๑-๖. ปฏิจฺจวาราทิ

๓๗๑. เหตุํ อปฺปมาณํ ธมฺมํ ปฏิจฺจ เหตุ อปฺปมาโณ ธมฺโม อุปฺปชฺชติ เหตุปจฺจยา… ตีณิ.

นเหตุํ อปฺปมาณํ ธมฺมํ ปฏิจฺจ นเหตุ อปฺปมาโณ ธมฺโม อุปฺปชฺชติ เหตุปจฺจยา… ตีณิ.

เหตุํ อปฺปมาณญฺจ นเหตุํ อปฺปมาณญฺจ ธมฺมํ ปฏิจฺจ เหตุ อปฺปมาโณ ธมฺโม อุปฺปชฺชติ เหตุปจฺจยา… ตีณิ (สํขิตฺตํ).

๓๗๒. เหตุยา นว, อารมฺมเณ นว, อธิปติยา นว…เป… อุปนิสฺสเย นว…เป… กมฺเม นว, วิปาเก นว…เป… อวิคเต นว (สํขิตฺตํ).

๓๗๓. เหตุํ อปฺปมาณํ ธมฺมํ ปฏิจฺจ เหตุ อปฺปมาโณ ธมฺโม อุปฺปชฺชติ นอธิปติปจฺจยา (สํขิตฺตํ).

๓๗๔. นอธิปติยา ฉ, นปุเรชาเต นว, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นวิปฺปยุตฺเต นว (สํขิตฺตํ).

เหตุปจฺจยา นอธิปติยา ฉ (สํขิตฺตํ).

นอธิปติปจฺจยา เหตุยา ฉ (สํขิตฺตํ).

(สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ สมฺปยุตฺตวาโรปิ ปฏิจฺจวารสทิสา วิตฺถาเรตพฺพา.)