๑. วิภงฺควาโร

นเหตุปจฺจโย

๑๗๙. อุเปกฺขาสหคตํ ธมฺมํ ปฏิจฺจ อุเปกฺขาสหคโต ธมฺโม อุปฺปชฺชติ นเหตุปจฺจยา – อเหตุกํ อุเปกฺขาสหคตํ เอกํ ขนฺธํ ปฏิจฺจ เทฺว ขนฺธา, เทฺว ขนฺเธ…เป… อเหตุกปฏิสนฺธิกฺขเณ…เป… วิจิกิจฺฉาสหคเต อุทฺธจฺจสหคเต ขนฺเธ ปฏิจฺจ วิจิกิจฺฉาสหคโต อุทฺธจฺจสหคโต โมโห. อุเปกฺขาสหคตํ ธมฺมํ ปฏิจฺจ นอุเปกฺขาสหคโต ธมฺโม อุปฺปชฺชติ นเหตุปจฺจยา – อเหตุเก อุเปกฺขาสหคเต ขนฺเธ ปฏิจฺจ อุเปกฺขา จิตฺตสมุฏฺฐานญฺจ รูปํ; อเหตุกปฏิสนฺธิกฺขเณ…เป…. อุเปกฺขาสหคตํ ธมฺมํ ปฏิจฺจ อุเปกฺขาสหคโต จ นอุเปกฺขาสหคโต จ ธมฺมา อุปฺปชฺชนฺติ นเหตุปจฺจยา – อเหตุกํ อุเปกฺขาสหคตํ เอกํ ขนฺธํ ปฏิจฺจ เทฺว ขนฺธา อุเปกฺขา จ จิตฺตสมุฏฺฐานญฺจ รูปํ, เทฺว ขนฺเธ…เป… อเหตุกปฏิสนฺธิกฺขเณ…เป…. (๓)

๑๘๐. นอุเปกฺขาสหคตํ ธมฺมํ ปฏิจฺจ นอุเปกฺขาสหคโต ธมฺโม อุปฺปชฺชติ นเหตุปจฺจยา – อเหตุกํ นอุเปกฺขาสหคตํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป… อเหตุกํ อุเปกฺขํ ปฏิจฺจ จิตฺตสมุฏฺฐานํ รูปํ; อเหตุกปฏิสนฺธิกฺขเณ…เป… อุเปกฺขํ ปฏิจฺจ วตฺถุ, วตฺถุํ ปฏิจฺจ อุเปกฺขา, เอกํ มหาภูตํ…เป… (ยาว อสญฺญสตฺตา).

นอุเปกฺขาสหคตํ ธมฺมํ ปฏิจฺจ อุเปกฺขาสหคโต ธมฺโม อุปฺปชฺชติ นเหตุปจฺจยา – อเหตุกํ อุเปกฺขํ ปฏิจฺจ สมฺปยุตฺตกา ขนฺธา; อเหตุกปฏิสนฺธิกฺขเณ อุเปกฺขํ ปฏิจฺจ สมฺปยุตฺตกา ขนฺธา; อเหตุกปฏิสนฺธิกฺขเณ วตฺถุํ ปฏิจฺจ อุเปกฺขาสหคตา ขนฺธา; วิจิกิจฺฉาสหคตํ อุทฺธจฺจสหคตํ อุเปกฺขํ ปฏิจฺจ วิจิกิจฺฉาสหคโต อุทฺธจฺจสหคโต โมโห.

นอุเปกฺขาสหคตํ ธมฺมํ ปฏิจฺจ อุเปกฺขาสหคโต จ นอุเปกฺขาสหคโต จ ธมฺมา อุปฺปชฺชนฺติ นเหตุปจฺจยา – อเหตุกํ อุเปกฺขํ ปฏิจฺจ สมฺปยุตฺตกา ขนฺธา จิตฺตสมุฏฺฐานญฺจ รูปํ, อเหตุกํ อุเปกฺขํ ปฏิจฺจ สมฺปยุตฺตกา ขนฺธา, มหาภูเต ปฏิจฺจ จิตฺตสมุฏฺฐานํ รูปํ; อเหตุกปฏิสนฺธิกฺขเณ อุเปกฺขํ ปฏิจฺจ สมฺปยุตฺตกา ขนฺธา กฏตฺตา จ รูปํ, อเหตุกปฏิสนฺธิกฺขเณ อุเปกฺขํ ปฏิจฺจ สมฺปยุตฺตกา ขนฺธา, มหาภูเต ปฏิจฺจ กฏตฺตารูปํ, อเหตุกปฏิสนฺธิกฺขเณ วตฺถุํ ปฏิจฺจ อุเปกฺขาสหคตา ขนฺธา, มหาภูเต ปฏิจฺจ กฏตฺตารูปํ, อเหตุกปฏิสนฺธิกฺขเณ วตฺถุํ ปฏิจฺจ อุเปกฺขา จ สมฺปยุตฺตกา จ ขนฺธา. (๓)

