๑. วิภงฺควาโร

เหตุปจฺจโย

๑๐. กิเลสํ ธมฺมํ ปจฺจยา กิเลโส ธมฺโม อุปฺปชฺชติ เหตุปจฺจยา… ตีณิ (ปฏิจฺจสทิสา).

โนกิเลสํ ธมฺมํ ปจฺจยา โนกิเลโส ธมฺโม อุปฺปชฺชติ เหตุปจฺจยา – โนกิเลสํ เอกํ ขนฺธํ ปจฺจยา ตโย ขนฺธา…เป… (ยาว อชฺฌตฺติกา มหาภูตา) วตฺถุํ ปจฺจยา โนกิเลสา ขนฺธา. (๑)

โนกิเลสํ ธมฺมํ ปจฺจยา กิเลโส ธมฺโม อุปฺปชฺชติ เหตุปจฺจยา – โนกิเลเส ขนฺเธ ปจฺจยา กิเลสา, วตฺถุํ ปจฺจยา กิเลสา. (๒)

โนกิเลสํ ธมฺมํ ปจฺจยา กิเลโส จ โนกิเลโส จ ธมฺมา อุปฺปชฺชนฺติ เหตุปจฺจยา – โนกิเลสํ เอกํ ขนฺธํ ปจฺจยา ตโย ขนฺธา กิเลสา จ จิตฺตสมุฏฺฐานญฺจ รูปํ…เป… เทฺว ขนฺเธ…เป… วตฺถุํ ปจฺจยา กิเลสา, มหาภูเต ปจฺจยา จิตฺตสมุฏฺฐานํ รูปํ, วตฺถุํ ปจฺจยา กิเลสา จ สมฺปยุตฺตกา จ ขนฺธา. (๓)

๑๑. กิเลสญฺจ โนกิเลสญฺจ ธมฺมํ ปจฺจยา กิเลโส ธมฺโม อุปฺปชฺชติ เหตุปจฺจยา – โลภญฺจ สมฺปยุตฺตเก จ ขนฺเธ ปจฺจยา โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ (จกฺกํ). โลภญฺจ วตฺถุญฺจ ปจฺจยา กิเลสา. (๑)

กิเลสญฺจ โนกิเลสญฺจ ธมฺมํ ปจฺจยา โนกิเลโส ธมฺโม อุปฺปชฺชติ เหตุปจฺจยา – โนกิเลสํ เอกํ ขนฺธญฺจ กิเลสญฺจ ปจฺจยา ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ จ…เป… กิเลเส จ มหาภูเต จ ปจฺจยา จิตฺตสมุฏฺฐานํ รูปํ, กิเลเส จ วตฺถุญฺจ ปจฺจยา โนกิเลสา ขนฺธา. (๒)

กิเลสญฺจ โนกิเลสญฺจ ธมฺมํ ปจฺจยา กิเลโส จ โนกิเลโส จ ธมฺมา อุปฺปชฺชนฺติ เหตุปจฺจยา – โนกิเลสํ เอกํ ขนฺธญฺจ โลภญฺจ ปจฺจยา ตโย ขนฺธา โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ จิตฺตสมุฏฺฐานญฺจ รูปํ…เป… เทฺว ขนฺเธ จ…เป… (จกฺกํ). โลภญฺจ วตฺถุญฺจ ปจฺจยา โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ สมฺปยุตฺตกา จ ขนฺธา (จกฺกํ). (๓)

(อารมฺมณปจฺจเย โนกิเลสมูเล ปญฺจ วิญฺญาณา กาตพฺพา.)