๑. วิภงฺควาโร

เหตุปจฺจโย

๕. ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ เหตุปจฺจยา… ตีณิ (ปฏิจฺจสทิสา).

๖. นทสฺสเนน ปหาตพฺพํ ธมฺมํ ปจฺจยา นทสฺสเนน ปหาตพฺโพ ธมฺโม อุปฺปชฺชติ เหตุปจฺจยา – นทสฺสเนน ปหาตพฺพํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป… ปฏิสนฺธิกฺขเณ…เป… (ยาว อชฺฌตฺติกา มหาภูตา) วตฺถุํ ปจฺจยา นทสฺสเนน ปหาตพฺพา ขนฺธา. (๑)

นทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ เหตุปจฺจยา – วตฺถุํ ปจฺจยา ทสฺสเนน ปหาตพฺพา ขนฺธา. (๒)

นทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ จ นทสฺสเนน ปหาตพฺโพ จ ธมฺมา อุปฺปชฺชนฺติ เหตุปจฺจยา – วตฺถุํ ปจฺจยา ทสฺสเนน ปหาตพฺพา ขนฺธา, มหาภูเต ปจฺจยา จิตฺตสมุฏฺฐานํ. (๓)

๗. ทสฺสเนน ปหาตพฺพญฺจ นทสฺสเนน ปหาตพฺพญฺจ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ เหตุปจฺจยา – ทสฺสเนน ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ…เป…. (๑)

ทสฺสเนน ปหาตพฺพญฺจ นทสฺสเนน ปหาตพฺพญฺจ ธมฺมํ ปจฺจยา นทสฺสเนน ปหาตพฺโพ ธมฺโม อุปฺปชฺชติ เหตุปจฺจยา – ทสฺสเนน ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๒)

ทสฺสเนน ปหาตพฺพญฺจ นทสฺสเนน ปหาตพฺพญฺจ ธมฺมํ ปจฺจยา ทสฺสเนน ปหาตพฺโพ จ นทสฺสเนน ปหาตพฺโพ จ ธมฺมา อุปฺปชฺชนฺติ เหตุปจฺจยา – ทสฺสเนน ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ…เป… ทสฺสเนน ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๓)