๑-๗. ปฏิจฺจวาราทิ

เหตุปจฺจโย

๒๑. อกุสลํ กิเลสญฺเจว สํกิเลสิกญฺจ ธมฺมํ ปฏิจฺจ อกุสโล กิเลโส เจว สํกิเลสิโก จ ธมฺโม อุปฺปชฺชติ เหตุปจฺจยา (สํขิตฺตํ).

เหตุยา เอกํ…เป… อวิคเต เอกํ (สํขิตฺตํ).

(สหชาตวาเรปิ…เป… ปญฺหาวาเรปิ สพฺพตฺถ เอกํ.)

๒๒. กุสลํ สํกิเลสิกญฺเจว โน จ กิเลสํ ธมฺมํ ปฏิจฺจ กุสโล สํกิเลสิโก เจว โน จ กิเลโส ธมฺโม อุปฺปชฺชติ เหตุปจฺจยา… ตีณิ.

อกุสลํ สํกิเลสิกญฺเจว โน จ กิเลสํ ธมฺมํ ปฏิจฺจ อกุสโล สํกิเลสิโก เจว โน จ กิเลโส ธมฺโม อุปฺปชฺชติ เหตุปจฺจยา… ตีณิ.

อพฺยากตํ สํกิเลสิกญฺเจว โน จ กิเลสํ ธมฺมํ ปฏิจฺจ อพฺยากโต สํกิเลสิโก เจว โน จ กิเลโส ธมฺโม อุปฺปชฺชติ เหตุปจฺจยา.

กุสลํ สํกิเลสิกญฺเจว โน จ กิเลสญฺจ อพฺยากตํ สํกิเลสิกญฺเจว โน จ กิเลสญฺจ ธมฺมํ ปฏิจฺจ อพฺยากโต สํกิเลสิโก เจว โน จ กิเลโส ธมฺโม อุปฺปชฺชติ เหตุปจฺจยา. (๑)

อกุสลํ สํกิเลสิกญฺเจว โน จ กิเลสญฺจ อพฺยากตํ สํกิเลสิกญฺเจว โน จ กิเลสญฺจ ธมฺมํ ปฏิจฺจ อพฺยากโต สํกิเลสิโก เจว โน จ กิเลโส ธมฺโม อุปฺปชฺชติ เหตุปจฺจยา (สํขิตฺตํ).

๒๓. เหตุยา นว, อารมฺมเณ ตีณิ…เป… อวิคเต นว (สํขิตฺตํ. สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ).

๒๔. กุสโล สํกิเลสิโก เจว โน จ กิเลโส ธมฺโม กุสลสฺส สํกิเลสิกสฺส เจว โน จ กิเลสสฺส ธมฺมสฺส เหตุปจฺจเยน ปจฺจโย… ตีณิ.

อพฺยากโต สํกิเลสิโก เจว โน จ กิเลโส ธมฺโม อพฺยากตสฺส สํกิเลสิกสฺส เจว โน จ กิเลสสฺส ธมฺมสฺส เหตุปจฺจเยน ปจฺจโย. (๑) (สํขิตฺตํ.)

๒๕. เหตุยา จตฺตาริ, อารมฺมเณ นว, อธิปติยา นว…เป… อวิคเต เตรส (สํขิตฺตํ. ยถา กุสลตฺติเก ปญฺหาวารํ, เอวํ วิตฺถาเรตพฺพํ).