๑-๗. ปฏิจฺจวาราทิ

ปจฺจยจตุกฺกํ

๔๑. กุสลํ เกนจิ วิญฺเญยฺยํ ธมฺมํ ปฏิจฺจ กุสโล เกนจิ วิญฺเญยฺโย ธมฺโม อุปฺปชฺชติ เหตุปจฺจยา. กุสลํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยา. กุสลํ เกนจิ วิญฺเญยฺยํ ธมฺมํ ปฏิจฺจ กุสโล เกนจิ วิญฺเญยฺโย จ อพฺยากโต เกนจิ วิญฺเญยฺโย จ ธมฺมา อุปฺปชฺชนฺติ เหตุปจฺจยา. (๓)

อกุสลํ เกนจิ วิญฺเญยฺยํ ธมฺมํ ปฏิจฺจ อกุสโล เกนจิ วิญฺเญยฺโย ธมฺโม อุปฺปชฺชติ เหตุปจฺจยา… ตีณิ.

อพฺยากตํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยา. (๑)

กุสลํ เกนจิ วิญฺเญยฺยญฺจ อพฺยากตํ เกนจิ วิญฺเญยฺยญฺจ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยา. (๑)

อกุสลํ เกนจิ วิญฺเญยฺยญฺจ อพฺยากตํ เกนจิ วิญฺเญยฺยญฺจ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยา. (๑)

๔๒. กุสลํ เกนจิ วิญฺเญยฺยํ ธมฺมํ ปฏิจฺจ กุสโล เกนจิ วิญฺเญยฺโย ธมฺโม อุปฺปชฺชติ อารมฺมณปจฺจยา. (๑)

อกุสลํ เกนจิ วิญฺเญยฺยํ ธมฺมํ ปฏิจฺจ อกุสโล เกนจิ วิญฺเญยฺโย ธมฺโม อุปฺปชฺชติ อารมฺมณปจฺจยา. (๑)

อพฺยากตํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ อารมฺมณปจฺจยา. (๑) (สํขิตฺตํ.)

๔๓. เหตุยา นว, อารมฺมเณ ตีณิ…เป… อวิคเต นว (สํขิตฺตํ).

ปจฺจนียํ

นเหตุปจฺจโย

๔๔. อกุสลํ เกนจิ วิญฺเญยฺยํ ธมฺมํ ปฏิจฺจ อกุสโล เกนจิ วิญฺเญยฺโย ธมฺโม อุปฺปชฺชติ นเหตุปจฺจยา. (๑)

อพฺยากตํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ นเหตุปจฺจยา. (๑) (สํขิตฺตํ.)

๔๕. นเหตุยา เทฺว, นอารมฺมเณ ปญฺจ, นอธิปติยา นว…เป… โนวิคเต ปญฺจ (สํขิตฺตํ. สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ).

เหตุปจฺจโย

๔๖. กุสโล เกนจิ วิญฺเญยฺโย ธมฺโม กุสลสฺส เกนจิ วิญฺเญยฺยสฺส ธมฺมสฺส เหตุปจฺจเยน ปจฺจโย… ตีณิ.

อกุสโล เกนจิ วิญฺเญยฺโย ธมฺโม อกุสลสฺส เกนจิ วิญฺเญยฺยสฺส ธมฺมสฺส เหตุปจฺจเยน ปจฺจโย… ตีณิ.

อพฺยากโต เกนจิ วิญฺเญยฺโย ธมฺโม อพฺยากตสฺส เกนจิ วิญฺเญยฺยสฺส ธมฺมสฺส เหตุปจฺจเยน ปจฺจโย. (๑) (สํขิตฺตํ.)

๔๗. เหตุยา สตฺต, อารมฺมเณ นว…เป… อวิคเต เตรส (สํขิตฺตํ. ยถา กุสลตฺติเก ปญฺหาวารํ, เอวํ วิตฺถาเรตพฺพํ).

๔๘. กุสลํ นเกนจิ วิญฺเญยฺยํ ธมฺมํ ปฏิจฺจ กุสโล นเกนจิ วิญฺเญยฺโย ธมฺโม อุปฺปชฺชติ เหตุปจฺจยา (เกนจิวิญฺเญยฺยสทิสํ).

กุสลตฺติกจูฬนฺตรทุกํ นิฏฺฐิตํ.