๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๑๗๔. หีนํ เหตุํ ธมฺมํ ปฏิจฺจ หีโน เหตุ ธมฺโม อุปฺปชฺชติ เหตุปจฺจยา. มชฺฌิมํ เหตุํ ธมฺมํ ปฏิจฺจ มชฺฌิโม เหตุ ธมฺโม อุปฺปชฺชติ เหตุปจฺจยา. ปณีตํ เหตุํ ธมฺมํ ปฏิจฺจ ปณีโต เหตุ ธมฺโม อุปฺปชฺชติ เหตุปจฺจยา. (๓) (สํขิตฺตํ.)

๑๗๕. เหตุยา ตีณิ, อารมฺมเณ ตีณิ…เป… อวิคเต ตีณิ (สํขิตฺตํ).

นอธิปติยา ตีณิ, นปุเรชาเต ตีณิ, นปจฺฉาชาเต ตีณิ, นอาเสวเน ตีณิ, นวิปาเก ตีณิ, นวิปฺปยุตฺเต ตีณิ (สํขิตฺตํ).

(สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ วิตฺถาเรตพฺพํ.)

เหตุ-อารมฺมณปจฺจยา

๑๗๖. หีโน เหตุ ธมฺโม หีนสฺส เหตุสฺส ธมฺมสฺส เหตุปจฺจเยน ปจฺจโย. (๑)

มชฺฌิโม เหตุ ธมฺโม มชฺฌิมสฺส เหตุสฺส ธมฺมสฺส เหตุปจฺจเยน ปจฺจโย. (๑)

ปณีโต เหตุ ธมฺโม ปณีตสฺส เหตุสฺส ธมฺมสฺส เหตุปจฺจเยน ปจฺจโย. (๑)

หีโน เหตุ ธมฺโม หีนสฺส เหตุสฺส ธมฺมสฺส อารมฺมณปจฺจเยน ปจฺจโย. หีโน เหตุ ธมฺโม มชฺฌิมสฺส เหตุสฺส ธมฺมสฺส อารมฺมณปจฺจเยน ปจฺจโย. (๒)

มชฺฌิโม เหตุ ธมฺโม มชฺฌิมสฺส เหตุสฺส ธมฺมสฺส อารมฺมณปจฺจเยน ปจฺจโย. มชฺฌิโม เหตุ ธมฺโม หีนสฺส เหตุสฺส ธมฺมสฺส อารมฺมณปจฺจเยน ปจฺจโย. (๒)

ปณีโต เหตุ ธมฺโม มชฺฌิมสฺส เหตุสฺส ธมฺมสฺส อารมฺมณปจฺจเยน ปจฺจโย. (๑)

๑๗๗. หีโน เหตุ ธมฺโม หีนสฺส เหตุสฺส ธมฺมสฺส อธิปติปจฺจเยน ปจฺจโย. (๑)

มชฺฌิโม เหตุ ธมฺโม มชฺฌิมสฺส เหตุสฺส ธมฺมสฺส อธิปติปจฺจเยน ปจฺจโย. มชฺฌิโม เหตุ ธมฺโม หีนสฺส เหตุสฺส ธมฺมสฺส อธิปติปจฺจเยน ปจฺจโย. (๒)

ปณีโต เหตุ ธมฺโม ปณีตสฺส เหตุสฺส ธมฺมสฺส อธิปติปจฺจเยน ปจฺจโย. ปณีโต เหตุ ธมฺโม มชฺฌิมสฺส เหตุสฺส ธมฺมสฺส อธิปติปจฺจเยน ปจฺจโย. (๒)

หีโน เหตุ ธมฺโม หีนสฺส เหตุสฺส ธมฺมสฺส อนนฺตรปจฺจเยน ปจฺจโย… เทฺว.

มชฺฌิโม เหตุ ธมฺโม มชฺฌิมสฺส เหตุสฺส ธมฺมสฺส อนนฺตรปจฺจเยน ปจฺจโย… เทฺว.

ปณีโต เหตุ ธมฺโม ปณีตสฺส เหตุสฺส ธมฺมสฺส อนนฺตรปจฺจเยน ปจฺจโย… เทฺว (สํขิตฺตํ).

๑๗๘. เหตุยา ตีณิ, อารมฺมเณ ปญฺจ, อธิปติยา ปญฺจ…เป. … อวิคเต ตีณิ (สํขิตฺตํ).

นเหตุยา อฏฺฐ, นอารมฺมเณ อฏฺฐ (สํขิตฺตํ).

เหตุปจฺจยา นอารมฺมเณ ตีณิ (สํขิตฺตํ).

นเหตุปจฺจยา อารมฺมเณ ปญฺจ (สํขิตฺตํ).

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)

นเหตุปทํ

เหตุปจฺจโย

๑๗๙. หีนํ นเหตุํ ธมฺมํ ปฏิจฺจ หีโน นเหตุ ธมฺโม อุปฺปชฺชติ เหตุปจฺจยา.

(ยถา สํกิลิฏฺฐตฺติกเหตุทุกํ, เอวํ วิตฺถาเรตพฺพํ.)