๑๘๑. อุเปกฺขาสหคตญฺจ นอุเปกฺขาสหคตญฺจ ธมฺมํ ปฏิจฺจ อุเปกฺขาสหคโต ธมฺโม อุปฺปชฺชติ นเหตุปจฺจยา – อเหตุกํ อุเปกฺขาสหคตํ เอกํ ขนฺธญฺจ อุเปกฺขญฺจ ปฏิจฺจ เทฺว ขนฺธา, เทฺว ขนฺเธ…เป… อเหตุกปฏิสนฺธิกฺขเณ อุเปกฺขาสหคตํ เอกํ ขนฺธญฺจ อุเปกฺขญฺจ ปฏิจฺจ เทฺว ขนฺธา, เทฺว ขนฺเธ…เป… อเหตุกปฏิสนฺธิกฺขเณ อุเปกฺขาสหคตํ เอกํ ขนฺธญฺจ วตฺถุญฺจ ปฏิจฺจ เทฺว ขนฺธา; เทฺว ขนฺเธ…เป… วิจิกิจฺฉาสหคเต อุทฺธจฺจสหคเต ขนฺเธ จ อุเปกฺขญฺจ ปฏิจฺจ วิจิกิจฺฉาสหคโต อุทฺธจฺจสหคโต โมโห.

อุเปกฺขาสหคตญฺจ นอุเปกฺขาสหคตญฺจ ธมฺมํ ปฏิจฺจ นอุเปกฺขาสหคโต ธมฺโม อุปฺปชฺชติ นเหตุปจฺจยา – อเหตุเก อุเปกฺขาสหคเต ขนฺเธ จ อุเปกฺขญฺจ ปฏิจฺจ จิตฺตสมุฏฺฐานํ รูปํ, อเหตุเก อุเปกฺขาสหคเต ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ; อเหตุกปฏิสนฺธิกฺขเณ อุเปกฺขาสหคเต ขนฺเธ จ อุเปกฺขญฺจ ปฏิจฺจ กฏตฺตารูปํ, อเหตุกปฏิสนฺธิกฺขเณ อุเปกฺขาสหคเต ขนฺเธ จ มหาภูเต จ ปฏิจฺจ กฏตฺตารูปํ, อเหตุกปฏิสนฺธิกฺขเณ อุเปกฺขาสหคเต ขนฺเธ จ วตฺถุญฺจ ปฏิจฺจ อุเปกฺขา.

อุเปกฺขาสหคตญฺจ นอุเปกฺขาสหคตญฺจ ธมฺมํ ปฏิจฺจ อุเปกฺขาสหคโต จ นอุเปกฺขาสหคโต จ ธมฺมา อุปฺปชฺชนฺติ นเหตุปจฺจยา – อเหตุกํ อุเปกฺขาสหคตํ เอกํ ขนฺธญฺจ อุเปกฺขญฺจ ปฏิจฺจ เทฺว ขนฺธา จิตฺตสมุฏฺฐานญฺจ รูปํ, เทฺว ขนฺเธ…เป… อเหตุกํ อุเปกฺขาสหคตํ เอกํ ขนฺธญฺจ อุเปกฺขญฺจ ปฏิจฺจ เทฺว ขนฺธา, เทฺว ขนฺเธ…เป… อเหตุเก อุเปกฺขาสหคเต ขนฺเธ จ อุเปกฺขญฺจ มหาภูเต จ ปฏิจฺจ จิตฺตสมุฏฺฐานํ รูปํ; อเหตุกปฏิสนฺธิกฺขเณ อุเปกฺขาสหคตํ เอกํ ขนฺธญฺจ อุเปกฺขญฺจ ปฏิจฺจ เทฺว ขนฺธา กฏตฺตา จ รูปํ, เทฺว ขนฺเธ…เป… อเหตุกปฏิสนฺธิกฺขเณ อุเปกฺขาสหคตํ เอกํ ขนฺธญฺจ อุเปกฺขญฺจ ปฏิจฺจ เทฺว ขนฺธา, เทฺว ขนฺเธ…เป… อเหตุเก อุเปกฺขาสหคเต ขนฺเธ จ อุเปกฺขญฺจ มหาภูเต จ ปฏิจฺจ กฏตฺตารูปํ; อเหตุกปฏิสนฺธิกฺขเณ อุเปกฺขาสหคตํ เอกํ ขนฺธญฺจ วตฺถุญฺจ ปฏิจฺจ เทฺว ขนฺธา อุเปกฺขา จ, เทฺว ขนฺเธ…เป… (สํขิตฺตํ). (๓)