารมฺมณํ ธมฺมํ ปฏิจฺจ นเหตุ อชฺฌตฺตารมฺมโณ ธมฺโม อุปฺปชฺชติ เหตุปจฺจยา… ตีณิ.

เหตุํ อชฺฌตฺตารมฺมณญฺจ นเหตุํ อชฺฌตฺตารมฺมณญฺจ ธมฺมํ ปฏิจฺจ เหตุ อชฺฌตฺตารมฺมโณ ธมฺโม อุปฺปชฺชติ เหตุปจฺจยา… ตีณิ (สํขิตฺตํ).

๕๒๖. เหตุยา นว, อารมฺมเณ นว, อธิปติยา นว…เป… อวิคเต นว (สํขิตฺตํ).

นเหตุ-นอธิปติปจฺจยา

๕๒๗. นเหตุํ อชฺฌตฺตารมฺมณํ ธมฺมํ ปฏิจฺจ นเหตุ อชฺฌตฺตารมฺมโณ ธมฺโม อุปฺปชฺชติ นเหตุปจฺจยา. นเหตุํ อชฺฌตฺตารมฺมณํ ธมฺมํ ปฏิจฺจ เหตุ อชฺฌตฺตารมฺมโณ ธมฺโม อุปฺปชฺชติ นเหตุปจฺจยา. (๒)

เหตุํ อชฺฌตฺตารมฺมณํ ธมฺมํ ปฏิจฺจ เหตุ อชฺฌตฺตารมฺมโณ ธมฺโม อุปฺปชฺชติ นอธิปติปจฺจยา (สํขิตฺตํ).

๕๒๘. นเหตุยา เทฺว, นอธิปติยา นว, นปุเรชาเต นว, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นฌาเน เอกํ, นมคฺเค เอกํ, นวิปฺปยุตฺเต นว (สํขิตฺตํ).

เหตุปจฺจยา นอธิปติยา นว (สํขิตฺตํ).

นเหตุปจฺจยา อารมฺมเณ เทฺว (สํขิตฺตํ).

(สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ สมฺปยุตฺตวาโรปิ ปฏิจฺจวารสทิสา วิตฺถาเรตพฺพา.)